San Juan 8:2-23

²Junsi ayuna nanchi quepenan Diosichi yaca manjito, junbi chudito manmicarie. Layanla yaca merábi jaca jolajominue.

³Junni micarinasanan, israelítala tala mantaminla jalaie. Yala tala mantaca micariminlabe fariséolabe jominlanue. Junni aman yalari sona mancaca caya suwaca jominlanue uyanchi unilabe catsonaminca. Junni israelita mantaminlari jun sonaca tanjato, quitsabi wirucarito,

⁴Jesube itsanlatie: —Nuri micarimin joto, chiquilabe pade! tilatie. In sonaca caya suwalaquinue uyanchi unilabe catsonaminca.

⁵Aman Moisés Diosichi mantaca Diosichi Pilabi chuteto, chiquilaca mantanue latie. Tsanhiminlaca su walacachi quito totelaquisa mantanue latie. ¿Nuri niyan tiyun? tilatie.

⁶Junni yalari Jesuca falta patarichiqueri tsanlatinaminhe. Jesús mantimini dedeisi, tobi temisuchi pila quee.

⁷Junni yalari capanhalaquinasanan, Jesuri manwiruito itsantie: —Nula manca jutsaca numanan quitumin jotori, casale su walacachi quede! tie.

⁸Tsantisi, manan dedeisi tobi temisuchi pila manquee.

⁹Junni sonaca tanjaminlari Jesús pacaca meráto, yalanan jutsa quiminla joyoeque tenhito jera manjinilaie. Unicala casale manjilaie; jun benele mosolanan jera manjilaie. Junni jera manjicala josa, Jesuri mancasiri puraica jominhe. Ya sonanan quitsale cawiruraminhe.

¹⁰Junni Jesús manwiruito quiranari, sonari wiruraminhe. Junni ya sonabe itsantie: —¿Manjicala joco? ¿Monantiya nuca su walacachi quitulajoco? tie.

¹¹Junni ya sonari Miya, monantiya quitue tie. Junni Jesuri lanan quitiyoe tie. Manjiniide! Juntonan jutsa manquituna! tie.

¹²Junni aman Jesuri israelítalaca manan manmicarito itsantie: —La jeralelachi tenca tenchi tseno joyoe tie. Labe penenaminlari nemenbi cuwenta chularatuchunae; sonnasa carimin tsenbi chularachunae tie.

¹³Junni Jesús tsantinunsi, fariséolari itsanlatie: —Nu tencachique fe joyoe tinae. Tencachique pánanun fiquiri quereituntsan joe latie.

¹⁴Junni Jesuri beconan itsantie: —Lari nunchi nechi jaca jonunca mirayoe. Nunchi manjino jonuncanan mirayoe tie. Jun tenchi tencachique fe joyoe tinatonan, quereintsan fiquica pánayoe tie. Nulari natiya miitolajoe la nunchi nechi jaca jonunca, o nunchi manjino jonuncanan.

¹⁵Nulari tsachilaca culpa quinato, cacachi quirato jamoleri miito culpa quiminlae. Lari mocanantiya culpa quitumin joyoe tie.

¹⁶Tsanni culpa quitutonan, tsachilaca miimin joyoe culpa talaranunca. Junto la tsachilaca culpa tanunca miitonan, tenca mántari miitiyoe tie. Lachi Apari laca erecae. Junni lachi Apabe labe paluito miiminlayoe. Junto lari tsachilaca miito, tsarasica miimin joyoe tie.

¹⁷¿Nulachi mantabi juncanan pila chuteca jotun? tie. ¿Paluca testicola palaquinari, tsa joe tintsan joeque chuteca jotun? tie.

¹⁸La tencachiqueca pánayoe. Junsi lachi Apa laca eremin joto, yanan laca pánae tie.

¹⁹Junni fariséolari Jesube manpanhato itsanlatie: —¿Nuchi apa tile chun? latie. Jesunan itsantie: —Lacanan, lachi Apacanan nula miitolajoe. Laca miralaramanpari, lachi Apacanan miica jono jominla jonhoe tie.

²⁰Jesús Diosichi yabi jun fiquica micarie cala canun postote. Jesús micarinasanan, yaca cano óra cafetunan, monantiya yaca cadolaquitunue.

²¹Junni aman Jesuri ya israelítalabe manan cuenta quito itsantie: —La manjino joyoe tie. Junni nulari laca neyato, fetuto, jutsaca tannan puyalaichunae tie.

²²Junni Jesús tsantinunsi, yala tala itsanlatinue: —¿Niyaito Jesús jino jonunca chiquilanan jino podeilaituchunae tin tinan? latie. ¿O tenca mántanan puyachunancan? latie.

²³Junni Jesuri yalabe itsantie: —La jamochi nechi joyoe; nula in tote nechi jolajoe. Nula in tote chumin tsachila jolajoe; lari in tote nechi tsachi itoyoe tie.