San Juan 8:18-37

¹⁸Mane nain na pian aizpa kaiztus. Mamazkas, ap Taittakas, nawa ɨnintamikakas, us pian aizpa kawarain kaiztus.

¹⁹Suasne uspane mɨmaara: —¿Mɨntama tui up Taitta? Jesúsne sɨnkanara: —Une nawakas ap Taittarakas pianchimai. Nawa piankamtaratne, une ap Taittarakas piankamashina.

²⁰Dios katsa yalkin pial sapmukin kamtanamtuasmin, Jesúsne sun kizta aizpa kaiznara. Mɨnminkas ussa pizshiarachi, paiña naiztu payu taiztachi akwa.

²¹Jesúsne mamasa kaiznara: —Nane ɨru. Une nawa sayanazi. Kwail kiamtu akwa, une ianazi. Une na ɨmtura ɨasachi.

²²Suasne Judío ɨninturuzne kaizara: —U na ɨmtura ɨasachi kaiztu akwa, ¿Ussain piantamtuki?

²³Suasne Jesúsne kaiznara: —U an sukin pura akwa, une apas kal mɨj. Na kwashpas at akwa, nane chiyuras kal mɨj ish. Une an sukin uzamtu. Nane chiyuras atmika ish.

²⁴Katmizna uruza ka kiznarau: “Kwail kiamtu akwa, une ianazi. U na watsat mɨltamika ish nɨjkulamtukine, une kwail kiat kit ianazi.”

²⁵Suasne mɨmaara: —¿Nune mɨntas mas? Nune watsat mɨltamika chi. Jesúsne sɨnkanara: —An ñamin uruza nane mɨnmika i kaiznarau.

²⁶Nane uruza akkwan pit kaiznawaish. U kwail akwa, nane uruza kwail kiamtu kiznat kit naizninnanazi. Nawa ɨnintamikane watcha kaiztu. Nane us nawa kaizta aizpa uruza paranamtus.

²⁷Uspane Papihshpa paraka mɨarachi.

²⁸Katmizna kaiznara: —Nawa chiyuras Ampura kurishta patpianka, une nawa piankamaanazi. Nane uruza mɨnma ish kiznarau. Apminpain kimtuchish, na ap Taitta nawa kamtara aizpa kamtanamtu akwa.

²⁹Nawa ɨnintamikane nakasa tu. Ap Taittane nawa kwairachi, na us pashimtu aizpa kimtu akwa.

³⁰Jesús sun kizkane, kwisha akkwan awane ussa nɨjkulara.

³¹Suasne Jesúsne Judío awa ussa nɨjkultaruza kaiznara: —U na kamtara aizpa nil kiamɨztane, une ap kammuruz namashina.

³²Suasne une watcha piankamanazi. An watcha pitne uruza kwailtas puzninnanazi, Dios uruza watsat mɨlnamtu akwa.

³³Uspane ussa sɨnkaara: —Aune Abrahampa kwal makpas. Katmizna aune kwail aizpa kimtuchimakpas. Nune au kwail kiamtumakpas kizsachi.

³⁴Jesúsne kaiznara: —Watcha kaiznamtus. Wan kwail kimtuzne sun kiamtu, kwail kiashimtu akwa.

³⁵Kal kiwainmumikane pailta payu anpatpa yalta kal kimtu. Mɨnminkas ussa chɨht ɨninsachi. Yalpamikakas, paiña kwalkas kal kiwaintuza chɨht ɨninnashina.

³⁶Katmizna Dios Painkulne u kwail kiarɨt aizpa watkulninnashina, us Papihshkasa uztu akwa. Painkul uruza wat kulninnashimtune, usne u kwail kiarɨt aizpa wat kulninnashina, sunpa chɨhtnapa.

³⁷Nane u Abrahampa kwal mai pianish. Na kamtara aizpa mɨarachi akwa, une nawa piantaashimtu.