San Juan 8:8-53

⁸Mag iekhapʉ̈iwia, deeu eeg ʉ̈thʉ oo sĩsiwi, ũwaai jẽb gaai jĩgkhẽúa phãpʉ̈i phãpʉ̈i oo sĩsijim.

⁹Mag chi ʉʉi waiberr khʉʉnau Jesuu amachig mag iekhabapʉ̈im ũrbaawai jöoiraacharam khʉʉnta nacha ökhar ããbdö wët ahaugmamua tagam khʉʉnjã khĩrab ërëudubjierram. Ãba chi ʉʉi appaita maba aig sĩsijim. Mag ya amach numpai aadeewaita

¹⁰deeu dʉnʉʉunaa chi ʉʉiragta, —¿Jam nʉ pʉ aiberr khʉʉn? ¿Ãbmuajã pʉ mokou barba ërëubaadëjĩ? ajim.

¹¹Magbaawai chi ʉʉirau, —Ʉ̈ʉ̈, ni ãbmuajã mʉ chig abajimgui ajim. Magbaa deeu ich Jesuupai irig, —Muajã pʉ chig abam. Petá, pari jãimua oob tag pʉch jaai khabam dʉ̈i khapes amgui ajim irig.

¹²Mag khur deeu aig õor narr khʉʉnag Jesuu magjim: —Mʉʉta mʉg durr gaai wënʉrrʉm khʉʉn atheem õtdauu; chi mʉ dʉ̈ita nʉrrʉm chan tag bʉ̈ʉrjã khĩchag ee nʉrrabamgui ajim, mʉchdëuta i iiupinaa Ẽwandam khĩirjugjã khaugpi chiraawai.

¹³Magbaawai chi fariseonaanau irig magjierram: —Puan pʉchdëupaita wir aig pʉch jaau sim. Jãg pua jaau sim chan bʉ̈ʉrjã baleeba simgui ajierram, pʉchdëupaita pʉch jaau sĩewai.

¹⁴Magbaawai Jesuu amag magjim: —Muan mʉchdëupaita mʉch jaau chirab mamʉ, mua nem jaau chirʉmʉn chadcha balee simgui ajim. ¿Khan jãgwi mag chirʉ́? Mua mʉch bëetarr khaphʉnaa mʉigmua petaau mʉch chiraimajujã mua khaphʉ chiraawaita mag chirʉmgui ajim. Pari pãach iekhõoin pãachdëun chad mʉ khaugba nʉmta mag mʉ jaau naabma ajim jũrr amag.

¹⁵Pãraun pãachdëu oowai magjöo abaawaita sĩi pãach khĩirjug eemuapaita mag chikham jaaujemgui ajim. Pari mua pãar dënjö sĩi mag õor jaauba chitʉmgui ajim.

¹⁶Muata õor jaau chirakhiin, sĩi mʉch appaimuata jaau chirʉm khaba aawai muan chadcha nem agchata jaaujugui ajim, ich mʉ pʉ̈itarrauta mʉ ipierr jaau sĩewai; ajapcharan ich mʉ Ayauma.

¹⁷Pãrag Moiseeu ley phã pʉarr gaai jaauwai, “Destignaan numiim khʉʉnauta chadcha nem ãba jaau nʉmʉn, makhʉʉnau jaau nʉm chadcha balee sim” a sim.

¹⁸Mag ley gaai destignaan numiim khʉʉnauta ãba jaauju aai nʉm a sĩewai, maar chi jaau nʉm khʉʉnjã numí naabahab: Dau ãb, mʉchpaiu; maimua ãbakhai, mʉ Ayaugui ajim, chi mʉ pʉ̈itarr. Magua mua mʉch igwia mʉʉta mʉg durr gaai wënʉrrʉm khʉʉn athee õtdauu aawaijã chadcha balee simgui ajim, mʉch Aai dʉ̈imuata mag jaau chiraawai.

