SAN JUAN 9:19-41

¹⁹Sya, mnibdi's mèna loo xud mbi' no loo xna' mbi'. Ndxab mèna: ―¿Ché', lìcque', nac mbi' ndxè' xgan' gu' co' mbez gu' ngóol sieu, cà'? Chele'i tataa nac, ¿xá mod ngòca loo mbi' ngüi' mbi nalle', sya?

²⁰Mcàb xud mbi' no xna' mbi' loo mèna. Ndxab ryop xa': ―Nu' nanee le' mbyòo ba' nac xgan' nu'. No, lìca, anon ngóol mbyòo sieu mbyòo.

²¹Per nalle' nu' ne'ñeede no ne'ta'de nu' cuent xá mod mdyub xnìi ngudloo mbyòo par ngüi' mbyòo. Ne' ne' ñee nu' no ne' ne' ta' nu' cuent chó mbli par mdyub xnìi ngudloo mbyòo par ngüi' mbyòo. Mbyòo ngoxle'. Bnibdi's gu' loo mbyòo. Leque mbyòo ta' cuent cón che'n mbyòo loo gu'.

²²Ale tataa ndxab xud mbi' no xna' mbi' loo mèn co' ñibe', no co' ndyoo ner, no co' ndyoo naa loo mèn nación Israel tac nzyeb ryop sa'l xa' ñee xa' mèn co' ñibe', no co' ndyoo ner, no co' ndyoo naa loo mèn nación Israel. Tac mèna mbli mandad no mdoodi'sle' mèna chele' chol mèn co ro le' Jesús nacque' Crist, ale co' chug mèn co' ñibe', no co' ndyoo ner, no co' ndyoo naa loo mèn nación Israel mèna le'n sinagog.

²³Por cona, ndxab xud mbyòo no xna' mbyòo loo mèna: Bnibdi's gu' loo mbyòo cón che'n mbyòo. Mbyòo ngoxle'.

²⁴Sya, ale mbere mèn co' ñibe', no co' ndyoo ner, no co' ndyoo naa loo mèn nación Israel, ngurez mèna mbi' co' ngòc sieu tedib vez. Ndxab mèna loo mbi' co' ngòc sieu: ―Fte'th Diox loo nu', ¿ché', lìcque', mbi' co' lèe Jesús mbli par mdyub xnìi ngudlool, cà'? Nu' indxela'sta. Tac nu' nanee le' mbi' co' lèe Jesús nac thìb mbi' co' ndxàp xtol.

²⁵Mcàb mbi' loo mèna. Ndxab mbi': ―Tyoxca, lìca; ba'se ne'needen ché' nac mbi' thìb mbi' co' ndxàp xtol, o ché' inacte mbi'i. Thidte con' naneen. No ndan cuent cón chenen anon co'se' ngóol daa, daa sieu. No nalle' ale ngüi'len.

²⁶Mbere mèna, mnibdi's mèna loo mbi' tedib vez. Ndxab mèna loo mbi': ―¿Cón mbli no mbi'a lùu? ¿Xá mod mbli mbi' par mdub mbi' xnìi ngudlool par ngüi'l nalle', à'?

²⁷Mbi' co' ngòc sieua mcàb loo mèna. Ndxab mbi': ―Na ya guniila loo gu' no indyub nzade gu' ne' ne' indli gu' cas co' guniin loo gu'. ¿Chonon lya's gu' beren tan cuent loo gu' tedib vez? ¿Ché' ndlya's gu' gàc gu' xin' mté'th mbi', ne, cà'?

²⁸Per co'se' mbìn mèn tataa ndxab mbi' co' ngòc sieu loo mèna, ngocloo mèna no ndxab mèna ngòc nguàal di's loo mbi': ―Lùu nac xin' mté'th mbi'a. Per part cón che'n nu', nu' nac xin' mté'th Moisés.

²⁹Nu' nanee le' Diox mdoodi's no Moisés. Per mbi'a, ne'neede nu' pá ned ngro' tee ngro' yáal mbi'a.

