San Juan 8:5-25

⁵Tji¹tˀa³ cjoa⁴te¹xo³ma³-le⁴ Moisés nca³ coa⁴sen²-le⁴² la⁴jao⁴ cho⁴ta⁴ xi³ cˀoa⁴sˀin¹. Jo¹ si³ nca³ ji³.

⁶To⁴cˀoa⁴qui³tso² nca³ qui³sco²tˀa³ Jesús, jme¹-ni³ nca³ coan⁴-ni³le⁴ nca³ coa⁴²nqui³. To⁴nca³ Jesús tsa³ca³sen²nia³, qui³squi³-ni³ na⁴jma¹ntsja³ ja⁴tˀa³na³nqui³.

⁷Cˀia⁴ nca³ to⁴jo³ qui³tsin²na³nqui³-sa³le⁴ Jesús qui³sa³sen³qui²xi⁴-ni³ qui³tso²-le⁴: Je² nca³ jon² xi³ tsin²-le⁴ je¹-jin², je²-vi⁴ xi³ ti¹tjon² ca²ta³sen¹-le⁴ la⁴jao⁴ chjon⁴²-ve⁴.

⁸Nqui²ntia³ tsa³ca³sen²nia³-nca¹ni³, qui³squi³ ja⁴tˀa³na³nqui³.

⁹Cho⁴ta⁴ qui³nčhˀoe¹-le⁴, cˀoa⁴ coan³soa³-le⁴. Jnco¹jnco¹ ji³tjo³, va³se²tsˀia⁴cjoan²-ni³ xi³ jchi¹nca³ sa³ˀnta³ xi³ ma³ˀnti¹. Tsa³cˀe²jna³ to⁴je² Jesús cao⁴ chjon⁴²-ve⁴ xi³ ti¹jna³jin³va³sen³.

¹⁰Qui³sa³sen³qui²xi⁴-ni³ Jesús, tsa³ve³ nca³ li²ˀya³ xi³ ti⁴ya⁴ tjio¹-ni³ to⁴je²-sa³ chjon⁴²-ve⁴, qui³tso²-le⁴: Chjon⁴², jña¹ tjio¹ xi³ tsa³ca¹nqui³-li². A³ tsi² ˀya³ xi³ tsa³cˀaon³ne²-li² cjoa⁴ñˀain³.

¹¹Chjon⁴²-ve⁴ qui³tso²: Señor, ni⁴ˀya³-jin². Cˀia⁴ Jesús qui³tso²-le⁴: Cˀoa⁴-ti⁴ an³ li²coi³ cˀaon³ne²-le²³ cjoa⁴ñˀain³. Tˀin³, a³li² ti⁴je¹-jin² vi³jnchi³-ni³.

¹²Jesús cˀoi⁴qui³tso²-nca¹ni³le⁴ cho⁴ta⁴ fariseos: An³ nia¹³ lˀi¹ xi³ si¹ˀi³sen³ son³ˀnte³. Je² xi³ fi²tˀa³-na³ li²coi³ cˀoa¹mjen³ jña³ nca³ njion², to⁴nca³ sˀe⁴-le⁴ je² lˀi¹ xi³ tsjoa¹ cjoa⁴vi³-jna³chon³.

¹³Cˀia⁴ cho⁴ta⁴ fariseos cˀoi⁴qui³tso²-le⁴: Ji³ vˀai²³ en¹-li⁴ xi³ to⁴tˀa³tsi⁴-ni¹, to⁴nca³ li²coi³ cjoa⁴qui²xi⁴ en¹-li⁴.

¹⁴Qui³nchja⁴ Jesús cˀoi⁴qui³tso²-le⁴: Nta³ tsa² an³ tsjoa³ en¹-na⁴ xi³ to⁴tˀa³tsˀan⁴, je² en¹-na⁴ cjoa⁴qui²xi⁴-ni¹, nca³ ˀve³ jña³ nca³ ja²ˀai⁴-nia³, cˀoa⁴ jña³ nca³ cjoia¹³, to⁴nca³ jon² li²coi³ ˀyao³ jña³ nca³ ja²ˀai⁴-nia³, cˀoa⁴ jña³ cjoia¹³.

