2Hane xi casahasen camá nchujun jan ne, cavuya quiji nga Jesús ndatsen yungun xi matitjun. Hane yëjë xuta jan ne, casahmitiña me tsëhë Jesús. Hane xi quiji cavéjña Jesús ne, sehe cavetsihin cavicuya me xuta jan.
3Ngajan xi ngujo cha vicuya cjuachacun cojo ngujo cha fariseo ne, cafehecojo cha ngu chjuun xi cachjahá rë na xcun cjuatsehen xi tisahmi na cojo ngu xihin xi hacuiin xihin rë na. Hane cha xi cuacun jan ne, quiji cavisecun cha na ngajñi rë xuta hiscan tacun Jesús,
4sehe cachja cha cojo Jesús cuitjin: ―Maestro, chjuun vihi ne, cachjahá rë na xcun cjuatsehen xi tisahmi na cojo ngu xihin xi hacuiin xihin rë na.
5Quihndë ne, xcun ley xi cavejña naja Moisés ne, cavitexa me xi tu yo ni xuta xi sahmi xcusun vëhë ne, cueya me cojo ndyojo. Ngayun ne, ¿mé xi cuinújun?
6―Cuatjin cavinenguise cha xi cuacun vëhë, xi tifahachuva cha Jesús, cojo sa xi sacú rë cha chuva rë xi cuinchajyë cha me. Ngajan xi Jesús ne, catsiquindi me yojo rë me, sehe cavetsihin catsihindu me nangui cojo rcutsja me.
7Hane tsëhë xi cjuinduju sa tivinenguise cha xi cuacun jan Jesús ne, catsinguixi me yojo rë me, sehe cachja me cojo cha cuitjin: ―Tu jarë ni ngayun xi tsajin jyë́ nuju ne, ngayun tjun tjun tetuhun rë na ndyojo. ―Cuatjin cachja Jesús.
8Hane sehe catsiquindi nga me yojo rë me, hane catsihindu sa me nangui.
9Hane xi cahndë cha xi cuacun jan xi cuatjin cachja Jesús ne, ta vëë me xi hacuiin tyjahi cjuatacun rë me, chuva ngu chuva ngu cha cavetju cha cafe cha. Cavetsihin cavetju tjun tjun cha xi hitsë sa changá. Hane camá suvá sa Jesús, cojo chjuun xi secun ngajñi rë xutacjín jan.
10Hane xi catsinguixi me yojo rë me ne, cavinenguise me chjuun jan cuitjin: ―Ngayun chjuun, ¿jarë me ne? ¿Há tsajin yo xi casahmi nuju castigu? ―Cuatjin cavinenguise Jesús.
11Ngajan xi chjuun jan ne, cuitjin cafayangui na: ―Tsajin yo, tatá. ―Cuatjin cafayangui na. Ngajan xi Jesús ne, cuitjin cachja me: ―Ngahan ne, hacuaha sahmee nuju castigu. Cuma cuangun, peru ha quihndë xicanihñuu sa cjuatsehen. ―Cuatjin cachja Jesús.
12Hya xi camá ne, cachja nga Jesús cojo xutacjín jan cuitjin: ―Ngahan ne, sacuaha hasen xi cuma rë xuta ngasunhndë ngahan. Xuta xi cuisehen me ladu naha ne, hatuxa cuiyijin me ngajñi jñú ta ngajñi hasen xi sua cjuahñu xatsë cuiyuju me. ―Cuatjin cachja Jesús.
13Ngajan xi cha fariseo xi cuacun jan ne, cuitjin cachja cha cojo Jesús: ―Ngayun ne, tinújun favor nuju suvun. Vëhë xi cjua xi nújun ne, tsajin rë cjuaquixi. ―Cuatjin cachja cha.
14Hane xi cafayangui Jesús ne, cuitjin cachja me: ―Handasa chjá favor naha suva ne, cjua xi chjá ne, cjuaquixi ta, tsëhë xi ngahan ne, hvë jani canduva hacuaha hvë jani cúya cjuë́ nga. Peru ngayun ne, hyúun jani canduva hacuaha hyúun jani cúya cjuë́ nga.
15Ngayun ne, xi nichuvun xuta cojo cjuatacun rë me ne, chuva xi tsingatahacacun xuta ngasunhndë ne, cuatjin ningatuhuntacún. Ngahan ne, titsichuvaan hisca ngu xuta cojo cjuatacun rë me.
