San Juan 8:6-21

⁶Yejwah ijkó okilijkeh para kitaskeh tlan kichiwas, iwa ijkó kipiaskeh tlan ika kiteiliskeh. Ijkuakó Jesús omotolo iwa opé tlajkuiloa ixko tlali ika imajpil.

⁷Pero kemi okachi okitlatlajtlaniayah, Ye omoyékketski iwa okijto: —Tla aka de nomejwah amo kipia tlajtlákoli, ye achto makimotla ika tetl.

⁸Jesús oksepa omotolo iwa ok otlajkuilo ixko tlali.

⁹Keman okikakeh tlan Jesús okinmili, se por se oyayajtiajkeh. Achto oyayajkeh non okachi ya wewemeh, iwa ijkuak nochteh yoyayajkeh, sa Jesús omoka iselti iwan siwatl.

¹⁰Ijkuakó, Jesús omoyékketski iwa kemi ayakmaka okitak, okitlajtlani n siwatl: —Siwatl, ¿kanin kateh non omitsteiliayah? ¿Amaka omitstlajtlakolti?

¹¹N siwatl okili: —Nion se de yejwah Noteko. Ijkuakó Jesús okili: —Nion Ne omitstlajtdlakolti. Xio, iwa ayakmó oksepa xitlajtlakolchiwa.

¹²Jesús oksepa okintlapowi iwa okinmili: —Ne nitláwili itech nin tlaltíkpaktli. Akin wits nonawak, kipias n tláwili non kimakas nemílistli iwa ayik nemis kan tleyua.

¹³N fariseos okilijkeh: —San Te monewia timotenewa akin te, yika, tlan tikijtoa mach itla ipati.

¹⁴Jesús okinnankili: —Maya Ne nonewia nimotenewa Akin Ne, tlan nomechilia milák, porke Ne nikmatok kan oniwalewak iwa kan nio. Pero nomejwah amo nonkimatih kan oniwalewak nion kan nio.

¹⁵Nomejwah nontetlajtlakoltiah kemi kichiwah n tlaltikpaktlakah. Ne amaka niktlajtlakoltia.

¹⁶Pero tla Ne nitetlajtlakoltia, nikchiwa ika tlan milák, porke amo san Ne noselti nitetlajtlakoltia, yej Ne iwan Notajtsi Dios akin onechaltítlanki.

¹⁷Itech nomotlanawatil ijkuilitok, sanwel kiseliskeh intlajtol ome iwa amo san se.

¹⁸San Ne nonewia nimotenewa akin Ne, iwa Notajtsi Dios Akin onechaltítlanki, noiwa nechteixmatiltia akin Ne.

¹⁹Yejwah okitlajtlanijkeh: —¿Kanin kajki Mota? Jesús okinnankili: —Nomejwah amo nonnechixmatih, nion nonkixmatih Notajtsi, tla nomejwah nonnechixmatiskiah, noiwa nonkixmatiskiah Notajtsi.

²⁰Ninteh tlájtolteh Jesús okimijto ijkuak otlamachtijtoka itech n Weyi Tiopa kan ik okatka n kaxajtomij. Pero amaka okikitski porke ayamó oajsia n tonati para kikitskiskeh.

²¹Jesús oksepa okinmili: —Ne nias, iwa nonnechtemoskeh, pero nonmikiskeh itech nomotlajtlakolwah. Yika, kan Ne nias, amo weletis nonyaskeh.