¹⁵Jon² cˀoa⁴-sˀin² cho¹son²-ni³lao⁴³ jo³ cjoan³ cho⁴ta⁴ jo³-sˀin² cho²tsen³-lao⁴³, to⁴nca³ li²ˀya³ xi³ an³ cˀoa⁴-sˀin² co³son²-ni³le⁴.

¹⁶Tsa² an³ co³son²-ni³le⁴, ña³qui³ cˀoa⁴tjin¹ xi³ an³ co³son²-ni³le⁴, nca³ tsi² tsa² to⁴ˀan³-jian²³, to⁴nca³ an³ cao⁴ je² xi³ qui³si³ca³sen¹-na³, je² Nˀai³-na¹.

¹⁷Ya⁴ xon⁴ cjoa⁴te¹xo³ma³-no³ tji¹tˀa³, cˀia⁴ nca³ jao² ma³-ni³ testigo, je² en¹-le⁴ cjoa⁴qui²xi⁴-ni¹.

¹⁸An³ nia¹³ xi³ tsjoa³ en¹-na⁴ xi³ to⁴tˀa³tsˀan⁴, cˀoa⁴-ti⁴ tsjoa¹ en¹-le⁴ xi³ tˀa³tsˀan⁴ je² xi³ qui³si³ca³sen¹-na³, je² Nˀai³-na¹.

¹⁹Cho⁴ta⁴ fariseos cˀoi⁴qui³tso²-le⁴ Jesús: Jña¹ ti¹jna³ Nˀai³-li⁴. Jesús qui³nchja⁴: Sa³ˀnta³ an³ li²coi³ ˀya³xcon³-nao¹³, cˀoa⁴ ni⁴ˀya³xcon³-jion²³ Nˀai³-na⁴. Tsa² ˀya³xcon³-la²ni³nao¹³, cˀoa⁴-ti⁴ ˀya³xcon³ Nˀai³-na⁴.

²⁰Je² en¹-vi⁴ ya⁴ qui³nchja⁴ Jesús ya⁴ ˀnte³ jña³ nca³ sˀe³xco¹ taon⁴, nca³ ti¹va³co¹ya³ ya⁴³ yo⁴nco⁴. Ni⁴ˀya³-jin² xi³ qui³tsoa³ Jesús, nca⁴ cje³ fi³cho¹-jin² hora-le⁴.

²¹Jesús cˀoi⁴qui³tso²-nca¹ni³le⁴: Cjoi¹-nia³ an³, cˀoa⁴ coi⁴jnchi¹sjai³-nao¹³, to⁴nca³ je¹-no³ coi⁴ya¹jion³. Jña³ nca³ cjoia¹³ nca³ an³, jon² li²coi³ coan⁴ coa⁴nquion¹³.

²²Cˀia⁴ cˀoi⁴qui³tso² cho⁴ta⁴ judíos: A³ ti⁴je² si⁴²cˀen³-ni³ yao³-le⁴ nca³ cˀoa⁴ tso²: Jña³ nca³ cjoia¹³ nca³ an³, jon² li²coi³ coan⁴ coa⁴nquion¹³.

²³Jesús cˀoi⁴qui³tso²-le⁴: Jon² nio¹³ xi³ i⁴ tsaon⁴³ na³nqui³-vi⁴, an³ ja⁴ncˀa¹ tsˀan⁴. Jon² i⁴ son³ˀnte³-vi⁴ tsaon⁴³, to⁴nca³ an³-vi⁴ a³li² i⁴ son³ˀnte³-vi⁴ tsˀan⁴.

²⁴Coi³ cˀoa⁴qui³xin³-ni³no³ nca³ je¹-no³ coi⁴ya¹jion³. Tsa² tsi² tsa² coan⁴cjain¹-no³ ˀya³-ni³ nca³ an³, to⁴ya⁴ je² je¹-no³ coi⁴ya¹jion³.

²⁵Cho⁴ta⁴ judíos cˀoi⁴qui³tso²-le⁴: ˀya¹-ni³ ji³. Cˀia⁴ Jesús qui³tso²-le⁴: Je² xi³ je³cˀoa⁴qui³xin³-no³ nca³ ti¹tjon².