SAN JUAN 9:1-37

¹Joon lɨ gangɨ́ɨ¹i do nii²in jaain²¹ tsañʉʉ'¹ 'in nigangaai'¹³ tiui².

²Joon 'in tsá² ngɨ¹ɨ coon'¹³on do nigaunngɨɨ¹ɨ 'ido, joon nigajin'²in: ―Tɨfo'² tyii'i, ¿'ee lɨ' gangaa'¹³i 'in tsañʉʉ'¹ tiui²? ¿Xʉfo' røøi²¹ sáa³ jmɨɨ²¹ tsaa² 'ee sɨ' røøi²¹ 'ña'a no tsaa² 'ee?

³Joon gajin'² Jesús: ―Jo galɨ́² tiui² cwáain¹ tya' tsaa² tya'a 'ña'a jon'gɨ tsaa² tya' sáa³ jmii²¹; 'e galɨ́² tiui² 'wii'¹³ tya' coon'¹³ 'e la joon ilí² 'e'²e Dios tsá² jilaa'²¹ 'e lí² jmáa¹a.

⁴Ná¹‑a jmáa³aa to² tya' 'in gasii¹in jna mo jmɨɨ²¹² tsʉ najó²‑o 'e lɨ nʉʉ²¹ joon jo 'iin lii'¹gɨ jmá¹ to².

⁵La 'ɨɨ²¹² 'e taan¹na 'e fu juncwii²¹ lo lɨ́ɨ¹na jɨ́² coo²¹ 'e ni cwoo'¹³ juncwii²¹ lo.

⁶Joon mo ngayuui'¹³ gajin'²in 'e júu³ lo Jesús gañíi¹³i ni 'wó² joon gajmaa¹a xʉ capiléen³ jiin¹ coon'¹³ jmɨɨ²¹ 'e'²e. Joon gasoon²¹on unni² 'in tsá² tiui² do.

⁷Joon gajin'²in sɨɨ'²¹ɨ 'in tsá² tiui² do: ―Cwó², cworuun'¹³un unní²'i coon'¹³ jmɨɨ²¹ 'in 'o² tsi pila sii²¹ Siloé ―'øøi'²¹‑tsi tsá² 'e sii²¹, 'in gasii¹in do, coon'¹³ jmíi¹. Joon gangoo²¹‑o 'in tsá² tiui² do, niruun'¹³un unníi¹in joon mo gacɨɨ'¹³ɨ joon nijnaa'²¹o.

⁸Joon 'in tsá² née¹i tyan' lɨ tyíin¹in 'in tʉʉ² do coon'¹³ tsá² 'in niganíi²in 'in tiui do gajin'²in: ―¿Tɨ jon' 'ino 'in tsá² la mo tyíin¹in 'in mɨ¹ɨ caridad?

⁹'Inlɨ́ɨi¹³ gajin'²in: ―'Inoo do. 'Inlɨ́ɨi¹³gɨ gajin'²in: ―Jon' 'ino do, pe coonti‑i la joon jnée²i. Pe 'ña'a 'in tsá² do 'e noo²¹²ta tiui² gajin'²in: ―Jna‑a 'in tsá² ta tiui² do.

¹⁰Joon gaunngɨɨ¹ɨ 'in tsá² do: ―¿Xiiala lɨ 'e nijnaa'²¹o'o?

¹¹Joon ganii¹i 'in tsá² ta tiui² do: ―Jaain²¹ tsañʉʉ'¹ sii²¹ Jesús 'in gajmaa¹xʉ jiin¹ gasúun²un unní³ii, joon jin'²in sɨɨ'²¹ɨ jna²: “Cwó² fu lɨ náa¹ pila sii²¹i Siloé, joon roon'¹³'on unní²'i.” Joon gangoo²¹²oon joon mo garuun'¹³uun unní³ii do joon galɨ́² jnaa'²¹oo.

¹²Joon gaunngɨɨ¹ɨ 'in tsá² do sɨɨ'²¹ɨ 'in tsá² ta tiui² do: ―¿Náai¹³gɨ 'in tsañʉʉ'¹ do? Joon gajin'² 'in tsá² ta tiui² do: ―Jo ñii²ii naai¹.

