San Juan 8:14-25

¹⁴Istakꞌwi Comam: —Waxan̈ca caw han-caw-inan chiwalan yin̈ tzet wehan, yaj caw isyelal sunil tzet chiwalan. Yuto hanintiꞌan wohtajan baytuꞌwal titnajinan, caw wohtapaxojan baytuꞌwal chi-caw-intocojan. Walex hex tiꞌ, caw mach heyohtajo baytuꞌwal titnajinan, yeb baytuꞌwal chintopaxojan.

¹⁵Walex hex tiꞌ, caw comonn̈eticꞌa chexoc heyilaꞌ tzet ye anma, yaj walinan mach ton̈eticꞌaho chinocan wilaꞌan tzet chielico anma.

¹⁶Yajaꞌ yet chiwilnihan yin̈ tzet chielico anma, chiwilan yin̈ caw istoholal, yuto mach inchuquilojan chiwilan tzet chielico anma, to haꞌ hun Inmaman an̈eintijan, haꞌ chiilni tzet chielico anma wintajan.

¹⁷Chal hecuybanil tato ay cawan̈o testigo lahan yalni yin̈ hunu tzet ye tuꞌ, caw yel huneꞌ tuꞌ chal tuꞌ.

¹⁸Ilwecꞌanab xin, ay cawan̈ mac chakꞌ testigohal. Caw testigo wehicojan win̈an, yeb xin Inmaman an̈eintijan haꞌ chitzotel win̈an, ẍi Comam tet ebnaj.

¹⁹Lahwi tuꞌ xin iskꞌamben ebnaj tet Comam: —¿Baytuꞌwal ay hamam tuꞌ xin? ẍi ebnaj. Istakꞌwi Comam tet ebnaj: —Hex tiꞌ, mach quinheyohtajojan, caw xin mach heyohtajo Inmamtuꞌan. Kꞌinalo tato quinheyohtajan, heyohtapaxo Inmaman, ẍi Comam.

²⁰Hayet iscuywa Comam Jesús yul yatut Comam Dios yalnicano Comam huntekꞌan tiꞌ, iscawilal bay chibey anma yakꞌaꞌcano yofrenda. Yaj xin machi hunu mac tzabnayo Comam, yuto maẍto chiapni istzꞌayical bay chicami.

²¹Yalnipaxo Comam Jesús hunelxa: —Hanintiꞌan chintohan, wal xin chinhesayaꞌcojan yajaꞌ mach chinilchahan heyu, yuto mach chu heto bay chintotuꞌan. Walex hex tiꞌ yin̈ hemul chexcamcantoj, ẍi Comam.

²²Yuxin yal ebnaj yahawil yin̈ con̈ob Israel: —¿Tom xin chispotxꞌ isba naj, yuxinto chal naj tato caw mach chu japni bay chiapni naj tuꞌ? ẍi ebnaj yin̈ Comam.

²³Yalnipaxo Comam tet ebnaj: —Walex hex tiꞌ, caw yet sat txꞌotxꞌal heyehi, wal intiꞌan yet satcan̈ wehan, caw yet yul sat yiban̈kꞌinal tiꞌ heyehi, wal inpaxojan mach yeto sat yiban̈kꞌinal tiꞌ wehan.

²⁴Yuxinto caw chiwalan teyet tato yin̈ hemul chexcami, yuto mach chechayto yul heyanma tato haninan huneꞌ hacaꞌ chiwute walnihan teyet, yuxinto caw yin̈ hemul chexcamtoj, ẍi Comam tet ebnaj.

²⁵Iskꞌambenpaxo ebnaj tet Comam: —¿Mac hach anmahil chal tuꞌ? ẍi ebnaj. Yalni Comam tet ebnaj: —Halbilxaticꞌa teyet wuhan yet yalan̈tocanoj mac anmahilinan.