9Iso sín ntáchro sín kíxin: ―Kjá chaxín jehe chꞌán ―ichro sín. Ikjé sín ntáchro sín kíxin: ―Náhí, jehya jehe chꞌán. Tóyóhó chꞌán tí chꞌín a ―ichro sín. Kjánchó jehe chꞌán kjuáte̱he chꞌán kíxin: ―Chaxín janhan ―ichro chꞌán.
10Ntá kjuanchankíhi sín chꞌán kíxin: ―¿Nkexrí kíxin jaí tꞌikuan jaha? ―ichro sín.
11Ntá kjuáte̱he chꞌán ntáchro chꞌán kíxin: ―Ijnko chꞌín mé itꞌin Jesús mé kjuíchꞌéna chꞌán nche̱tꞌo̱ kuátematóxin chꞌán kua̱n la ntá kꞌue̱tua̱nna chꞌán kixin satsjia ti pila tjiá nta̱ nchekꞌin sín Siloé tsꞌontia kua̱n, ichro chꞌán. Ntá sákjuia kꞌontia, ntá xrína̱hya ó kꞌuíkua̱n ―ichro chꞌán.