San Juan 8:45-57

⁴⁵Katmizna na watcha kaiznamtukas, une na kaizta aizpa nɨjkulamtuchi.

⁴⁶Une na kwail kirɨt aizpa aansachi. Na watcha kaiznakane, ¿Chikishma na kaizta aizpa nɨjkulamtuchi?

⁴⁷Diosta piantuzne Dios pit mɨamtu. U Diosta pianchi akwa, une us kaizta aizpa mɨamtuchi.

⁴⁸Suasne Judío awane ussa kwail kizara: —Au kaizta aizpa watcha i. Nune Judío awa chi. Nune Samaria pɨpuluras awakana i. Salizne nua piztɨt.

⁴⁹Jesúsne sɨnkanara: —Saliz nawa piztachi. Nane ap Taittara kwisha wari kiztus. Sunkana une nawa kwail i kizamtu.

⁵⁰Nane awaruza saimtuchi, nawa wari kiznapa. Diosne nawa wari kiznazi. Usne wan iz kit na akwa nil kiznazi.

⁵¹Watcha kaiznamtus. Na kamtara aizpa kimturuzne mizurainkas iamanazi.

⁵²Sun mɨarawane, Judío awane sɨnkaara: —Mane aune saliz nua pizta pianmakpas. Abrahamkas wan Dios pit kaiznamtuzkas iarɨt. Nune ka kiztui: “Na kamtara aizpa kimturuzne mizurainkas iamanazi.”

⁵³Au Taitta Abrahamne irɨt. ¿Nune au Taitta Abrahamkin an katsa kish? Dios kainammtuzkas iarɨt. ¿Nune mɨntasmas? Nu kwail mintui, nu katsamika chi akwa.

⁵⁴Jesúsne sɨnkanara: —Nain watcha ish kaiztane, na kaizta aizpa kainsɨh. Ap Taittane nawa wari kiztu. Ukas us au Dios i kizamtu.

⁵⁵Sunkana une mizurainkas ussa pianchi. Nain ussa pianish. Na pianchish kiztane, nakas ukanain pɨrail kizshina. Nain ussa watcha pianish, us kaiztu aizpa kimtu akwa.

⁵⁶U taitta Abrahamne watsal kira, na amtu payuwa piankamtɨt akwa. Usne sun iz kit watsal kira.

⁵⁷Suasne Judío awaruzne Jesústa kaizara: —Nune cincuenta años mɨjchi mama. ¿Nune Abrahamta iztakish?