SAN JUAN 9:10-24

¹⁰Liꞌ nchcuane nguꞌ jiꞌi̱ yu: ―¿Ñiꞌya̱ ngua chaꞌ ndyaca tsoꞌo cloo nuꞌu̱ juani?

¹¹―Nu ñati̱ nu naa Jesús, biꞌ laca nu nguxaꞌ xi nanaꞌ chaꞌ ngutaꞌa̱ chu̱ꞌ scuaꞌ cloo naꞌ ―nacui̱ nu quiꞌyu biꞌ―. Loꞌo liꞌ ngulo yu biꞌ cña ꞌna chaꞌ tsaꞌa naꞌ caata̱ nde tojoꞌo Siloé, biꞌ chaꞌ ndyaꞌa̱ ndyaata̱ ca biꞌ; hora ti ngua tsoꞌo cloo naꞌ, tyaca̱ꞌ tsoꞌo ñaꞌa̱ naꞌ juani.

¹²―¿Ma nde ndyaa yu biꞌ? ―nacui̱ nguꞌ jiꞌi̱ liꞌ. ―Ná jlo tiꞌ naꞌ ―nacui̱.

¹³Ndyaa loꞌo nguꞌ jiꞌi̱ nu quiꞌyu nu ngua cuityi̱ꞌ biꞌ slo nguꞌ fariseo neꞌ laa.

¹⁴Tsa̱ nu ndiꞌi̱ cñaꞌ nguꞌ ngua biꞌ, tsa̱ tacati ngua nu loꞌo nguxaꞌ Jesús nanaꞌ biꞌ, nguaꞌni yu joꞌo jiꞌi̱ cloo nu cuityi̱ꞌ biꞌ.

¹⁵Loꞌo liꞌ nguxana nguꞌ fariseo, nchcuane nguꞌ jiꞌi̱ nu ngua cuityi̱ꞌ biꞌ: ―¿Ñiꞌya̱ ngua chaꞌ ngua tsoꞌo cloo nuꞌu̱? ―Ngutaꞌa̱ yu nanaꞌ chu̱ꞌ scuaꞌ cloo naꞌ ―nacui̱ nu quiꞌyu biꞌ―, liꞌ ndyaa naꞌ ndyaata̱ chcu, tyaca̱ꞌ tsoꞌo ñaꞌa̱ naꞌ juani ―nacui̱.

¹⁶Liꞌ ntsuꞌu xi nguꞌ fariseo nu nacui̱: ―Siꞌi slo ycuiꞌ Ndyosi ya̱a̱ nu Jesús biꞌ, biꞌ chaꞌ ná ndaquiyaꞌ yu tsa̱ taꞌa jiꞌi̱ nguꞌ. Loꞌo juaꞌa̱ ntsuꞌu xi xaꞌ ñati̱ nu nchcuiꞌ jiꞌi̱ yu ndiꞌya̱: ―¿Ñiꞌya̱ caca jiꞌi̱ yu biꞌ cuaꞌni yu cña tonu cuentya jiꞌi̱ ycuiꞌ Ndyosi si juaꞌa̱ ntsuꞌu tsa quiꞌya jiꞌi̱ yu? Ná stuꞌba chaꞌ nu nchcuiꞌ nguꞌ biꞌ jiꞌi̱ Jesús.

¹⁷Liꞌ xaꞌ nchcuane nguꞌ jiꞌi̱ nu ngua cuityi̱ꞌ biꞌ: ―Nuꞌu̱ ni, ¿ñiꞌya̱ chcuiꞌ ta nuꞌu̱ chaꞌ jiꞌi̱ yu biꞌ juani, chaꞌ cua nguaꞌni yu joꞌo jiꞌi̱ cloo nuꞌu̱? Liꞌ nguxacui̱ nu quiꞌyu biꞌ chaꞌ jiꞌi̱ nguꞌ: ―Sca nu cusuꞌ nu nda chaꞌ jiꞌi̱ ycuiꞌ Ndyosi loꞌo ñati̱, juaꞌa̱ laca yu biꞌ ―nacui̱.

