SAN JUAN 8:40-59

⁴⁰Xʉfiin'¹³ wa'a fuu²¹²uu 'naa' 'e júu³ jai'² 'e ga'e'²e Dios jna, pe 'naa' 'iin²¹²naa' jngaa'¹³moo' jna. ¡Abraham jo gajmaa¹a la joon!

⁴¹'Naa' 'ná¹ jmaa²aa' la joon la lɨ 'e gajmaa¹a ñʉ'²ʉʉ'. Joon 'ii dogɨ gajin'²in: ―Jna'a jo lɨ́ɨ¹na'a tsá² 'in jo jmii²¹ seein²¹ tsʉ seein²¹ jaan²¹o ñʉ'¹ʉ'ʉ 'in sii²¹ Dios 'i.

⁴²Jesús joon gasɨɨ'²¹ɨ 'ido: ―Waxʉ lɨ' 'e la jai'² ñʉ'²naa' Dios Jmii²¹ 'e la 'iin²¹²moo' jna, tsʉ goo²¹²oo fu tyani Dios, joon lo‑o tyíin¹na. Jon' gagoo²¹²oo cwáain¹ tyiia 'ñii'a tsʉ Dios Jmii²¹ gasii¹in jna.

⁴³¿'Ee lɨ'ɨ jo 'e 'øøi'²¹‑'oo' 'e fo'³oo lo? Jo 'øøi'²¹‑'oo' tsʉ jo 'iin²¹²naa' núu³oo' júu³ tyiia.

⁴⁴Joon ñʉ'²naa' 'in 'lɨɨ'³mo 'ii. Joon jóon¹on 'ii 'naa' 'e joon 'iin²¹²naa' jmaa²aa' 'e 'iin²¹²in 'ii tsʉ ca la mo nifu gajngaa'¹³i 'in 'lɨɨi'³ do tsá². Ce jiin'¹³ cafu jo mo gajmaa¹a 'e jai'² jogɨ faa'²¹a 'e jai'². Mo faa'²¹a júu³ tajuu²¹ faa'²¹a jiin'¹³ la 'e lɨ́² lɨ́ɨ¹i. Tajuu²¹mo 'ii, joon jilaa'²¹ júu³ tajuu²¹ 'e faa'²¹a tsá² 'in 'lɨɨ'³mo jmii²¹i 'e júu³ tajuu²¹ joon.

⁴⁵Pe jna fo'³oo 'e ja'²mo, joon 'naa' jo jo'¹ lɨ́ɨ²naa' jna.

⁴⁶¿Tɨ seein²¹ jaain²¹ jee²¹² 'naa' 'in jmá¹a júu³ røø²¹ 'e 'oo² jna tsaa² tyi¹? Joon wa'a fuu²¹²uu 'naa' júu³ 'e jai'², ¿'ee lɨ' jo jo'¹ lɨ́ɨ²naa' jna?

⁴⁷Jileei'²¹ 'in jóon¹on Dios nuu¹o júu³ tya' Dios, pe 'naa'gɨɨ' jon' jóon¹on Dios 'naa' tsʉ 'wii'¹³ joon jo 'iin²¹²naa' nuu²uu' júu³ tya' Dios ―jin'² Jesús sɨɨ'²¹ɨ 'in tyʉ'² to² tsá² Israel do.

⁴⁸Joon gajin'² tsá² Israel sɨɨ'²¹ɨ 'ido: ―'E ja'²mo mo nigafaa'¹³a'a 'e tsá² seein²¹ Samaria 'nʉ joongɨ 'e 'yuui² 'in 'lɨɨ'³mo alma tyi'i.

⁴⁹Joon Jesús‑gɨ gañii¹i: ―Jo 'in 'lɨɨi'³ 'yuui² alma tyiia. Jilaa'²¹ 'e jmóo³oo jmai'² tya' 'e untyuu²¹²na Ñʉ'³oo pe 'naa'gɨɨ' jmai'² 'e un'lɨɨ'³moo' jna.

⁵⁰Pe jna jo 'noo'¹³oon wa' 'e untyuu²¹²i tsá² jna xʉfiin'¹³ seein²¹ jaain²¹ 'in 'noo'¹on la joon, joon 'ii jmoo¹o 'ii'²¹.

⁵¹'E la ja'²mo fuu²¹²u 'naa', jileei'²¹ 'in unjíi²i júu³ tyiia 'e fo'³oo lo, jo jmɨɨ²¹² ijúun²in.

⁵²Joon gajin'² 'in tyʉ'² to² tsá² Israel sɨɨ'²¹ɨ Jesús: ―Nogɨ tsei'² 'e ja'²mo lɨ́ɨ²na'a 'e 'yuui² 'in 'lɨɨ'³mo alma tyi'i. 'Lɨɨ²¹² Abraham joongɨ jileei'²¹ 'in cwo¹o júu³ tyʉ́² 'in gajún¹mo 'i joon 'nʉgɨ fu'²'u jna'a: “'In unjíi²i jilaa'²¹ 'e fo'³oo lo, jo jmɨɨ²¹² ijúun²in.”

⁵³¿Tɨ lɨ́ɨ²u 'e feei'¹gɨ'ɨ la 'lɨɨ²¹² nʉ'¹ʉ' Abraham? Gajún²mo 'i la joon jon gajún²mo 'in gacwo¹o júu³ tyʉ́² la mo jéei¹. ¿'Iin 'nʉ lɨ́ɨ²u jon?

⁵⁴Jesús gajin'²in: ―Jo lí² untyuu²¹²na 'ñii'a, tsʉ wana untyuun²¹²na 'ñii'a jo to² 'íi³in. Pe 'in untyuu²¹²u jna Ñʉ'³oo 'i, tsʉ 'ii jon foo'²¹ 'naa' Dios tyii'.

⁵⁵Pe 'naa' jo cwii¹naa' 'ii. Pe jna cwii¹moo. Joon wa jna fo'³oo 'e jo cwii¹na 'ido joon jna tajuu²¹moo la lɨ́ɨi¹ 'naa'oo'. Pe la jai'² cwii¹moo joongɨ unjíi²oo 'e jin'²in.

⁵⁶'Lɨɨ²¹² tsafeei'¹ tyii' Abraham galijløøi'³ 'áa¹mo mo galɨñii¹i iní² jmɨɨ²¹² tyiia. Ganii²¹, joon galijløøi'³ 'áai¹.

⁵⁷Joon gajin'²in 'in tyʉ'² to² tsá² Israel do sɨɨ'²¹ɨ Jesús: ―Jo mo 'oo²gɨ'ɨ cincuenta jiin²¹. ¿Xiiala lɨ́² 'e foo'²¹'o 'e gañíi¹³u'u Abraham?

⁵⁸Joon gajin'² Jesús: ―'E la ja'²mo fuu²¹²uu 'naa', la nʉ'gɨ 'e la seein²¹ Abraham, niseen²¹mo jna ―jin'² Jesús.

⁵⁹Joon 'in tsá² do gasaa'¹³a cuun²¹² ityuu'¹³i Jesús. Pe Jesús do ga'mée¹mo 'ña'a joon cwo'ɨ́ɨ¹o 'e cwo'¹ fee'¹ do. Joon gangɨ́ɨ¹i jee²¹² 'ido, ganga'²mo.