San Juan 9:24-38

²⁴Vëhë xi cajindaya nga xutaxa rë majo ndiya cha xi camandaja tuxcun jan, hane sehe cachja me cojo cha cuitjin: ―‍“Vëë Nina”, noje xi cuatjin camá. Ngayin ne, hyin xi me xi casahmi xi camandaja tuxcuin ne, ngu cha tsehen me. ―‍Cuatjin cachja xutaxa rë jan.

²⁵Ngajan xi cha vëhë ne, cuitjin cafayangui cha: ―‍Ngahan ne, hveen sa xi ngu cha tsehen me. Ngu xcusun ni xi hvë ne, titjun ne, rcá ngahan, peru quihndë ne, tsejen ná. ―‍Cuatjin cafayangui cha.

²⁶Hane xutaxa rë jan ne, cavinenguise me cha cuitjin: ―‍¿Mé casahmi me cojo ri? ¿Hacutjin casahmi me xi camandaja tuxcuin? ―‍Cuatjin cavinenguise me.

²⁷Hane cha vëhë ne, cuitjin cafayangui cha: ―‍Ha cachjá cojo nuju ne, mijí cuetuhunrcun. ¿Mé má meje cuisiñuju nga ngundiya? ¿Há cojo ngayun meje cuisuhun ladu rë me? ―‍Cuatjin cafayangui cha.

²⁸Hane xutaxa rë jan ne, cacjan me cojo cha, cuitjin cachja me: ―‍¡Ngaye xi ladu rë cha vëhë má ngaye! ¡Ngayin ne, ladu rë Moisés má ngayin!

²⁹Ngayin ne, hyin xi Moisés ne, cachja me cjua xi casua Nina me, peru cha vëhë ne, hisca hyíín jani cavetju cha canduva cha. ―‍Cuatjin cachja me.

³⁰Ngajan xi cha vëhë ne, cuitjin cafayangui cha: ―‍¡Jemu sihya xi ngayun ne, hyúun jani cavetju me canduva me, handasa casahmi me xi camandaja túxcun ngahan!

³¹Ha hyan ta Nina ne, fahacuendaain me cjua xi chja xuta tsehen. Peru sa xi ngu xuta faharcun me Nina hacuaha sahmi me hacutjin xi meje rë Nina ne, me vëhë ne, fahacuenda Nina cjua xi chja me.

³²Cjëë camahani cuinuhya rë xi ngu xuta sahmi me xi mandaja tuxcun ngu xuta xi rcá me hisca hya xi catsin me.

³³Sa xi hacuiin Nina catsingatju rë me vëhë ne, tsajin camahani mé xi cuma sahmi me. ―‍Cuatjin cafayangui cha.

³⁴Ngajan xi xutaxa rë jan ne, cuitjin cachja me: ―‍¡Ngaye ne, ngajñi rë cjuatsehen camahani catsin ngaye! ¡Machjiriin camahani ngaye xi cuicoye niji! ―‍Cuatjin cachja me. Sehe cavaxë me cha candatsen.

³⁵Hya xi camá ne, camachaya rë Jesús xi cavaxë xutaxa rë yungun cha xi camandaja tuxcun jan candatsen. Hane xi casacu xicjin Jesús cojo cha ne, cachja me cojo cha cuitjin: ―‍¿Há mangutacún ngayun cojo me xi Quihndi rë Xuta Jain? ―‍Cuatjin cachja me.

³⁶Hane cha vëhë ne, cuitjin cafayangui cha: ―‍Tatá, tinújun cojo ná yo me vë ne, cojo sa xi cumangu cácun cojo rë me. ―‍Cuatjin cafayangui cha.

³⁷Ngajan xi Jesús ne, cuitjin cachja me cojo cha: ―‍Ngayun ne, ha cahyun me ta, ngahan xi tichjá cojo nuju vi ne, ha ngahan xi Quihndi rë Xuta Jain ngahan. ―‍Cuatjin cachja me.

³⁸Hane cha vëhë ne, cuitjin cachja cha: ―‍Mangucácun, Tatá. ―‍Cuatjin cachja cha, sehe cafaharcun cha me.