16Peru sa xi tsichúva ngu xuta ne, hatuxa cjuaquixi cjua xi cuichjá ta, tsëhë xi hacuiin suva sahme ta ngahan cojo me xi catsingatju ná nihñi tangun.
17Xcun ley xi vitexa nuju ne, hacuaha camahindu xi hya xi jo xuta sua me cjuaquixi rë me xcun xutaxa rë hane ngu tangun ni cjua chja me ne, cjuaquixi cjua xi chja me.
18Ngahan xi chjá favor naha suva, hane Nahmi naha xi catsingatju ná me ne, hacuaha cojo me chja me favor naha. ―Cuatjin cafayangui Jesús.
19Ngajan xi cha fariseo jan ne, cuitjin cavinenguise cha Jesús: ―¿Jani tacun nahmi nuju ni? ―Cuatjin cavinenguise cha. Hane Jesús ne, cuitjin cafayangui me: ―Hacuiin ngahan hyun ná ne, hacuiin Nahmi naha hyun me. Sa xi ngahan hyun ná ne, hacuaha hyun Nahmi naha. ―Cuatjin cafayangui Jesús.
20Cjua vëhë ne, cachja Jesús hya xi tivicuya me xuta ngajan yungun xi matitjun, ngu ndihya hiscan xi siu alcancía. Peru hisca ngu xuta cafaain rë me, tsëhë xi cjëë cuetjucaa nixtin xi cuatjin cuma.
21Hya xi camá ne, quijinduju sa cachja Jesús cojo xuta cuitjin: ―Ngahan ne, cuétju cjuë́, hane ngayun ne, cuinchunsun ná. Peru ngatsë rë cjuatsehen xi cún ngayun ne, cuechuun xcun Nina hya xi cueyun. Hiscan xi cjuë́ ne, ngayun ne, cumaji cuangun. ―Cuatjin cachja Jesús.
22Ngajan xi xutaxa rë xi cuacun jan ne, cuitjin cachja me ngajñi rë me cojo xicjin me: ―Tu ma rë sa xi cjue tsiquehen suvá me yojo rë me xi cuatjin chja me xi hiscan cjue me ne, cumaji cuanguen. ―Cuatjin cachja xutaxa rë xi cuacun jan.
23Ngajan xi Jesús ne, cuitjin cachja me cojo me xi cuacun vë: ―Ngayun ne, tsëhë nguehe nangui ngayun. Ngahan ne, tsëhë ngahnga ngahan. Ngayun ne, tsëhë ngasunhndë vihi ngayun. Ngahan ne, hacuiin tsëhë ngasunhndë vihi ngahan.
24Vëhë xi cuatjin cachjá cojo nuju xi ngatsë rë cjuatsehen xi cún ngayun ne, cuechuun xcun Nina hya xi cueyun. Sa xi macjaain nuju xi Ngahan Vi, hmí ná ne, ngatsë rë cjuatsehen xi cún ngayun ne, cuechuun xcun Nina hya xi cueyun. ―Cuatjin cachja Jesús.
25Ngajan xi xuta xi cuacun jan ne, cavinenguise me Jesús cuitjin: ―¿Yo ngayun ni? ―Cuatjin cavinenguise me. Hane Jesús ne, cuitjin cachja me: ―¡Sacuatjin cachjá cojo nuju hisca ntsacu cavetsihin!
26Jemu tjin ná cjua xi cuichjá tsujun, hacuaha jemu tjin xi cjuaháchuva tsujun. Peru me xi catsingatju ná ne, quixi jain me cojo cjua rë me, hane ngahan ne, cjua xi cáhndë xi cachja me ne, cjua vëhë xi chjá nguehe ngasunhndë. ―Cuatjin cachja Jesús.
27Peru xutaxa rë xi cuacun jan ne, cajnii rcu me xi Jesús ne, tsëhë Nina Nahmi naja xi tichja me.
28Vëhë xi Jesús ne, cuitjin cachja me: ―Hya xi ngayun chjunihngun ná ngahan xi Quihndi rë Xuta Jain ngahan ne, hya cuijne rcun xi Ngahan Vi hmí ná. Hane ngahan ne, hatuxa tsajin mé xi sahme xi cojo cjuatacun naha suva ta sacuaha cjua xi cachja Nahmi naha cojo ná ne, cjua vëhë xi chjá.
