SAN JUAN 8:7-25

⁷Quendi se retumarune se ihyan. Na̱n mena̱n ne, ndevandi cua̱co ye, ne ra̱hn ye ri ye sa̱hn: ―Adecochano nchuhn che metah nunde yahn ne ne, ca̱h ne tu ta̱hn.

⁸Chihno ra̱hn ye ne, ndaconan ndondih ye, ne quendi ye redirun ye ndiya̱hn.

⁹Chi cuihna̱n sa̱hn chahn che tihca̱ ra̱hn ye ri ye sa̱hn, te a devano se te chendihco se nunde, ne cana̱n ndiquenda̱h vah ca a̱ma ca a̱ma se, cona̱hn se, mena̱n vihca sa̱hn che tahque ndico chahn. Cuahn che a chihno cona̱hn se ne, a dema̱n ta̱hn nda̱hta me, nti te min.

¹⁰Tuhme ndevandi cua̱co Dihvo vo, ne tumerune ye ta̱hn: ―¿Tiya sa̱hn chahn che rih nunde se yehn ne? ¿A nde a̱ma se hua quendi se rih nunde se yehn ne?

¹¹Ndaconan te yahn ye, ne ra̱hn te: ―Hua Dihvé, nde a̱ma se. Tuhme ra̱hn ye ri ye ta̱hn: ―U ne, nchahcó nunde yehn. Ma̱n ne, conahn. Ametah ndaconan ndere cochique condihque nunde.

¹²Ta̱ma yune ne, ricuahn Dihvo vo ihyan, ne ra̱hn ye: ―U ne, anduhneca̱ a̱ma ya̱hn che ri ro dave na̱n ihyan iyehnse. Chemin che ihyan che ritahno ye u ne, conahn ye ndudo yáhn, ne ndedeváhn ihyan, cuahtenan ye vahchetero.

¹³Tuhme ra̱hn sa̱hn fariseo chahn ri se ihyan: ―Ndih ne, rendonan ma̱n ne ndih. Chemin ne, hua cochihve yahn ne.

¹⁴Ndahconan ye, ne ra̱hn ye ri ye sa̱hn: ―Ndudo che renté ne, cua̱co, andahre ra̱hn nchuhn che rendonan má̱n u, te u ne, devanó ti chicá ma̱n, ti ná̱hn ma̱n. Ate nchuhn ne, hua devano ne ti chicá nde huane ti ná̱hn.

¹⁵Nchuhn ne, ra cuande ne ihyan nduhca̱ costumbre yahn ne, renda̱hchenan ne ihyan. Ate u ne, hua renda̱hchenán nde a̱ma ihyan.

¹⁶Me cuahn che retecheca̱dé ne, retecheca̱dé numa cua̱co, te retecheca̱dé da̱ma nduco Chidá, ihyan min che dechuh ye u, ndiyu demá̱n.

¹⁷Na̱n ley che rendihchenan nchuhn ne, rihquentiyon che, cuahn che va o testigo che ra vih ndudo yahn ye, ra̱hn ye che cua̱co ne, va che cotahno vo che ra̱hn ye.

¹⁸U ne, rá̱hn ndudo cua̱co yahn ntiyon yáhn. Me Chidá che dechuh ye u ne, namin ra̱hn ye yahn.

¹⁹Tuhme tumerune sa̱hn chahn ihyan, ne ra̱hn se: ―¿Ti va chida ne ne? Ndahconan ye yahn se, ne ra̱hn ye: ―Nchuhn ne, hua renahn ne yahn vederihquentiyon che quenan cumá, nde hua rendihche ne Chidá. Nducote hua renahn ne yahn vederihquentiyon che quenan cumá ne, chemin che hua rendihche ne Chidá.

²⁰Tihca̱ chicuahn Dihvo vo chete ya̱co, na̱n che va yave yahn tume vedino. Ate nde a̱ma sa̱hn chahn, hua din se preso ihyan, yahn che metah nda̱ ura che ndihco ca̱de Dendiohs.

²¹Ndaconan ra̱hn Dihvo vo ta̱ma yune nduco ihyan tuhca̱: ―U ne, ná̱hn, ne nchuhn ne, nuhn ne u, ate hua nta̱ca ne u. Conda ne, din nunde yahn ne, te na̱n che ná̱hn ne, hua co nda̱ ne.

²²Tuhme ra̱hn sa̱hn ndina̱n chahn va̱n ma̱n se nduco vih: ―¿A ca̱hno ma̱n ihyan tih ihyan, che tihca̱ ra̱hn ye che na̱n che ca̱hn ye ne, hua co nda̱ vo ne?

²³Ra̱hn Dihvo vo ri ye sa̱hn: ―Nchuhn ne, ihyan iyehnse nchuhn. Ate u ne, vahchetero chicá.

²⁴Chemin che rá̱hn rí nchuhn che conda ne, din nunde yahn ne. Tihca̱, te ndete che hua cotahno ne che u, ihyan min che a va ca̱de che chi ye ndedevahn ye ihyan iyehnse ne, conda ne, din nunde yahn ne.

²⁵Tuhme tumerune sa̱hn chahn ihyan: ―¿Duh ndih ne? Ndahconan ye, ne ra̱hn ye ri ye sa̱hn: ―A rá̱hn rí nchuhn nde a ra̱hn me.