¹⁹Magbaawai chi fariseonaanau, —Magan ¿jam sĩ pʉ aai? ajierram irig. Magbaawai Jesuu, —Pãrau chan mʉjã khaugba, ni mʉ Aaijã khaugba nʉmgui ajim. Pãrau mʉ oo naawai mʉ khaphʉ naakhiin, ĩchab mʉ Aaijã khaphʉ naakhamgui ajim, i jãga sĩerrʉ́.

²⁰Jesuu mag iekhamarr, Aai i jëeujem deg ofrenda phëwi ag ãkhaajem aigta mag iekhamajim, ichpai jaau simua. Pari agtha i pʉr auju ed khaba arr aawai mag ichpai jaau sĩerr gaaimua i pʉr aum ig narrjã ãbmuajã i pʉr aubajim.

²¹Maimua ag khur nʉʉpai awi deeu ich Jesuupai aig narr khʉʉnag magjim: —Mʉ petaawai pãrau mʉ jʉrju, pari ãbmuajã mʉ baaubamgui ajim. Pãarta pekau ee wënʉrrʉmʉn, ich ag eepai pãar khëchwi mʉ mam aarjã pãar pöd barbamgui ajim.

²²Mamʉ irua mag simjã khaugba, chi judionaanau warag amach khapeenagta, —¿Wa juau ichdëupai ich thõopʉ̈iju khĩirju sĩewaita mag i sĩeimam aar pöd maach barbaju a sĩwa? aajeejim.

²³Pari sĩi warag mag khaugbata jaau nʉm ũrwia Jesuu amag magjim: —Mua pãrag mag chirʉmʉn, pãar mʉig eegarm khʉʉn aawai ich mʉig eegarpai nʉisijuuta jaau chirʉm. Pari mʉ ʉ̈gtharm aawai deeu mʉch chirarr aar majugui ajim. Magnaa amag, Pãar mʉg jẽb gayam khʉʉn khabahab, pari mʉ chan pãarjö mʉg jẽb gayam khabamgui ajim.

²⁴Maguata pãrau mʉʉta ich Ẽwandamau pʉ̈iju a jaaujerr khabampii awia mʉ igbam chan, chaig mʉchdëu jaau chirarrjö, pãach pekau eepai khëchwi mʉ mam aarjã pãar pöd barbamgui ajim amag.

²⁵Mag ũrwia chi judionaanau ichigcha, —¿Magan pʉ khaíuma? abaawai, ich Jesuupai deeu amag iekhamamua magjim: —Ya mua pãrag mʉch jaaujeewai, ¿khan atcha tag mua jaaubarju? ajim.

²⁶Mʉch garmuan mua pãar jaauju akhiin, jaauju pöoma chirʉm. Mamʉ magʉmta jaauba, ãba chi mʉ pʉ̈itarrau jaaupitarrpierrpaita jaau chitʉmgui ajim. Pãrau mʉ iek ʉ̈khamapha naab mamʉ, mua jaau chirʉmʉn thum chadcharaugui ajim, chi mʉ pʉ̈i simjã chadchata iekhaajeewai.

²⁷Pari mag ich Aai igwia par jajaaukhamjã pöd khaugbajierram. Mag ichdëu jajaaukhamjã khaugba abaawaita

²⁸amag magjim: —Jãg nʉʉ awia ya pãachdëucha mʉch chi Emkhooi Iewaa pakuls gaaicha meerphënaa jiirjop sĩubaawaita pãrau mʉ igwia, “Jãgan chadchata ich Ẽwandamau pʉ̈iju aajerr ajiebma, jãguata jãg sĩi ich khĩrau nem wauba aajeejim” ajurau. Maiguin chadau pãrau khaphʉ ajugui ajim, mua ãba mʉch Ayau mʉchig jaaupimampaita õragjã jaaujerr.

²⁹Ich chi mʉ pʉ̈i sim mʉ dʉ̈i sĩewai, mua mʉch Ayau nem khõsimpaita waaujeewai irua sĩi mʉrʉg oobamjöo aba aajemgui ajim.