¹³Joon 'in tsá² taai² do nijaa²¹²mo 'in tsá² ta tiui² do tyani tsá² fariseo.

¹⁴Pe jmɨɨ²¹² 'ii'¹ 'woo'²¹ tsá² 'e jmɨɨ²¹² 'e gaun'láa²i Jesús 'in tsá² tiui² do.

¹⁵'Wii'¹³ joon gaunngɨɨ¹ɨ 'in fariseos do 'in tsá² ta tiui² do xiiala galɨ́² 'e la no nilí²‑i jǿø²ø. Joon gajin'²in 'ido: ―Jiin¹in gasúun²un 'ido unní³ii mo ngayuui'¹³ joon joon garuun'¹³oo, 'wii'¹³ joon nijnaa'²¹oo la no.

¹⁶Joon 'inlɨ́ɨi¹³ tsá² fariseo jin'²in: ―'In tsañʉʉ'¹ 'in gajmaa¹a 'elo jo gajmaa¹a 'ii'²¹ tya' Dios tsʉ jo tsáai¹‑tsi jmɨɨ²¹² 'ii'²¹ 'woo'²¹ tsá². Pe 'inlɨ́ɨi¹³gɨ gajin'²in: ―¿Xiiala lí² jmáa¹a 'e li² milagro no wa'a røøi²¹ tsaa² tyi¹? Coon'¹³ la joon galɨ́² tún² poo²¹² 'ii.

¹⁷Joon gaunngɨɨ¹ɨ tún¹ 'in tsañʉʉ'¹ ta tiui² do: ―'Nʉ‑gɨ, ¿xiiala foo'²¹'o cwáain¹ tya' 'in tsañʉʉ'¹ 'in gacwo¹o unní²'i do? Joon 'i‑gɨ gajin'²in: ―Jna fo'³oo, jaain²¹ tsá² 'in cwo¹o júu³ tyʉ́² tya' Dios 'ido.

¹⁸Pe 'in tyʉ'² to² tsá² Israel jo jo'¹ mo lɨ́ɨ²mogɨ 'e ta tiui² 'in tsañʉʉ'¹ do ce gatø'¹o 'in sáa³ jmii²¹ 'in tsá² ni'láa²i do.

¹⁹Joon gaunngɨɨ¹ɨ tsacøøi'¹³ tya' 'in tsá² do: ―¿Tɨ 'ino‑o yʉʉn²¹ tyii' 'in ca la mo gangaa'¹³mo 'e foo²oo' nitiuu²mo? ¿Xiiala lɨ 'e la no nijnaa'²¹o?

²⁰Joon tsacøøi'¹³ tya' 'in tsá² ta tiui² do gañii¹i: ―Ne²oo'o 'e yʉʉn²¹ tyi‑oo'o 'ino, joon ca la mo gangaa'¹³i tiuu²mo.

²¹Pe jo né²e'e xiiala lɨ 'e la no nijnaa'²¹o. Jo mo la né²e'e 'iin gaun'lá² unníi¹i. Unngɨɨ¹ duu' 'ña'a no, tsʉ tsá² 'in nifee'¹mo no. 'Ña'a noo jmá¹a júu³ røø²¹.

²²Jmii²¹i gajin'²in la joon tsʉ 'wii'¹³ 'e 'goo'²¹‑o. Tsʉ 'in tyʉ'² to² tsá² Israel gasɨ́ɨ²i røø²¹ 'e jo cwo¹gɨ tsataa²i inʉʉ cwo'¹ sinagoga jileei'²¹ 'in jin'² 'e Cristo Jesús.

²³Tsu 'wii'¹³ joon gajin'² tsacøøi'¹³ tya'¹a: “Unngɨɨ¹duu' 'ña'a no, tsʉ tsá² 'in nifee'¹mo no.”