29Hacuaha me xi catsingatju ná ne, tacun me cojo ná, cavejñaai ná me xi suva ta, tsëhë xi ngahan ne, hatuxa sahme tutjin xi chuya rë me. ―Cuatjin cachja Jesús.
30Hane xi cachja Jesús cjua vëhë ne, jemu cjín xuta camangu cacun me cojo rë me.
31Ngajan xi Jesús ne, cachja me cuitjin cojo xutaxa rë yungun xi camacjain rë tsëhë cjua rë me: ―Sa xi ngayun cuangun nduju xi quitahá rcun cjua naha ne, quixi xi ha camá ngayun xuta ladu naha.
32Hacuaha cuijne rcun xi hmí rë cjuaquixi, hane cjuaquixi jan ne, cuëhëndaya nuju. ―Cuatjin cachja Jesús.
33Ngajan xi xutaxa rë xi cuacun jan ne, cuitjin cafayangui me: ―Peru ngayaan ne, tjë rë xutachanga naja Abraham má ngayaan, hane cjëë camahani cuma ngayaan mosu hndixahan rë xuta. ¿Mé má nújun xi cumandaya ngayin? ―Cuatjin cafayangui me.
34Hane Jesús ne, cuitjin cafayangui me: ―Cuichjá cojo nuju cjuaquixi ta yëjë ni xuta xi hincha me ndiya rë cjuatsehen ne, hatuxa tjinhñu me cojo cjuatsehen sacuatjin tjinhñu ngu mosu hndixahan cojo nai rë.
35Ngu mosu hndixahan ne, hacuiin hatuxa cuiyujucahndë ngajñi xuta xi ndava, peru ngu quihndi xi cjuaquixi ne, hatuxa tsëhë xuta xi ndava.
36Vëhë xi sa xi Quihndi rë Nina cuëhëndaya nuju ne, cumandaya jain ngayun cojo cjuaquixi.
37Ngahan ne, hacuaha hvë xi tjë rë Abraham má ngayun. Peru ngayun ne, tivinchun chuva rë xi nicuhun ná, tsëhë xi tuun cahndë́ xi cuisehen cjua naha cahntsua xahasen nuju.
38Ngahan ne, xcusun xi cahvë hiscan tacun Nahmi naha ne, tsëhë vëhë xi tichjá. Peru ngayun ne, sacuatjin canuhyun xi cachja nahmi nuju ne, cuatjin tinihñu. ―Cuatjin cafayangui Jesús.
39Ngajan xi xutaxa rë xi cuacun jan ne, cuitjin cachja me: ―Nahmi niji ne, hacui xutachanga naja Abraham. ―Cuatjin cachja me. Ngajan xi Jesús ne, cuitjin cachja me: ―Sa xi quixi xi quihndi rë Abraham má ngayun ne, sacuatjin casahmi Abraham ne, hacuaha cuatjin nihñu.
40Ngahan ne, cachjá cojo nuju cjuaquixi xi cáhndë xi cachja Nina, peru quihndë ne, tivinchun chuva rë xi nicuhun ná. Xutachanga naja Abraham ne, casahmii me cuatjin.
41Ngayun ne, sacuatjin casahmi nahmi nuju ne, hacuanitjin ni tinihñu. ―Cuatjin cachja Jesús. Ngajan xi xutaxa rë xi cuacun jan ne, cachja me cuitjin: ―Ngayin ne, hacuiin quihndi xca ngayin. Nina ne, ngu ni me vëhë xi Nahmi niji. ―Cuatjin cachja xutaxa rë xi cuacun jan.
42Hane Jesús ne, cuitjin cachja me: ―Sa xi quixi xi Nahmi nuju Nina ne, hacuaha canihñu hmu tacún ná ta, tsëhë xi ngahan ne, Nina catsingatju ná me, hane quihndë ne, nguehe tejña. Ngahan ne, hacuiin cjuatacun naha suva xi canduvá ta me vëhë catsingatju ná me.
43¿Mé má vijnii rcun cjua xi chjá? Cuatjin vijnii rcun ta, tsëhë xi caain nuju visiñuju cjua naha.
