SAN JUAN 9:9-18

⁹―Ti kwiꞌ kanꞌ lka ― ndukwin ska ta neꞌ. ―Siꞌi yu kanꞌ, ni siya suꞌwa ñaꞌan tloo yu re ―ndukwin xka ta neꞌ. Loꞌo mxkwen ti kwiꞌ nu kiꞌyu kanꞌ chaꞌ ꞌin neꞌ bra kanꞌ: ―Naꞌ lkaǎn nu kanꞌ.

¹⁰Kanꞌ mnichaꞌ neꞌ ꞌin yu: ―¿Ni sa ñaꞌan ngwa chaꞌ nchkaa kiloo ni a?

¹¹―Ska nten nu naan Jesús, kanꞌ lka nu mxtiyaaꞌ chinꞌ yuu kutsuꞌ chaꞌ taꞌan yu chunꞌ kiloǔn ―ndukwin―. Kanꞌ ngulo yu tñan ꞌñaǎn chaꞌ tsaꞌaǎn jyaꞌaǎn kiloǔn nde chku Siloé. Kanꞌ chaꞌ yiꞌaǎn mjyaꞌaǎn kiloǔn la kanꞌ, loꞌo bra ti ngalaa kiloǔn; suꞌwe ꞌa nda xaa kiloǔn ni.

¹²―¿La nde yaꞌ ndyaa yu kanꞌ a? ―ndukwin neꞌ ꞌin yu bra kanꞌ. ―Ja jlyo tiǎnꞌ ―ndukwin yu.

¹³Ndyaa loꞌo neꞌ ꞌin yu nu ngwa kwityiinꞌ kanꞌ seꞌen ndiꞌin neꞌ fariseo niꞌ lyaa.

¹⁴Tsan nu nxitñaꞌ neꞌ ngwa kanꞌ, kwiꞌ tsan kti ꞌa ngwa xa nu mxtiyaaꞌ Jesús yuu kutsuꞌ kanꞌ, yꞌni yu joꞌó kiloo yu kwityiinꞌ kanꞌ.

¹⁵Kanꞌ chaꞌ mdyisnan neꞌ fariseo, mnichaꞌ neꞌ ꞌin nu ngwa kwityiinꞌ kanꞌ: ―¿Ni sa ñaꞌan ngwa chaꞌ nu nchkaa kiloo a? ―ndukwin neꞌ ꞌin yu. ―Mdaꞌan ska nten yuu kutsuuꞌ chunꞌ kiloǔn ―ndukwin yu kanꞌ―, kanꞌ yiꞌaǎn mjyaꞌaǎn kiloǔn, suꞌwe ꞌa nda xaa kiloǔn ni ―ndukwin bra kanꞌ.

¹⁶Loꞌo ndiya chinꞌ neꞌ fariseo nu ykwiꞌ chaꞌ re: ―Siꞌi seꞌen ndiꞌin Ndiose mdoꞌo yu kanꞌ, kanꞌ chaꞌ ja nduwe tiꞌ yu ni siya kti ꞌa tsan taꞌa ni. Loꞌo ndiya xka ta nten nu ykwiꞌ chaꞌ re ꞌin yu: ―¿Ni ñaꞌan ka ra ꞌin yu kanꞌ kuꞌni yu chaꞌ tnun chabiyaꞌ ꞌin Ndiose si ndukwi ꞌa yu kiꞌya ngwañaꞌan a? Ja suꞌwa ykwiꞌ neꞌ kanꞌ chaꞌ ꞌin Jesús.

¹⁷Xiyaꞌ mnichaꞌ neꞌ ꞌin nu ngwa kwityiinꞌ bra kanꞌ: ―Nuꞌwin ni, ¿ni sa ñaꞌan chaꞌ nchkwiiꞌ chaꞌ ꞌin yu kanꞌ, chunꞌ wa yꞌni yu joꞌó kiloo a? Mxkwen yu kanꞌ ꞌin neꞌ bra kanꞌ: ―Ska yu kula nu nchkwiꞌ chaꞌ ꞌin Ndiose loꞌo nten lka yu kanꞌ ―ndukwin yu nu ngwa kwityiinꞌ kanꞌ.

¹⁸Ja ndyaa ñaꞌan tiꞌ neꞌ judío kanꞌ, chaꞌ wa ñaꞌan kwityiinꞌ yu kanꞌ xa nu ngula yu, loꞌo ni, suꞌwe ꞌa nchkanꞌ naꞌan yu. Bra wa mdyii chaꞌ, msiꞌya neꞌ ꞌin sti yu loꞌo jyaꞌan yu bra kanꞌ.