San Juan 8:32-50

³²Hacuaha cuijne rcun xi hmí rë cjuaquixi, hane cjuaquixi jan ne, cuëhëndaya nuju. ―‍Cuatjin cachja Jesús.

³³Ngajan xi xutaxa rë xi cuacun jan ne, cuitjin cafayangui me: ―‍Peru ngayaan ne, tjë rë xutachanga naja Abraham má ngayaan, hane cjëë camahani cuma ngayaan mosu hndixahan rë xuta. ¿Mé má nújun xi cumandaya ngayin? ―‍Cuatjin cafayangui me.

³⁴Hane Jesús ne, cuitjin cafayangui me: ―‍Cuichjá cojo nuju cjuaquixi ta yëjë ni xuta xi hincha me ndiya rë cjuatsehen ne, hatuxa tjinhñu me cojo cjuatsehen sacuatjin tjinhñu ngu mosu hndixahan cojo nai rë.

³⁵Ngu mosu hndixahan ne, hacuiin hatuxa cuiyujucahndë ngajñi xuta xi ndava, peru ngu quihndi xi cjuaquixi ne, hatuxa tsëhë xuta xi ndava.

³⁶Vëhë xi sa xi Quihndi rë Nina cuëhëndaya nuju ne, cumandaya jain ngayun cojo cjuaquixi.

³⁷Ngahan ne, hacuaha hvë xi tjë rë Abraham má ngayun. Peru ngayun ne, tivinchun chuva rë xi nicuhun ná, tsëhë xi tuun cahndë́ xi cuisehen cjua naha cahntsua xahasen nuju.

³⁸Ngahan ne, xcusun xi cahvë hiscan tacun Nahmi naha ne, tsëhë vëhë xi tichjá. Peru ngayun ne, sacuatjin canuhyun xi cachja nahmi nuju ne, cuatjin tinihñu. ―‍Cuatjin cafayangui Jesús.

³⁹Ngajan xi xutaxa rë xi cuacun jan ne, cuitjin cachja me: ―‍Nahmi niji ne, hacui xutachanga naja Abraham. ―‍Cuatjin cachja me. Ngajan xi Jesús ne, cuitjin cachja me: ―‍Sa xi quixi xi quihndi rë Abraham má ngayun ne, sacuatjin casahmi Abraham ne, hacuaha cuatjin nihñu.

⁴⁰Ngahan ne, cachjá cojo nuju cjuaquixi xi cáhndë xi cachja Nina, peru quihndë ne, tivinchun chuva rë xi nicuhun ná. Xutachanga naja Abraham ne, casahmii me cuatjin.

⁴¹Ngayun ne, sacuatjin casahmi nahmi nuju ne, hacuanitjin ni tinihñu. ―‍Cuatjin cachja Jesús. Ngajan xi xutaxa rë xi cuacun jan ne, cachja me cuitjin: ―‍Ngayin ne, hacuiin quihndi xca ngayin. Nina ne, ngu ni me vëhë xi Nahmi niji. ―‍Cuatjin cachja xutaxa rë xi cuacun jan.

⁴²Hane Jesús ne, cuitjin cachja me: ―‍Sa xi quixi xi Nahmi nuju Nina ne, hacuaha canihñu hmu tacún ná ta, tsëhë xi ngahan ne, Nina catsingatju ná me, hane quihndë ne, nguehe tejña. Ngahan ne, hacuiin cjuatacun naha suva xi canduvá ta me vëhë catsingatju ná me.

⁴³¿Mé má vijnii rcun cjua xi chjá? Cuatjin vijnii rcun ta, tsëhë xi caain nuju visiñuju cjua naha.

⁴⁴Ngayun ne, quihndi rë nahmi nuju Satanás ngayun, hane xcusun xi meje rë nahmi nuju ne, xcusun vëhë xi meje nihñu. Xitsehen xi matitjun vë ne, hisca ntsacu cavetsihin ne, hatuxa tsiquehen vë xuta. Hatuxa tsajin jiya vë ngajñi rë cjuaquixi ta, tsëhë xi tsajin cjuaquixi ngajñi rë cjuatacun rë. Hya xi chja xitsehen vë cjuandacha ne, chja sacuatjin xcusun rë suvá ta, tsëhë xi hatuxa ndacha, hacuaha nahmi rë yëjë ni cjuandacha.

⁴⁵Peru ngahan ne, tsëhë xi chjá cjuaquixi ne, vëhë xi macjaain nuju ngahan.

⁴⁶¿Jarë ngayun xi cuma ninguixun xi ngahan ne, tjin jyë́ naha? Sa xi chjá xi cjuaquixi ne, ¿mé má macjaain nuju ngahan?

⁴⁷Me xi tsëhë jain Nina ne, vetaharcu me cjua rë Nina. Ngayun ne, tsëhë xi hacuiin tsëhë Nina ngayun ne, vëhë xi mijí cuetuhunrcun cjua rë me. ―‍Cuatjin cachja Jesús.

⁴⁸Hane xutaxa rë xi cuacun jan ne, cuitjin cachja me cojo Jesús: ―‍¡Hatuxa cjuaquixi xi nújin hya xi nújin xi ngayun ne, ngu xuta samaritano ngayun hacuaha jiya xitsehen xahasen nuju! ―‍Cuatjin cachja xutaxa rë jan.

⁴⁹Ngajan xi Jesús ne, cuitjin cafayangui me: ―‍Tsajin xitsehen xahasen naha. Ngahan ne, fahárcun Nahmi naha, hane ngayun ne, choho nújun tsahan.

⁵⁰Hacuaha mijí sahme jyë sahme hnga suva yojo naha. Tjin ngu me xi meje sahmi jyë sahmi hnga ná, hane me vëhë ne, tsichuva naja me cojo cjuatacun naja.