San Juan 8:6-17

⁶Uspane sun mɨmaara, ussa kwail kizninna, ussa mikwa iztukin kwail kizninna. Suasne Jesúsne wain kit pul pilta chihtɨ tɨppukasa pamɨzta.

⁷Ussa mɨmaamɨztuasmin, Jesúsne nil sat kit kaiznara: —¡Uruztas chinkas kwail kitchimikane ussa an ñanchain uk kirain!

⁸Mamasa wain kit pul pilta pamɨzta.

⁹Jesús kaizta aizpa mɨarawane, uspane uspa kwail kiarɨt aizpa minñara. Ɨlaparuzne an ñancha maza mazain puzat kit ashamparas ɨamɨzta. Wan ɨarawane, Jesúsmin sun ashampakasain sua nukkulta.

¹⁰Suasne Jesúsne nil sat kit ussa mɨmara: —Ashampa, nua kwail kirɨt kizturuzne ¿mɨntama purai? ¿Mɨnminkas nua kwail kirɨt kiztuchiki?

¹¹Usne ussa sɨnkara: —Anpat, mɨnminkas nawa kwail kirɨt kiztachi. Jesúsne kaizta: —Nane nu kwail kirɨt aizpa watkulnintus. Ɨt kit an kwail kimun.

¹²Jesúsne mamasa paranat kit Fariseo awaruza kaiznara: —Nane impilkanain ish, wan awaruz uspa kaijchukin minñamtu aizpa kai piankamanapa. Nawa kanpararuzne ap kammuruz namanazi. Tɨlta chaamtuchi akwa, nane usparuza uzninnanash. Sun kai impil izarawane, uspane Dioskasa wat uzanazi.

¹³Sun mɨarawane, Fariseo awaruzne kaizara: —Nune up minpain paramtu. Nuin kaiztu aizpa kainsɨh i.

¹⁴Jesúsne sɨnkanara: —Nain paramtukas, na kaizta aizpa watcha i. Nane mɨntas at pianish. Mɨnta ɨmtukas pianish. Une na mɨntas amtukas mɨnta ɨmtukas pianchimai.

¹⁵U na kimtu aizpa izamtukas, une awakanain minñat kit na kwail kimtu kizamtu. Nane mɨnainkas kwail kirɨt kiztuchish.

¹⁶Mamazta kwail kirɨt kiztakas, na chiwazha kiztu aizpa watcha i. Nain mamazta kwail kirɨt kiznamtuchish. Nakas, ap Taitta nawa ɨninmikakas, awara kwail kiarɨt kiztuas.

¹⁷Sun pit uruza ɨnintu aizpa sunkana parɨt: “Paas awane kawarain nɨjkulkane, uspa kaizta aiza watcha i.”