³⁰Jesuu mag iekhabarm ũrwia õor pöm i iek ʉ̈khajierram.

³¹Maimua ich Jesuupai judionaan mag ich iek ʉ̈khatarr khʉʉnag magjim: —Pãarta jãg cha mua jaau chirʉm iek pãachdëu ʉ̈khabarmta ogdʉba ich mag mʉ ipierr wënʉrrʉmʉn, magan chadcha pãar mʉ khapeenaugui ajim.

³²Mag amʉn magan chadcharam iekta pãrau khaugju. Mag chadam iek pãachdëu ʉ̈khabarmua ya tag pãar chikham chogkhaba nʉisijugui ajim amag.

³³Magbaawaita jũrr tagam khʉʉn agjö aig narr khʉʉnau, —Maran jöoi Abrán chaain ewagam khʉʉnau; maar mag sĩi chikhaman chognaanjã khaba nʉmgui ajierram. Mag nʉmta, ¿jãga pʉ iek mag pʉ iek ʉ̈khabarmuata tag chikham chogkhaba nʉisiju a sĩ? ajierram irig.

³⁴Magbaawai Jesuu jũrr amag, —Ar pekau waaujem khʉʉnan chadcha thum pekau chognaanaugui ajim.

³⁵Pãrau khaphʉ nʉm, sĩi chikham chogkha phidkha sim chan, ich phidkha sim degam khʉʉn chaai khaba aawai, am dʉ̈i sĩerram iek sĩerraba aajem. Pari chi dikhʉ chaai magba, thaababarwe am chaaikha sĩsierr ich mag am dʉ̈i sĩsiejemgui ajim.

³⁶Pekaúa pãar ich chognaanjö wai simta mʉch chi Ẽwandam Iewaauta mag pekau jua eemua pãar öbeer athamʉn, ya tag i chog khaba, chadcha öbërm iekta öbër nʉisijugui ajim.

³⁷Magnaa, Mua khaphʉ chirʉmgui ajim, pãar Abrán chaainkha nʉm. Pari mag i chaain anʉmta pãachdëu mʉ iek ũrmapha nʉm gaaimua warag mʉ thõopʉ̈imjã khõsi nʉm.

³⁸Muan mʉch Aai dʉ̈i chiraawai i dʉ̈i khaugtarrta pãrag jaaujem. Maagwai pãraujã ich agjö pãach ayau pãachig jajaaukhamta waaujemgui ajim.

³⁹Magbaawai deeu amachdëu, —Maar ayan Abranaugui ajierram. Mamʉ magbaawai ich Jesuu amag, —Pãachdëu jaau nʉmjö pãar chadcha Abrán chaain akhiin, ich Abranau aajerrjöta pãraujã aajeekhamgui ajim.

⁴⁰Pari magba aawai ich Ẽwandamaucha mʉchig jaautarrta meerba jaau chitaawaijã pãrau warag mʉ thõopʉ̈im khõsita aajemgui ajim. Abranau chan jãg pãar dënjö chikham thõoju ẽkhaba aajeejimgui ajim.

⁴¹Magnaa, Pãar chan Abrán chaain khabamjöta nʉmgui ajim. Maguata jãg pãach aai chi ãbakhaíu nem waaujemjöta pãachdëujã aajemgui ajim. Magbaawai amachdëu sereu phöbaadëwi, —Maar chan noo chaain khabam. Maran aai ãbpaita wai nʉmgui ajierram: Ẽwandam. Ẽwandamta maar Aai charaugui ajierram.

⁴²Magbaawai Jesuu magjim: —Chadcha Ẽwandamta pãar Aai akhiin, pãrau mʉjã daupii wai naakhamgui ajim, ich Ẽwandamau pʉ̈iwiata cha pãar dʉ̈i mag iekha oo chiraawai. Mʉ chan sĩi mʉch khĩrau bëetarr khabam; mʉʉn ich Ẽwandamaucha ich aarmua pʉ̈iwiata mʉg chitʉmgui ajim.

