San Juan 8:25-32

²⁵Ijkuakó oksepa okitlajtlanijkeh: —¿Akin te? Jesús okinnankili: —Ne yonomechili Akin Ne.

²⁶Nikpia miak tlájtoli tlan nomechilis iwa miak tlan ika nomechtlajtlakoltis, pero Akin onechaltítlanki kijtoa tlan milák, iwa tlan Ne nikinmilia n tlaltikpaktlakah ye tlan onikkak, okijto.

²⁷Yejwah amo okajsikamatkeh Jesús okintlapowiaya de Itajtsi Dios.

²⁸Yika Jesús okinmili: —Ijkuak nonnechajkokuiskeh, Ne non onimochi ni tlakatl, ijkuakó nonkajsikamatiskeh Ne Ni Cristo, iwa amitla nikchiwa san tlan Ne nikneki. Ne sanwel nikijtoa tlan Notajtsi Dios onechmachti.

²⁹Porke Akin onechaltítlanki kajki nowa. Amo kema nechkawa noselti, porke nochipa nikchiwa tlan Ye kipaktia.

³⁰Ijkuak Jesús ijkó okinmili miakeh okineltokakeh.

³¹Ijkuakó Jesús okinmili n judíojteh non okineltokakeh: —Tla nomejwah nochipa nonkitlakitaskeh notlajtol, milák nonyetoskeh notlamachtijkawah.

³²Iwa nonkixmatiskeh tlan milák, iwa tlan milák nomechmakixtis.