²⁴Joon gatø'¹ø 'in tyʉ'²ʉ to² tsá² Israel do 'in tsañʉʉ'¹ ta tiui² do, joon gasɨɨ'²¹ɨ: ―Sii'¹³ jna'a júu³ ja'²mo tyani Dios. Jna'a ne²oo'o 'e tsá² røøi²¹ tsaa² tyi¹ 'ino.

²⁵Joon gañii¹i 'in tsá² ta tiui² do: ―Jo ñí³ jna tɨ røøi¹ 'ino tsaa² tyi¹ sɨ jo røøi²¹ 'ee. Jiin'¹³ 'e ñí³ii 'e jna‑a tsá² ta tiuu²mo joon la no nijnaa'²¹oo.

²⁶Joon gaunngɨɨ¹ɨ 'in tsá² do tún¹: ―¿'Ee gajmaa¹a tyi'i? ¿Xiiala jmaa¹a 'e gacwo'¹o 'nʉ unni²'i?

²⁷Joon 'in tsá² ta tiui² do gajin'²in: ―Nifuu²¹²gɨ jna 'naa' joon jogɨ unjii²ii'. ¿'Ee lɨ' 'iin²¹²naa' 'e fo'³oo tún¹ 'e nifo'³oo do? ¿Tɨ 'iin²¹²naa' líin²naa' tsá² tya'a?

²⁸Joon 'in tyʉ'² to² tsá² Israel do gauntyíi²in 'ido joon gasɨɨ'²¹ɨ 'ido: ―'Nʉ‑ʉ, lɨ́ɨ²u'u tsá² tya' 'in tsañʉʉ'¹ do pe jna'gɨɨ'ɨ lɨ́ɨ²na'a tsá² tya' Moisés

²⁹tsʉ jna'a ne²oo'o 'e Dios nigafee'²¹mo Moisés pe 'in tsañʉʉ'¹ do jo né²e'e xiia fu seein²¹.

³⁰Joon 'in tsá² ta tiui² do gajin'²in: ―¡'Áa¹i tsa'góo²‑tsii 'e foo'²¹ 'naa' 'e jo ñí²ii' xiia' seein²¹ 'ido pe 'ido nigacwo'¹o jna unní³ii!

³¹Tyʉ́²‑ʉ né² jna' 'e jo unjíi²i Dios júu³ tyʉ́² 'e faa'²¹a tsá² røøi²¹ tsaa² tyi¹. Unjíi²i Dios jiin'¹³ júu³ tya' tsá² 'in un'goo²¹o 'ii joongɨ jmoo¹o 'ido jiin'¹³ 'e 'iin²¹²in Dios.

³²Jo mo lɨ sá² júu³ 'e galɨ́ jnaa'²¹a jaain²¹ tsañʉʉ'¹ 'in tiui² ca la mo gangaa'¹³i.

³³Wa' 'in tsañʉʉ'¹ no jo gasii¹in Dios 'ii jo 'e lí² jmáa¹a jiin'¹³ coon²¹.

³⁴Joon 'in tyʉ'² to² tsá² Israel gajin'²in sɨɨ'²¹ɨ 'in tsá² ta tiui² do: ―'Nʉ‑ʉ, 'in gangaai'¹³ coon'¹³ tsaa² tyi¹, joongɨ 'iin²¹²un 'e'³'e jna'a júu³ tyʉ́². Joon gatyii¹mo 'in tsá² ta tiui² do jee²¹² 'ii.

³⁵Joon galiñii¹i Jesús 'e gatyii¹in tsá² Israel 'in tsá² ta tiui² jee²¹² 'ii joon mo jiin'¹in Jesús 'in tsá² ta tiui² do joon gajin'²in sɨɨ'²¹ɨ 'ido: ―¿Tɨ jo'¹ lɨ́ɨ²u Jóon¹on Dios?

³⁶Joon gajin'² 'in tsañʉʉ'¹ do: ―Sii'¹³ jna 'iin²¹² 'i tsʉ joon jo'¹o lɨ́ɨ²na 'ii.

³⁷Joon gajin'² Jesús: ―'In niñíi¹mo 'nʉ 'i. Jna‑a 'i 'in sɨɨ'¹³u coon'¹³on.