⁴³Mag ijẽjẽbagmamua ich Jesuupai amag, Mua khaphʉ chirʉmgui ajim, jãgwi pãrau pöd mua jaau chitʉm iek khaugba nʉ. Jãg khaugba nʉmʉn, pãachdëu ũrmaphamjö ũr naawaiugui ajim.

⁴⁴Magnaa amag, Pãar aai mepeer khabahab ajim. Maguata pãar i dënkha naawai irua nem jajaaukhamta waum khõchkhaajerram. Mepeer warrgarwe õor thõomie khabahab ajim. Irua nem jaau sim chan bʉ̈ʉrjã chadam iek khabamta jaau sĩerrʉm. Irua chadcha nem jaautarr chukhum. Jãg irua sëukha nem jaauwai ich khapta jaauba aajeeb ajim, sëunem sĩerraawai. Magua ichta sëu paraam khʉʉn aaikha sĩerrabahab ajim amag.

⁴⁵Pãach mag i chaainkha naawaita mua chadcha nem jaau chitʉmjã pãrau ʉ̈khaba nʉmgui ajim.

⁴⁶Pãar mʉg thʉnʉm ee, ¿khaíu bʉ̈ʉrjã sëukhaba mʉrʉg, “Pʉ pekau wai sim” aju aai sĩ? ajim amag. Mʉ chan bʉ̈ʉrjã pekau chukhu chitʉmgui ajim. Mag chitaawai muan chadcha nem agchata jaau chitʉm. Pari magʉmjã ¿jãgwi pãrau ʉ̈khaba aajemma? ajim.

⁴⁷Ar chadcha Ẽwandam chaainkha nʉm khʉʉnaun i iek õrau jaau nʉm ũurwaijã ʉ̈kham khõsi ʉ̈khaajerram. Pari pãar Ẽwandam chaain khaba aawai pãrau i iek ʉ̈khaba nʉmgui ajim.

⁴⁸Mag amachig, “pãar chan Ẽwandam chaain khabamgui” abaawai, chi judionaanau irig, —Chadchata pʉʉn jãgan Samariapierrau, maimua dösãtauta pʉ pör meu sĩebahab ajierram ichigcha.

⁴⁹Magbaawai Jesuu, —Mʉ dösãtau pör meuba chirʉmgui ajim. Mʉg chitʉm aiguin mʉʉn sĩi mʉch Aaita thö iekha chitʉm. Pari maagwai jũrr pãrau mʉ Aaijã ögkhaba, warag mʉchta dösãtaujã pör meu chirʉm aajemgui ajim.

⁵⁰Mʉ Ayaun chadcha õraujã mʉrʉgta ee apim khõsi sĩeb mamʉ, mʉchdëu chan mʉrʉgta ee abat aba chitʉmgui ajim. Pari jãg pãrau mʉ iseg nʉm paran ichdëuta pãar dʉ̈i ichdëu khap ajugui ajim.

⁵¹Magnaa, Ĩs mua chadcha chi mua jaau chirʉm ipierraa sim woun chan thõbaju a chirʉmgui ajim ich Jesuu.

⁵²Pari magbaawai chará chi judionaanau, —Ĩsta chadcha marau wajapha pʉ khaphʉ nʉm: Pʉʉn chadcha pör ee dösãt wai simuata mag iekhapi simgui ajierram. ¿Khani Abranjã meewia maimua tagam khʉʉn agjö Ẽwandam i jaaujerr khʉʉnjã thumaa ötarrta mag pʉ ipierraa nʉm khʉʉn chan khëchbaju a nʉ?

⁵³¿Wa pʉʉta maar aai Abrán khararr khãaijã atcha chirʉ́wa? ajierram. ¿Pua khaugbata sĩ ajierram, Abrán meewia tagam khʉʉn chi Ẽwandam iek jaaujerr khʉʉnjã thum ötarr? Magtarrta, ¿pʉ khai agá ajierram irig, mʉig maar ee mag pʉch thö iekhacheeg?