SAN JUAN 8:1-40

¹Liꞌ nduꞌu Jesús, ndyaa yu sca ti nde caꞌya Olivos chaꞌ chcuiꞌ yu loꞌo ycuiꞌ Ndyosi.

²Pana tsa cua cuxee ti, xaꞌ ndatu̱ Jesús neꞌ laa tonu. Liꞌ ndyuꞌu tiꞌi̱ lcaa ñati̱ ca slo yu. Ca biꞌ ndyacaꞌa̱ yu nguluꞌu yu chaꞌ jiꞌi̱ ycuiꞌ Ndyosi jiꞌi̱ nguꞌ.

³Liꞌ ya̱a̱ nguꞌ fariseo biꞌ slo Jesús, loꞌo nguꞌ mstru chaꞌ joꞌó, ya̱a̱ loꞌo nguꞌ jiꞌi̱ sca nu cunaꞌa̱ nu ndacui quiꞌya jiꞌi̱. Cua ngujui nu cunaꞌa̱ biꞌ jiꞌi̱ nguꞌ la cuiꞌ tyempo nu nguaꞌa̱ choꞌ loꞌo clyoꞌo xaꞌ ñati̱. Liꞌ nguxatu̱ nguꞌ biꞌ jiꞌi̱ nu cunaꞌa̱ biꞌ claꞌbe laja su ndiꞌi̱ nguꞌ.

⁴Nchcuiꞌ nguꞌ loꞌo Jesús liꞌ: ―Mstru ―nacui̱ nguꞌ biꞌ―, cua ngujui nu cunaꞌa̱ re jiꞌi̱ ya la cuiꞌ tyempo loꞌo nguaꞌa̱ choꞌ loꞌo clyoꞌo xaꞌ ñati̱ ―nacui̱ nguꞌ jiꞌi̱ Jesús―.

⁵Cuentya jiꞌna, cuentya jiꞌi̱ chaꞌ nu cua nda jyoꞌo Moisés loꞌo na, ntsuꞌu chaꞌ cujuiꞌi̱ na quee jiꞌi̱ choꞌ cua chaꞌ cujuii na jiꞌi̱. ¿Ñiꞌya̱ ñacui̱ ta nuꞌu̱ jiꞌi̱?

⁶Na nchcuiꞌ cuayáꞌ ti nguꞌ biꞌ loꞌo Jesús, chaꞌ cua ntiꞌ nguꞌ caja chaꞌ jiꞌi̱ nguꞌ ñiꞌya̱ caca sta nguꞌ quiꞌya jiꞌi̱ Jesús. Biꞌ chaꞌ ñiꞌya̱ nu ngaꞌa̱ ti yu ndatiꞌi̱chu̱ꞌ yu xi, nguscua loꞌo sne yaꞌ ti yu lo yuu.

⁷Loꞌo juaꞌa̱ nchcuane nguꞌ jiꞌi̱ Jesús chaca quiyaꞌ. Liꞌ ndacaꞌa̱ liñi Jesús, nchcuiꞌ yu loꞌo nguꞌ nu ya̱a̱ loꞌo jiꞌi̱ nu cunaꞌa̱ biꞌ: ―Loꞌo ntsuꞌu tsaca cuꞌma̱ nu ná ntsuꞌu quiꞌya jiꞌi̱ ma̱ ―nacui̱ yu―, biꞌ caca nu cujuiꞌi̱ quee jiꞌi̱ nu cunaꞌa̱ cua clyo.

⁸Liꞌ xaꞌ ndatiꞌi̱chu̱ꞌ Jesús nscua loꞌo sne yaꞌ ti yu lo yuu, ngaꞌaa nchcuiꞌ yu liꞌ.

⁹Loꞌo ndyuna nguꞌ chaꞌ biꞌ, nguxana nguꞌ ngutuꞌu nguꞌ ndyaa nguꞌ liꞌ, chaꞌ cua jlo tiꞌ nguꞌ chaꞌ ntsuꞌu quiꞌya jiꞌi̱ ycuiꞌ nguꞌ. Clyo la ndyaa nu nguꞌ cusuꞌ la, liꞌ ndyaa lcaa nguꞌ cuentya sca ti nguꞌ. Liꞌ ndyanu Jesús chaca tya yu, loꞌo ñaꞌa̱ ti ndu̱ nu cunaꞌa̱ biꞌ ntajatya jiꞌi̱ yu ni jacuaꞌ chcuiꞌ yu loꞌo.

