San Juan 9:10-19

¹⁰Naꞌra unabayaquëꞌ lëbëꞌ: ―¿Biz̃i baoꞌ ta belëꞌëloꞌ?

¹¹Naꞌra bequëbinëꞌ rëbinëꞌ leyaquëꞌ: ―Lëbenꞌ lao Jesús bënëꞌ gunꞌ blëpinëꞌn laohuaꞌ. Bëꞌ beyudyi blëpinëꞌ gunꞌ laohuaꞌ, naꞌra unëꞌ nëꞌëdiꞌ: “Uyo yetibi laoloꞌ luꞌu pozo nisa lao Siloé.” Biz̃i naꞌ uyaꞌa yetibaꞌ laohuaꞌ, canaꞌ gucaꞌ barlëꞌëdaꞌ.

¹²Naꞌra unabayaquëꞌ lënëꞌ: ―¿Ganaz̃i benꞌ naoꞌ canaꞌ? Naꞌra unëꞌ: ―Binezdaꞌ gala zionëꞌ.

¹³Naꞌra uquiëꞌyaquëꞌ benꞌ beyalo laohue psedyinyaquëꞌ lëbëꞌ ganꞌ nitaꞌ yaca benꞌ partido fariseo.

¹⁴Canaꞌ bëyaquëꞌ, danꞌ beyue Jesús laohue benꞌ naꞌ dza saodo, dza huezilaꞌadyiꞌ.

¹⁵Naꞌra pquëpiyaquëꞌ benꞌ beyalo laohue ca guca danꞌ belëꞌënëꞌ. Cani unëꞌ rëbinëꞌ leyaquëꞌ: ―Blëpiguëꞌ gunꞌ laohuaꞌ. Ude naꞌ uyaꞌa yetibaꞌn. Canaꞌ guca belëꞌëdaꞌ.

¹⁶Naꞌra una bala yaca benꞌ partido fariseo: ―Benꞌ naoꞌ bë canꞌ, binaquëꞌ benꞌ quie Diuzi, danꞌ bibënëꞌ bala dza huezilaꞌadyiꞌ quiero. Naꞌ biz̃i ibalayaquëꞌ unayaquëꞌ: ―Chi naquëꞌ benꞌ napa dulaꞌ xquia, ¿cabiz̃i guca bënëꞌ yelaꞌ huaca ta belëꞌë benꞌ niga? Canaꞌ guca unëyaquëꞌ diꞌidzaꞌ udeudela.

¹⁷Naꞌra unayaquëꞌ rëbiyaquëꞌ benꞌ beyalo laohue: ―¿Cabiz̃i naoꞌ luëꞌ quie benꞌ naoꞌ beyue laoloꞌ? Naꞌra unëꞌ rëbinëꞌ leyaquëꞌ: ―Nëꞌëdiꞌ rniaꞌ naquëꞌ benꞌ useꞌelaꞌ Diuzi. ―Canaꞌ unëꞌ rëbinëꞌ yaca benꞌ partido fariseo.

¹⁸Pero bigulecaziyaquëꞌ chi tali guquëꞌ benꞌ laochula. Naꞌ tacuenda yezacalao bi guca quienëꞌ, guz̃iyaquëꞌ xuzi z̃naꞌ benꞌ beyalo laohue.

¹⁹Naꞌra unabayaquëꞌ xuzi z̃naꞌ benꞌ naꞌ rëbiyaquëꞌ leyaquëꞌ: ―¿Z̃iꞌile ni unale nechula laonëꞌ cati uzutenëꞌ? Chi nale nechula laonëꞌ, ¿cómo barlëꞌënëꞌ naꞌa?