44Ngayun ne, quihndi rë nahmi nuju Satanás ngayun, hane xcusun xi meje rë nahmi nuju ne, xcusun vëhë xi meje nihñu. Xitsehen xi matitjun vë ne, hisca ntsacu cavetsihin ne, hatuxa tsiquehen vë xuta. Hatuxa tsajin jiya vë ngajñi rë cjuaquixi ta, tsëhë xi tsajin cjuaquixi ngajñi rë cjuatacun rë. Hya xi chja xitsehen vë cjuandacha ne, chja sacuatjin xcusun rë suvá ta, tsëhë xi hatuxa ndacha, hacuaha nahmi rë yëjë ni cjuandacha.
45Peru ngahan ne, tsëhë xi chjá cjuaquixi ne, vëhë xi macjaain nuju ngahan.
46¿Jarë ngayun xi cuma ninguixun xi ngahan ne, tjin jyë́ naha? Sa xi chjá xi cjuaquixi ne, ¿mé má macjaain nuju ngahan?
47Me xi tsëhë jain Nina ne, vetaharcu me cjua rë Nina. Ngayun ne, tsëhë xi hacuiin tsëhë Nina ngayun ne, vëhë xi mijí cuetuhunrcun cjua rë me. ―Cuatjin cachja Jesús.
48Hane xutaxa rë xi cuacun jan ne, cuitjin cachja me cojo Jesús: ―¡Hatuxa cjuaquixi xi nújin hya xi nújin xi ngayun ne, ngu xuta samaritano ngayun hacuaha jiya xitsehen xahasen nuju! ―Cuatjin cachja xutaxa rë jan.
49Ngajan xi Jesús ne, cuitjin cafayangui me: ―Tsajin xitsehen xahasen naha. Ngahan ne, fahárcun Nahmi naha, hane ngayun ne, choho nújun tsahan.
50Hacuaha mijí sahme jyë sahme hnga suva yojo naha. Tjin ngu me xi meje sahmi jyë sahmi hnga ná, hane me vëhë ne, tsichuva naja me cojo cjuatacun naja.
51Cuichjá cojo nuju cjuaquixi ta xuta xi cuihndë me tsëhë cjua naha ne, hatuxa tsajin nu tsajin nixtin xi cueya me. ―Cuatjin cafayangui Jesús.
52Hane xutaxa rë xi cuacun jan ne, cuitjin cachja me cojo Jesús: ―Quihndë matsejenndaja xi jiya jain xitsehen xahasen nuju. Xutachanga naja Abraham ne, cahme me, hacuaha yëjë profeta ne, cahme me, hane sehe ngayun nújun xi xuta xi cuihndë me tsëhë cjua nuju ne, hatuxa tsajin nu tsajin nixtin xi cueya me.
53¡Ja!, peru ¿há hitsë sa matitjun ngayun xi cuma rë xutachanga naja Abraham, me xi cahme ni? ¡Hacuaha cahme yëjë profeta! ¡Ngayun tinihñu yojo nuju sacuaha xi jemu matitjun ngayun! ―Cuatjin cachja xutaxa rë jan.
54Hane Jesús ne, cuitjin cafayangui me: ―Sa xi sahme jyë sahme hnga suva yojo naha ne, cjua xi cuichjá tsahan ne, cuenguiin camahani chji rë. Peru Nahmi naha, me xi nújun xi Nina nuju ne, me vëhë xi sahmi jyë sahmi hnga ná me.
55Ngayun ne, hyúun me, peru ngahan ne, hvë me. Sa xi ngahan cuichjá xi hveen me ne, tangun ndacha ngahan cojo nuju ngayun. Peru ngahan ne, hvë me, hacuaha víhndë tsëhë cjua rë me.
56Xutachanga naja Abraham ne, jemu ndaja camá rë me xi satë rë me xi scuëë me nixtin xi cuinduva ngahan. Hane cavëë jain me, hacuaha jemu sua camá rë me. ―Cuatjin cafayangui Jesús.
57Ngajan xi xutaxa rë xi cuacun jan ne, cuitjin catsixcuehyu me Jesús: ―Hisca cjëë yachantë nu tjin nuju. ¿Há cahyun xutachanga naja Abraham ni? ―Cuatjin cachja me.
58Hane Jesús ne, cuitjin cachja me: ―Cuichjá cojo nuju cjuaquixi ta hisca chaja sa xi tsin xutachanga naja Abraham ne, ngahan ne, Ngahan Vi hmí ná. ―Cuatjin cachja Jesús.
San Juan 8
San Juan 8:2-58