San Juan 9:27-37

²⁷Iwan yej okinnankilij: ―Yonamechilwij, iwan mach ankineltokaj, ¿tlanik ankinekij oksemi ma namechilwi? ¿Noijki namejwan ankinekij anyeskej imomachtijkawan?

²⁸Ijkuakón okajwakej iwan okilwijkej: ―Tej tiimomachtijkaw de Yej. Pero tejwan tiimomachtijkawan de Moisés.

²⁹Tejwan tikmatij nik in Dios okinotzke in Moisés, pero yin tlakatl nion mach tikmatij de kan owalaj.

³⁰In tlakatl katlej mach otlachiaya okinnankilij: ―¿Kenijki? ¡Kenik namejwan mach ankimatij de kan owalaj, iwan nej yonechtlachialtij!

³¹Tikmatij nik in Dios mach kinkaki in tlajtlakolejkej. Kinkaki san yen katlej kiweyikixtiaj iwan kichiwaj tlan Dios kimonekiltia.

³²Desde ijkuak opéj in tlaltikpak mach semi tikkakij akaj tlakatl ma kitlachialti se katlej mach tlachia desde itlakatilis.

³³Tla yin tlakatl amo walani de Dios, mach itlaj welini kichiwani.

³⁴Iwan yejwan okilwijkej: ―Tej otitlakatke titentok de tlajtlakole, ¿iwan axan tikneki titechmachtis? Iwan okikixtijkej iktlanke (ik tlami) de itech intiopan.

³⁵Jesús okimatke nik in tlakatl katlej mach otlachiaya okikixtijkej iktlanke (ik tlami) de itech intiopan. Iwan nijkuak in Jesús okinamikke yon tlakatl, okitlajtlanij: ―¿Titlaneltoka inawak iKone in Dios?

³⁶Iwan yej okilwij: ―Señor, xinechilwi akin yon, para ma nitlaneltoka inawak.

³⁷Iwan Jesús okilwij: ―Tej yotikitak. Yen Nej katlej axan Nej mowan nimotlapowijtok.