SAN JUAN 8:25-58

²⁵Tuhme tumerune sa̱hn chahn ihyan: ―¿Duh ndih ne? Ndahconan ye, ne ra̱hn ye ri ye sa̱hn: ―A rá̱hn rí nchuhn nde a ra̱hn me.

²⁶A̱ma ndeh na̱n dehtenduh va che có nchuhn ma̱n, nevíh nunde yahn ne va̱cona̱n ne ma̱n. Ihyan che dechuh ye u ne, riquenda̱h cua̱co che ra̱hn ye. Me u ne, a ndudo yahn ye che ricuáhn ihyan iyehnse.

²⁷Ate sa̱hn chahn ne, hua chenahn se che a yahn Dendiohs Chida che tihca̱ ra̱hn ye.

²⁸Chemin che ra̱hn ye ri ye sa̱hn: ―Cuahn che cuaconahn ya̱h nchuhn u che rinducó nducoya̱ca ihyan ne, tuhme tumacadino ne yahn vederihquentiyon che quenan cumá. Namin tumacadino ne che hua ricuáhn che cuande yahn má̱n, te ricuáhn ndudo che a ma̱n Chidá te cuande ye u.

²⁹Tihca̱, te Chidá ne, dechuh ye u, ne rinduco ye u. Hua rihcoma̱n ye u, te cuahn da̱ma redináhn nducuahn che renan ino ye.

³⁰Cuahn che chihno ra̱hn Dihvo vo nducuahn ndudo chemin chan ne, a̱ma ya̱hn ihyan chitahno ye ihyan.

³¹Tuhme ra̱hn Dihvo vo ri ye ihyan chahn: ―Ndete che quendi nchuhn numa ino ne cotahno ne ndudo che ricuáhn nchuhn ne, tuhme che cua̱co conduco ne u.

³²Ava̱ne ne, conahn ne ndudo yáhn, ne ndo ne libre.

³³Ndahconan ihyan chahn ne, ra̱hn ye ri ye Dihvo vo: ―Nuhn ne, nda̱ta yahn Abraham nuhn, ne nde a̱ma yune hua ntihcue ihyan nuhn. ¿Me ta̱ca̱ che ra̱hn ne che ndo nuhn libre ne?

³⁴Ra̱hn Dihvo vo ri ye ihyan chahn: ―Cua̱co rá̱hn rí nchuhn te nducoya̱ca ihyan che vatechica ye vedeyeno yahn ma̱n ye, rahtendihco ye nunde ne, anduhneca̱ ndete che hua libre ye, te hua co ca̱hcoma̱n ye nunde yahn ye.

³⁵Nchuhn ne, nduhca̱ sa̱hn deca̱hya yahn ihyan che hua redin cuande ye va̱n da̱ya ye ne, tihchan nchuhn na̱n Dendiohs. Ate u ne, Da̱ya ye u.

³⁶Chemin che, cuahn che ndedeváhn ihyan ne, ametah deh che ndedecadino ye.

³⁷A devanó che nda̱ta yahn Abraham nchuhn. Ate hua renevahnecun ne ndudo yáhn, ne chemin che nahn ca̱hno ne u.

³⁸U ne, ricuáhn nchuhn ndudo che rete cuande Chidá u, ne nchuhn ne, redin ne dehtenduh che nahn chida ne.

³⁹Ndahconan ihyan chahn yahn Dihvo vo, ne ra̱hn ye: ―Nuhn ne, Abraham che chida nuhn. Ate ra̱hn ye ri ye ihyan chahn: ―A ndere redin chida nchuhn Abraham, te hua riquendi ne yune yahn ye.

⁴⁰U ne, ra̱hn cua̱có rí nchuhn ndudo che a ma̱n Dendiohs rete cuande ye u, ate nchuhn ne, nahn ca̱hno ne u. Abraham ne, ndiyu chemin che din ye.

⁴¹Nchuhn ne, cuahto redin chida ne, cuahto redin ma̱n ne. Ra̱hn ihyan chahn ri ye Dihvo vo: ―Nuhn ne, Dendiohs che Chida nuhn.