¹⁰Ndacaꞌa̱ Jesús chaca quiyaꞌ, liꞌ nacui̱ yu jiꞌi̱ nu cunaꞌa̱ biꞌ: ―¿Macala ndyaa nguꞌ jua? ―nacui̱―. ¿Ha tya ndu̱ nu ngusta quiꞌya jinuꞌu̱?

¹¹―Ná tucui ndu̱ nu ngusta quiꞌya ꞌna, cusuꞌ ―nacui̱ nu cunaꞌa̱ biꞌ. ―Tsoꞌo lacua ―nacui̱ Jesús jiꞌi̱―. Juaꞌa̱ naꞌ, ná ntsuꞌu quiꞌya nu sta naꞌ jinuꞌu̱. Tyaa clya nuꞌu̱ juani ―nacui̱―, ngaꞌaa cuaꞌni la nuꞌu̱ chaꞌ cuxi.

¹²Chaca quiyaꞌ nda Jesús chaꞌ loꞌo nguꞌ neꞌ laa biꞌ. ―Naꞌ laca̱ nu nda̱ xee chaꞌ tyuꞌú neꞌ cresiya jiꞌi̱ ñati̱ ―nacui̱ yu―. Tyanu xee lubii jnaꞌ neꞌ cresiya jiꞌi̱ ñati̱ nu xñi chaꞌ jnaꞌ, loꞌo juaꞌa̱ ná ngaꞌa̱ chaꞌ tye chalyuu jiꞌi̱ nguꞌ biꞌ liꞌ; ngaꞌaa ntsuꞌu chaꞌ tyaꞌa̱ yuꞌu nguꞌ biꞌ, ñiꞌya̱ nu nduꞌni nguꞌ nu ná ntsuꞌu xee jnaꞌ neꞌ cresiya jiꞌi̱ tsiyaꞌ ti.

¹³Liꞌ nacui̱ nguꞌ fariseo jiꞌi̱ Jesús: ―Sca ti nuꞌu̱ nda chaꞌ liñi cuentya jiꞌi̱ ycuiꞌ ca. Ná tucuá nguꞌ chaꞌ jinuꞌu̱ si chcuiꞌ nuꞌu̱ juaꞌa̱.

¹⁴Nguxtyacui Jesús chaꞌ loꞌo nguꞌ liꞌ: ―Tucuá nguꞌ chaꞌ nu ta naꞌ loꞌo nguꞌ tuꞌni. Masi sca ti naꞌ nda̱ chaꞌ liñi cuentya jiꞌi̱ ycuiꞌ ca naꞌ ―nacui̱ yu―. Cua jlo tiꞌ naꞌ macala ngutuꞌu naꞌ, loꞌo cua jlo tiꞌ naꞌ ma nde tsaꞌa̱; pana nu cuꞌma̱ ni, ná jlo tiꞌ ma̱ tsiyaꞌ ti mala ngutuꞌu naꞌ, ná jlo tiꞌ ma̱ ma nde tsaꞌa̱ ―nacui̱ Jesús jiꞌi̱ nguꞌ―.

¹⁵Cua laca ngusta ma̱ yabeꞌ chu̱ꞌ naꞌ. Loꞌo ndyuꞌni ma̱ juaꞌa̱, ndyuꞌni ma̱ ñiꞌya̱ nduꞌni ñati̱ chalyuu ti. Siꞌi na lijya̱ naꞌ chalyuu chaꞌ sta naꞌ yabeꞌ chu̱ꞌ ñati̱ ―nacui̱―,

¹⁶pana taca cuaꞌni cuayáꞌ naꞌ jiꞌi̱ ñati̱. Loꞌo cuaꞌni cuayáꞌ naꞌ jiꞌi̱ nguꞌ ni, liñi chaꞌ nu ta naꞌ liꞌ, chaꞌ siꞌi ycuiꞌ ti naꞌ cuaꞌni cuayáꞌ naꞌ jiꞌi̱ nguꞌ liꞌ; loꞌo naꞌ loꞌo ycuiꞌ Ndyosi nu nda jnaꞌ lijya̱a̱ re, stuꞌba ti cuaꞌni cuayáꞌ ya jiꞌi̱ nguꞌ liꞌ ―nacui̱ Jesús―.