³⁰Mcàb mbi'a loo mèn co' ñibe', no co' ndyoo ner, no co' ndyoo naa loo mèn nación Israel. Ndxab mbi'a: ―Lìcpe' ba'i, ale xèe ngüi'en no xèe ñaan loo gu' tatua' mbez gu' loon no ne'ta'de gu' cuent pá ned ngro' tee ngro' yáal mbi'a. Per mbi'a mbli par mdyub xnìi ngudloon par ngüi'en. Ngolo cuent.

³¹Na' nda' cuent co' huenleque' le' Diox indyub nzade no indxònte Diox ro mèn co' ndxàp xtol. Ante ndyub nza Diox no ndxòn Diox ro mèn co' mbez Diox no mèn co' ndli co' nee lezo' Diox.

³²Axta huiz co'se' mtlo ngure izlyo' no axta huiz nalze tarte yath no yèn loo izlyo' ngo thìb mbi' co' ndli ndyub xnìi ngudloo thìb mèn co' ngóol sieu.

³³Chele' mbi'a ne'ngro'de loo Diox nec thìb con' ne'gácte mbi' li mbi', ngobe'en.

³⁴Per co'se' mbìn mèn co' ñibe', no co' ndyoo ner, no co' ndyoo naa loo mèn nación Israel tataa ndxab mbi' co' ngóol sieua loo mèna, sya, ndxàb mèna loo mbi' co' ngóol sieu: ―¿Lùu co' anon ngóol no huax xtol lùu ndlya's lu' nu', cà'? Xexte tee càa ned, byàa. Gro' trè'. No ale mzii mchep mèna mbi'. Mblo' mèna mbi' le'n sinagog.

³⁵Co'se' mbìn Jesús le' mèn co' ñibe', no co' ndyoo ner, no co' ndyoo naa loo mèn nación Israel mblo' mèna mbi' no mzii mchep mèna mbi' le'n sinagog, ngua cua'n Jesús mbi'. Co'se' mzyál' Jesús mbi', ndxab Jesús loo mbi': ―¿Ché' ndxela's lùu loo mbi' co' nac xgan' Diox, à'?

³⁶Mcàb mbi' loo Jesús. Ndxab mbi': ―Tad, gunee U' loon chó xa' nac xgan' Diox par yilazen loo xa'.

³⁷Mcàb Jesús loo mbi'. Ndxab Jesús: ―Lùu gunèele' xa'a. Daa co' ngue toodi's nol, leque yub daa nac xa'a.

³⁸Sya, yende izlyo' mdub xib mbi' co' ngòc sieua loo Jesús. No mcòo' mbi' yéc mbi'. Ndxab mbi' loo Jesús: ―Ndxelazen le' U' nac xgan' Diox, Tad.

³⁹Ngoloa, chàa, ngro' di's ro Jesús. Ndxab Jesús loo mbi'a: ―Daa ndal loo izlyo' ndxè' par tub rezen cón che'n mèn no par ta' mèn cuent xal nac mèn loo izlyo'. No ndalen par lin le' loo ryete mèn co' nac xal mèn sieu loo cón che'n Diox, daa li par tolo tyub xnìi yéc mèn no par tolo tyub xnìi lezo' mèn loo cón che'n Diox. No lin le' mèn co' nde'f di's co' ndli cuent anze'f ndxác mèn cón che'n Diox, mèna gàc xal mèn sieu loo cón che'n Diox.

⁴⁰Per ndxep mèn farise co' be' mbyan' con Jesús mbìn di's co' ndxab Jesús. Co'se' mbìn mèna di's co' ndxab Jesús, ndxab mèna loo Jesús: ―Tlate ñeel no nu' nac xal mèn sieu, ¿lé'?

⁴¹Sya, mcàb Jesús loo mèna. Ndxab Jesús: ―Chele' gu' ngàc xal mèn sieu loo cón che'n Diox, ne'ngàpte gu' xtol gu' loo Diox. Per com le' gu' mbez huen huen nda' gu' cuent cón che'n Diox, ¿lé'?, cona, ngue bezen loo gu', por derech, ndxàp gu' xtol gu' loo Diox.