⁴²Ra̱hn Dihvo vo ri ye ihyan chahn: ―A ndere redin Chida nchuhn Dendiohs. Hua cua̱co che ra̱hn ne, ne chemin che hua ri rendihche ne u. Ndiyu che cuande yahn má̱n che cochí, te a ma̱n Dendiohs dechuh ye u.

⁴³Yahn che hua renevahnecun nchuhn ndudo yáhn ne, chemin che hua renahn ne.

⁴⁴Nchuhn ne, chundah che chida ne, sa̱hn min che redinahn ne yahn se. Sa̱hn min ne, rihquentiyon se sa̱hn rihno ihyan nde ro che chihnde iyehnse. Cuahn da̱ma rihncheh se, te chemin che ntiyon yahn se.

⁴⁵U ne, ricuáhn ndudo cua̱co, ate nducote ndi nino ne vederihncheh ne, chemin che hua ritahno ne che rá̱hn.

⁴⁶Nde a̱ma nchuhn ne, hua co ca̱hma ne che va nunde yáhn. Ndudo cua̱co che ricuáhn, ne redin yahn che cotahno ne.

⁴⁷A ndero ndi ihyan che yahn Dendiohs ihyan, te rihcovan ye Ndudo yahn ye. Ate nchuhn ne, ndiyu yahn Dendiohs nchuhn, ne chemin che hua nahn ca̱hcovan ne Ndudo yahn ye.

⁴⁸Tuhme ra̱hn sa̱hn ndina̱n chahn ri se Dihvo vo: ―Ra̱hn cua̱co nuhn ri nuhn ndih che ndere ihyan ndih, nduhca̱ ihyan nación yahn Samaria ma̱n, quenun vaco chihnga̱ ndih ma̱n.

⁴⁹Ra̱hn Dihvo vo ri ye sa̱hn chahn: ―U ne, rendevá yavena̱n Chidá. Ate nchuhn ne, renda̱hchenan ne u, ne chemin che ndere ra̱hn ne che quenun vaco chihnga̱ u.

⁵⁰U ne, hua rendonan má̱n u. Ate va Chidá che rendeva ye yavená̱n, ne ihyan min che retecheca̱de ye.

⁵¹Cua̱co rá̱hn rí nchuhn te ihyan che rihcovan ye che ricuáhn ne, cuahtenan ye cuahn da̱ma.

⁵²Tuhme ra̱hn se ri se Dihvo vo: ―Ma̱n ne, a devano cua̱co nuhn che quenun vaco chihnga̱ ndih, yahn che tihca̱ ra̱hn ne. Abraham ma̱n, nducoya̱ca ihyan profeta ma̱n ne, chih ye. Me ndih ne, ra̱hn ne te ihyan che ca̱hcovan ye ndudo che ricuahn ne ne, cuahtenan ye cuahn da̱ma.

⁵³¿A tahque rigonun chihve ndih che co chida nuhn Abraham, che ra̱hco ne? Ihyan min ma̱n, nducoya̱ca ihyan profeta ma̱n ne, chih ye. ¿Duh ndih, che ra̱hco ne?

⁵⁴Ra̱hn Dihvo vo ri ye sa̱hn: ―Ndete che rendonan má̱n u ne, nde hua cochihve yáhn. Chidá, ihyan min che ra̱hn nchuhn che Dendiohs yahn ne ne, a ihyan min che rendeva ye yavená̱n.

⁵⁵U ne, rendihché ihyan, ate nchuhn ne, hua rendihche ne ihyan. Rendihché ihyan, ne redináhn che rihquentiyon ye. Cua̱co che rá̱hn, ndiyu nduhca̱ nchuhn che ndere ra̱hn ne che rendihche ne ihyan.

⁵⁶Ihyan ndico yahn nchuhn, Abraham ne, a̱ma chi yeno ye cua̱hn che checadino ye che va che chí iyehnse, ne nde tahque chi yeno ye cuahn che a chinahn.

⁵⁷Tuhme ra̱hn se ri se Dihvo vo: ―Nde mare o raco ndiche nduyo metah co ndih, ¿ta̱ca̱ che ndihchero ne Abraham?

⁵⁸Ra̱hn Dihvo vo ri ye sa̱hn: ―Cua̱co rá̱hn rí nchuhn te u ne, a vá nde ro che metah cuhndeya̱n Abraham.