¹⁷Ndaquiyaꞌ tsa na jiꞌi̱ chaꞌ cusuꞌ nu nscua lo quityi cua saꞌni la; ndacua nscua sca chaꞌ nu nchcuiꞌ chaꞌ tyuꞌu lubii ñati̱ jiꞌi̱ scaa chaꞌ nu ntsuꞌu jiꞌi̱, nu loꞌo stuꞌba ti chcuiꞌ tucua tyaꞌa nguꞌ jiꞌi̱ chaꞌ biꞌ.

¹⁸Tsaca nguꞌ biꞌ laca naꞌ ―nacui̱ Jesús―, chaꞌ nchcuiꞌ naꞌ chaꞌ liñi cuentya jiꞌi̱ ycuiꞌ ca naꞌ; nu chaca nguꞌ biꞌ laca Sti naꞌ nu nda jnaꞌ lijya̱a̱ re.

¹⁹―¿Macala ntsuꞌu Sti nuꞌu̱ lacua? ―nacui̱ nguꞌ jiꞌi̱ Jesús liꞌ. ―Ná nslo ma̱ jnaꞌ tsiyaꞌ ti, loꞌo la cuiꞌ ti ná nslo ma̱ jiꞌi̱ Sti naꞌ ―nacui̱ Jesús jiꞌi̱ nguꞌ―. Si cua ndyuloo ma̱ jnaꞌ, la cuiꞌ juaꞌa̱ cua ndyuloo ma̱ jiꞌi̱ Sti naꞌ liꞌ.

²⁰Nacui̱ Jesús juaꞌa̱ loꞌo nguluꞌu yu jiꞌi̱ nguꞌ neꞌ laa tonu, ntucua yu cacua ti su ndu̱ cñáꞌ su cujuiꞌi̱ nguꞌ cñi nu caca msta̱ jiꞌi̱ nguꞌ neꞌ laa. Loꞌo ná tucui nguaꞌni chaꞌ tejeyaꞌ jiꞌi̱ Jesús, chaꞌ tsaa loꞌo jiꞌi̱ yu niꞌi̱ chcua̱, chaꞌ tya lyiji tyalaa tyempo jiꞌi̱ yu chaꞌ xcubeꞌ nguꞌ xñaꞌa̱ jiꞌi̱ yu.

²¹Liꞌ xaꞌ nchcuiꞌ Jesús loꞌo nguꞌ: ―Tsaꞌa naꞌ ―nacui̱ yu―, liꞌ tsaana ma̱ jnaꞌ ca su ndyaꞌa̱ naꞌ, pana ná quije naꞌ jiꞌi̱ ma̱ tsiyaꞌ ti ―nacui̱―. Tya lyiji quije naꞌ jiꞌi̱ ma̱ loꞌo cajaa ycuiꞌ ma̱ ñaꞌa̱ loꞌo cresiya cuxi jiꞌi̱ ma̱, pana ná caja chacuayáꞌ tsaa ma̱ ca su tyiꞌi̱ naꞌ liꞌ.

²²―¿Ha cujuii yu jiꞌi̱ ycuiꞌ ca yu? ―nacui̱ nguꞌ judío jiꞌi̱ tyaꞌa nguꞌ―. ¿Ha juaꞌa̱ ntsuꞌu tyiquee yu loꞌo nacui̱ yu: “Ná caja chacuayáꞌ tsaa ma̱ ca su tyiꞌi̱ naꞌ liꞌ”?

²³Biꞌ chaꞌ tya nda la Jesús xi chaꞌ loꞌo nguꞌ biꞌ: ―Nde chalyuu su ndiꞌi̱ cuꞌma̱ cuxi tsa nduꞌni ñati̱; pana naꞌ ni, chaca chalyuu ca slo ycuiꞌ Ndyosi ngutuꞌu naꞌ ―nacui̱ yu―. Cua nguiꞌi̱ ma̱ jiꞌi̱ nu cuxi nu nduꞌni ñati̱ chalyuu; pana naꞌ ni, ntsuꞌu tyiquee naꞌ jiꞌi̱ ycuiꞌ Ndyosi Sti naꞌ ca su ntucua ycuiꞌ Ni ―nacui̱ Jesús―.