¹⁸Ná jlya tiꞌ nu nguꞌ judío biꞌ, chaꞌ ca ñaꞌa̱ cuityi̱ꞌ nu quiꞌyu biꞌ loꞌo ngula, loꞌo nu juani tyaca̱ꞌ tsoꞌo xee ñaꞌa̱. Su ndye chaꞌ, liꞌ ngusiꞌya nguꞌ jiꞌi̱ nguꞌ cusuꞌ jiꞌi̱.

¹⁹Liꞌ nchcuane nguꞌ jiꞌi̱ nguꞌ cusuꞌ biꞌ: ―¿Ha sñiꞌ cuꞌma̱ laca yu re? ―nacui̱ nguꞌ―. ¿Ñiꞌya̱ ngua liꞌ? ¿Ha ca ñaꞌa̱ cuityi̱ꞌ yu loꞌo ngula yu? ¿Ñiꞌya̱ ngua chaꞌ ñaꞌa̱ yu juani?

²⁰Liꞌ nguxacui̱ sti xtyaꞌa̱ chaꞌ jiꞌi̱ nguꞌ fariseo biꞌ: ―Jlo tiꞌ ya chaꞌ sñiꞌ ya laca yu, jlo tiꞌ ya chaꞌ ca ñaꞌa̱ cuityi̱ꞌ yu loꞌo ngula yu ―nacui̱ nguꞌ―,

²¹pana ná nda ya cuentya tsiyaꞌ ti ñiꞌya̱ ngua chaꞌ ngujui xee nu ntsuꞌu cloo yu juani. Ná jlo tiꞌ ya tilaca laca nu nguaꞌni joꞌo jiꞌi̱ yu. Xcuane ma̱ jiꞌi̱ ycuiꞌ yu; cua tlyu yu biꞌ, ycuiꞌ yu taca ta liñi yu chaꞌ loꞌo ma̱.

²²Juaꞌa̱ nacui̱ sti xtyaꞌa̱ nu quiꞌyu biꞌ jiꞌi̱ nguꞌ, chaꞌ ntsi̱i̱ tsa nguꞌ jiꞌi̱ nguꞌ judío biꞌ; na cua nguaꞌni stuꞌba nguꞌ laca cña chaꞌ jiꞌi̱ nguꞌ loꞌo tyaꞌa nguꞌ chaꞌ culoꞌo nguꞌ jiꞌi̱ ñati̱ neꞌ laa, cua ñaꞌa̱ ca ñati̱ nu ñacui̱ chaꞌ Jesús laca Cristo, nu ñati̱ tlyu nu nda ycuiꞌ Ndyosi jiꞌi̱ lijya̱ chalyuu. Ngaꞌaa ta nguꞌ judío biꞌ chacuayáꞌ tsaa nguꞌ neꞌ laa liꞌ.

²³Biꞌ chaꞌ nacui̱ sti xtyaꞌa̱ nu ngua cuityi̱ꞌ biꞌ: “Xcuane ma̱ jiꞌi̱ ycuiꞌ yu, cua tlyu yu biꞌ”.

²⁴Tya ngusiꞌya nguꞌ jiꞌi̱ nu ngua cuityi̱ꞌ biꞌ chaca quiyaꞌ, loꞌo liꞌ lye nchcuiꞌ nguꞌ loꞌo: ―Chacuayáꞌ jiꞌi̱ ycuiꞌ Ndyosi, ta nuꞌu̱ chaꞌ liñi loꞌo ya juani ―nacui̱ nguꞌ jiꞌi̱―. Cua jlo tiꞌ ya chaꞌ ntsuꞌu tsa quiꞌya jiꞌi̱ nu Jesús biꞌ.