San Juan 8:26-40

²⁶Jemu tjin ná cjua xi cuichjá tsujun, hacuaha jemu tjin xi cjuaháchuva tsujun. Peru me xi catsingatju ná ne, quixi jain me cojo cjua rë me, hane ngahan ne, cjua xi cáhndë xi cachja me ne, cjua vëhë xi chjá nguehe ngasunhndë. ―‍Cuatjin cachja Jesús.

²⁷Peru xutaxa rë xi cuacun jan ne, cajnii rcu me xi Jesús ne, tsëhë Nina Nahmi naja xi tichja me.

²⁸Vëhë xi Jesús ne, cuitjin cachja me: ―‍Hya xi ngayun chjunihngun ná ngahan xi Quihndi rë Xuta Jain ngahan ne, hya cuijne rcun xi Ngahan Vi hmí ná. Hane ngahan ne, hatuxa tsajin mé xi sahme xi cojo cjuatacun naha suva ta sacuaha cjua xi cachja Nahmi naha cojo ná ne, cjua vëhë xi chjá.

²⁹Hacuaha me xi catsingatju ná ne, tacun me cojo ná, cavejñaai ná me xi suva ta, tsëhë xi ngahan ne, hatuxa sahme tutjin xi chuya rë me. ―‍Cuatjin cachja Jesús.

³⁰Hane xi cachja Jesús cjua vëhë ne, jemu cjín xuta camangu cacun me cojo rë me.

³¹Ngajan xi Jesús ne, cachja me cuitjin cojo xutaxa rë yungun xi camacjain rë tsëhë cjua rë me: ―‍Sa xi ngayun cuangun nduju xi quitahá rcun cjua naha ne, quixi xi ha camá ngayun xuta ladu naha.

³²Hacuaha cuijne rcun xi hmí rë cjuaquixi, hane cjuaquixi jan ne, cuëhëndaya nuju. ―‍Cuatjin cachja Jesús.

³³Ngajan xi xutaxa rë xi cuacun jan ne, cuitjin cafayangui me: ―‍Peru ngayaan ne, tjë rë xutachanga naja Abraham má ngayaan, hane cjëë camahani cuma ngayaan mosu hndixahan rë xuta. ¿Mé má nújun xi cumandaya ngayin? ―‍Cuatjin cafayangui me.

³⁴Hane Jesús ne, cuitjin cafayangui me: ―‍Cuichjá cojo nuju cjuaquixi ta yëjë ni xuta xi hincha me ndiya rë cjuatsehen ne, hatuxa tjinhñu me cojo cjuatsehen sacuatjin tjinhñu ngu mosu hndixahan cojo nai rë.

³⁵Ngu mosu hndixahan ne, hacuiin hatuxa cuiyujucahndë ngajñi xuta xi ndava, peru ngu quihndi xi cjuaquixi ne, hatuxa tsëhë xuta xi ndava.

³⁶Vëhë xi sa xi Quihndi rë Nina cuëhëndaya nuju ne, cumandaya jain ngayun cojo cjuaquixi.

³⁷Ngahan ne, hacuaha hvë xi tjë rë Abraham má ngayun. Peru ngayun ne, tivinchun chuva rë xi nicuhun ná, tsëhë xi tuun cahndë́ xi cuisehen cjua naha cahntsua xahasen nuju.

³⁸Ngahan ne, xcusun xi cahvë hiscan tacun Nahmi naha ne, tsëhë vëhë xi tichjá. Peru ngayun ne, sacuatjin canuhyun xi cachja nahmi nuju ne, cuatjin tinihñu. ―‍Cuatjin cafayangui Jesús.

³⁹Ngajan xi xutaxa rë xi cuacun jan ne, cuitjin cachja me: ―‍Nahmi niji ne, hacui xutachanga naja Abraham. ―‍Cuatjin cachja me. Ngajan xi Jesús ne, cuitjin cachja me: ―‍Sa xi quixi xi quihndi rë Abraham má ngayun ne, sacuatjin casahmi Abraham ne, hacuaha cuatjin nihñu.

⁴⁰Ngahan ne, cachjá cojo nuju cjuaquixi xi cáhndë xi cachja Nina, peru quihndë ne, tivinchun chuva rë xi nicuhun ná. Xutachanga naja Abraham ne, casahmii me cuatjin.