²⁴Biꞌ chaꞌ ni naꞌ jiꞌi̱ ma̱ chaꞌ cajaa ycuiꞌ ma̱ ñaꞌa̱ loꞌo cresiya cuxi jiꞌi̱ ma̱; chañi chaꞌ biꞌ: cajaa ma̱ ñaꞌa̱ loꞌo cresiya cuxi jiꞌi̱ ma̱, si ná jlya tiꞌ ma̱ chaꞌ laca naꞌ ñiꞌya̱ nu ni naꞌ jiꞌi̱ ma̱ chaꞌ laca naꞌ.

²⁵―¿Tilaca laca nuꞌu̱ lacua? ―nacui̱ nguꞌ jiꞌi̱ Jesús liꞌ. ―Tya tsubiꞌ ni naꞌ jiꞌi̱ ma̱ tilaca laca naꞌ ―nacui̱ Jesús liꞌ―.

²⁶Tya quiñaꞌa̱ la chaꞌ taca chcuiꞌ naꞌ loꞌo ma̱ nquichaꞌ cuentya jiꞌi̱ quiꞌya nu ntsuꞌu jiꞌi̱ ma̱; pana liñi tsa chaꞌ nu nda ycuiꞌ Ndyosi nu nda ꞌna lijya̱a̱, loꞌo juaꞌa̱ cua ñaꞌa̱ ca chaꞌ nu nda Ni loꞌo naꞌ, biꞌ ti chaꞌ laca nu nda naꞌ loꞌo ñati̱ chalyuu.

²⁷Ná ngua cuayáꞌ tiꞌ nguꞌ chaꞌ nu nchcuiꞌ Jesús loꞌo nguꞌ chaꞌ jiꞌi̱ ycuiꞌ Ndyosi Sti yu.

²⁸Biꞌ chaꞌ tya nchcuiꞌ la Jesús loꞌo nguꞌ liꞌ: ―Tiyaꞌ la loꞌo sicua̱ ma̱ jnaꞌ lo crusi, liꞌ caca cuayáꞌ tiꞌ ma̱ chaꞌ laca naꞌ ñiꞌya̱ nu ni naꞌ jiꞌi̱ ma̱, naꞌ nu lijya̱a̱ chalyuu chaꞌ caca̱ ñati̱ ―nacui̱ Jesús―. Ná sca cña nduꞌni naꞌ chacuayáꞌ jiꞌi̱ ycuiꞌ ca naꞌ; ycuiꞌ Ndyosi Sti naꞌ, biꞌ laca nu nguluꞌu ꞌna lcaa ca chaꞌ nu nchcuiꞌ naꞌ ―nacui̱―.

²⁹Lcaa tsa̱ ndiꞌi̱ Ni loꞌo naꞌ, ycuiꞌ Ni laca nu nda jnaꞌ lijya̱a̱ re. Ná nguxtyanu Sti naꞌ jnaꞌ, chaꞌ xcuiꞌ cña nu ndiya tiꞌ Ni, biꞌ laca cña nu nduꞌni naꞌ.

³⁰Loꞌo ndyuna nguꞌ chaꞌ nchcuiꞌ Jesús juaꞌa̱, tyu̱u̱ tyaꞌa nguꞌ ngusñi hique ti nguꞌ chaꞌ nu nchcuiꞌ yu.

³¹Loꞌo liꞌ nda Jesús chaꞌ loꞌo nguꞌ judío nu jlya tiꞌ jiꞌi̱ yu. ―Loꞌo tyanu chaꞌ nu nclyuꞌu naꞌ jiꞌi̱ ma̱ neꞌ cresiya jiꞌi̱ ma̱, chaꞌ jiꞌi̱ ycuiꞌ Ndyosi biꞌ, liꞌ chañi chaꞌ laca ma̱ ñati̱ nu ndyaca tsaꞌa̱ jnaꞌ ―nacui̱ Jesús jiꞌi̱ nguꞌ―.

³²Liꞌ taca ca cuayáꞌ tiꞌ ma̱ lcaa chaꞌ liñi; ná tucui caca tatsaa jiꞌi̱ ma̱ chaꞌ cuaꞌni ma̱ cña cuxi ca su ndiꞌi̱ ma̱, xquiꞌya chaꞌ jlo tiꞌ ma̱ chaꞌ liñi biꞌ.

