SAN JUAN 9:14-35

¹⁴A̱ ntá tí ya̱on tꞌo̱kꞌéhe sín mé tsíkjichꞌéna chꞌín Jesús tí nche̱tꞌo̱ kjuínchekito̱exín jína tí chꞌín kꞌuékꞌikonhya.

¹⁵A̱ ntá tí sín fariseo xíkjanchankíhi sín chꞌán ínaá kíxin nkexrí kuíto̱he chꞌán jína tꞌikon chꞌán jie. Ntá kjuáte̱he chꞌán ntáchro chꞌán kíxin: ―Kuátematóxin chꞌán nche̱tꞌo̱ kua̱n, ntá kꞌontia kua̱n ntá jie tꞌíkua̱n ―ichro chꞌán.

¹⁶Ntá iso tí sín fariseo ntáchro sín kíxin: ―Tí chojni a jehya kuènte Dios kíxin chóntahya chꞌán kjuasáyé tí ya̱on tꞌo̱kꞌéheni ―ichro sín. Kjánchó ikjé sín ntáchro sín kíxin: ―¿Xá nkexrí chrókjuasin chꞌán kjuaxroan jié tí chónta chꞌán jie̱? ―ichro sín. Mé xi̱kaha jnkokónhya kjuenka̱yáxin tí jehe sín.

¹⁷Ntá xíkjanchankíhi sín tí chꞌín kꞌuékꞌikonhya ínaá kíxin: ―¿Ntá jaha nkechrua nkexro tíha tí nkexro kjuíntakꞌikuan? ―ichro sín. Ntá kjuáte̱he chꞌán ntáchro chꞌán kíxin: ―Janhan ntáxrja̱n kíxin jehe chꞌán mé ijnko nkexro chrónka itén Dios ―ichro chꞌán.

¹⁸Kjánchó tí sín judío kuítekakonhya sín kíxin chaxín kꞌuékꞌikonhya chꞌán ntá jie tꞌikon chꞌán. Ntá kꞌuíye̱he̱ sín tí itꞌé la ko tí ìné tí chꞌín tsíkito̱he jína.

¹⁹Kjuanchankíhi sín ntáchro sín kíxin: ―¿Á xja̱an tíhi tí ntáchrorá kíxin tí tsíkokjíexín chꞌán tꞌikonhya chꞌán? ¿Ntá nkexrí jie tꞌikon chꞌán? ―ichro sín.

²⁰Ntá kjuáte̱he tí itꞌé la ko tí ìné chꞌán ntáchro sín kíxin: ―Ó noheni kíxin xje̱enni chꞌán la ko noheni kíxin tí kokjíexín chꞌán tꞌikonhya chꞌán.

²¹Kjánchó noehyani nkexrí kíxin tꞌikon chꞌán jie la ko noehyani nkexro kjuínchekito̱he chꞌán jína. Tjanchankíhírá chꞌán, ó nte̱to chꞌán, ntá jehe chꞌán tsochrónka chꞌán kíxin nkexrí kuíto̱he chꞌán jína ―ichro sín.

²²Mé xi̱kaha kjuáte̱he tí itꞌé la ko tí ìné chꞌán kíxin chrako̱nhe̱n sín tí sín judío kíxin ó kjuixin chrónka tí sín judío kíxin tsjanjonhya sín kjuachaxin tsꞌixenhen ni̱nko tí sín titekaon kíxin chꞌín Jesús mé tí nkexro Cristo.

²³Mé xi̱kaha ntáchro tí itꞌé la ko tí ìné chꞌán kíxin chrókjuanchankíhi sín chꞌán, ó nte̱to chꞌán, ichro sín.

²⁴Ntá yóxin xíkꞌíye̱he̱ tí sín judío tí chꞌín kꞌuékꞌikonhya ntá kꞌue̱tue̱nhen sín chꞌán kíxin: ―Tjetsjehe Dios ntá ntoá chro̱nka kíxin ó noheni kíxin tí chꞌín a na chónta chꞌan jie̱ ―ichro sín.

²⁵Ntá tí chꞌín kꞌuékꞌikonhya kjuáte̱he chꞌán kíxin: ―Nonahya á chónta chꞌán jie̱ o̱ á chóntahya chꞌán jie̱. Jnkoko̱á nkehe nòna kíxin senó kꞌuékꞌíko̱nhya ntá jie tꞌíkua̱n ―ichro chꞌán.

²⁶Ntá xíkjanchankíhi sín chꞌán ínaá kíxin: ―¿Nkexrí kjuíchꞌe chꞌán kíxin kjuíntakꞌikuan chꞌán? ―ichro sín.

²⁷Ntá kjuáte̱he chꞌán ntáchro chꞌán kíxin: ―Ó kjuixin tjo̱nka̱rá kjánchó títekákonhyará. ¿Nkekuènté tjinkáonrá kíxin tso̱tjo̱nka̱rá ínaá? ¿Á kja̱xinrá tjinkáonrá tsochréhérá chꞌán? ―ichro chꞌán.

²⁸Ntá kónínkakonhen sín chꞌán la kꞌuántaxínhi̱n sín chꞌán la ko kjuáte̱he sín kíxin: ―Jaha la chréhé tí chojni a. A̱ ntá jeheni na chréhe̱ni tí nkehe kꞌue̱to̱an chꞌín Moisés.

²⁹Ó noheni kíxin Dios kꞌuénixje̱he̱ chꞌín Moisés. A̱ ntá tí chꞌín a la noehyani nketí tsíkji̱xi̱n chꞌán ―ichro sín.

³⁰Ntá kjuáte̱he tí chꞌín ntáchro kíxin: ―Imá ókjé tíha. Tí chꞌín a mé kjuínchekꞌikonna. A̱ ntá jahará ntáchrorá kíxin noahyará nketí tsíkji̱xi̱n chꞌán.

³¹Ó noheni kíxin tienhya Dios tí nkehe tjanchia tí chojni chónta jie̱. Jehó tinhin chꞌán tí nkehe tjanchia tí sín titekaon Dios la ko nchexiteyéhe̱ sín tí nkehe tjinkaon chꞌán.

³²Nunca kienhyéni kíxin ijnko nkexro chrókjuinchekꞌikon ijnko chojni tsíkokjíexín tꞌikonhya.

³³A̱ ntá tí nkexro a tí chrókui̱xi̱nhya chꞌán tí tjen Dios la kjá ninkehó nkehe xitjahya chrókjuichꞌe chꞌán ―ichro chꞌán.

³⁴Ntá kjuáte̱he tí sín fariseo ntáchro sín kíxin: ―Jaha la nchónhya jie̱ chonta tió kokjíha. A̱ ntá jie ¿á tjinkávan kíxin jaha chrókjuákohéni ní? ―ichro sín. Ntá kótéka sín tí chꞌín a kíxin tsꞌaxrjexín chꞌán tí ni̱nko a sátsji chꞌán.

³⁵Ntá kuínhin chꞌín Jesús kíxin xi̱kaha kꞌue̱tue̱nhen tí sín judío kíxin tsꞌaxrjexín ni̱nko tí chꞌín kꞌuékꞌikonhya. Ntá xeta chꞌín Jesús tí chꞌín a ntá kjuanchankí chꞌán kíxin: ―¿Á tinkachónkia tí Xje̱en Dios Kꞌóna Chojni? ―ichro chꞌán.