³³―Ñati̱ jiꞌi̱ jyoꞌo Abraham laca ya ―nacui̱ nguꞌ judío biꞌ―, ni sca ñati̱ bilya tatsaa jiꞌi̱ ya chaꞌ cuaꞌni ya cña cuxi. ¿Ñiꞌya̱ ntiꞌ ta nuꞌu̱ loꞌo nacui̱ nuꞌu̱ chaꞌ: “Ngaꞌaa tatsaa nguꞌ jiꞌi̱ ma̱ chaꞌ cuaꞌni ma̱ cña cuxi ca su ndiꞌi̱ ma̱”? ―nacui̱ nguꞌ judío biꞌ jiꞌi̱ Jesús.

³⁴―Liñi tsa chaꞌ ta naꞌ loꞌo ma̱ juani ―nacui̱ Jesús liꞌ―, chaꞌ cua laca ntsuꞌu xuꞌna ñati̱ chalyuu, lcaa ca ñati̱ nu ntsuꞌu quiꞌya jiꞌi̱ nguꞌ.

³⁵Loꞌo sca ñati̱ nu ntsuꞌu xuꞌna ni, cua laca ti hora ndyiji chaꞌ tsoꞌo jiꞌi̱ ca su ndiꞌi̱ yu toꞌ tyi xuꞌna yu, chaꞌ siꞌi ñiꞌya̱ laca sñiꞌ laca msu nu ndiꞌi̱ slo xuꞌna yu. Pana sñiꞌ nu xuꞌna biꞌ, lcaa tyempo ndiꞌi̱ sñiꞌ loꞌo sti, ndyiji tsa chaꞌ tsoꞌo jiꞌi̱ ―nacui̱ Jesús―.

³⁶Naꞌ nu laca̱ nu sca ti Sñiꞌ ycuiꞌ Ndyosi ni, loꞌo cuaꞌni lyaá naꞌ jiꞌi̱ ma̱, chañi chaꞌ ngaꞌaa caca tatsaa nguꞌ jiꞌi̱ ma̱ chaꞌ cuaꞌni ma cña cuxi chaca quiyaꞌ ca su ndiꞌi̱ ma̱ ―nacui̱―.

³⁷Cua jlo tiꞌ naꞌ chaꞌ tyaꞌa ñati̱ jiꞌi̱ jyoꞌo Abraham laca cuꞌma̱, pana cua ntiꞌ ma̱ cujuii ma̱ jnaꞌ chaꞌ ná ntucuá ma̱ chaꞌ nu nchcuiꞌ naꞌ loꞌo ma̱ ―nacui̱ Jesús―.

³⁸Nclyuꞌu naꞌ jiꞌi̱ ma̱ cua ñaꞌa̱ ca chaꞌ nu cua naꞌa̱ naꞌ slo ycuiꞌ Ndyosi Sti naꞌ, biꞌ laca chaꞌ nu nchcuiꞌ naꞌ loꞌo ma̱. Loꞌo cuꞌma̱ ni, nduꞌni ma̱ lcaa ñaꞌa̱ cña nu ngua tsaꞌa̱ ma̱ jiꞌi̱ sti ma̱, biꞌ cña nduꞌni ma̱.

³⁹Liꞌ nguxtyacui nguꞌ chaꞌ loꞌo Jesús: ―Jyoꞌo Abraham biꞌ ngua jyoꞌo cusuꞌ jiꞌi̱ ya, nu ngutiꞌi̱ cua saꞌni la ―nacui̱ nguꞌ. ―Si chañi chaꞌ laca ma̱ tyaꞌa ñati̱ jiꞌi̱ jyoꞌo Abraham biꞌ, liꞌ cuaꞌni ma̱ ñiꞌya̱ nu nguaꞌni ycuiꞌ Abraham biꞌ ―nacui̱ Jesús jiꞌi̱ nguꞌ biꞌ―.

⁴⁰Pana juani ntiꞌ tsa ma̱ cujuii ma̱ jnaꞌ, masi xcuiꞌ chaꞌ liñi ncluꞌu naꞌ jiꞌi̱ ma̱, la cuiꞌ chaꞌ liñi nu nda ycuiꞌ Ndyosi loꞌo na.