San Juan 7:5-44

⁵Ḻa' ni beṉ' bisheekan' bi wyajḻe'gake' c̱he'.

⁶Na'ch che' Jesúza' ḻegake': ―Biṉ' illin lla illin gor gon' daa llia bia' gon'. San le', bat'tez wak shajle.

⁷Beṉ' yell-lioki bibi de dii gonan ka gakzbangakile' le', san nadaan chakzbangakile' daa chepgakee malan' chongake'.

⁸Ḻi shaj le' lṉina'. San nad' bi saa, ḻa' biṉ' illin lla illin gor gak c̱ha' daa llia bia'.

⁹Biyoll golle' ḻegake' ka' na' bigaaṉe' Galileana' zi xtit.

¹⁰Na' ka wde wza' beṉ' bisheeka', ḻekzka' wzee wyaje' lṉina' do ngash'z.

¹¹Na' beṉ'ka' chṉabia' beṉ' Israelka' chiyiljgake'ne' lo lṉina', che' ljwellgake': ―¿Garaṉzi beena', lla?

¹²Na' ladj beṉ'ka' lle' lṉina', beṉ' zan choe'gake' xtill' Jesúza'. Baḻe' che': “Nake' beṉ' wen.” Na' zi baḻe' che': “Bi nake' beṉ' wen, ḻa' chdaze' chziyee beṉ'.”

¹³Per ni to kono biyaxji we' xtill' Jesúza' ka nḻa'z daa chllebgake' beṉ'ka' chṉabia' beṉ' Israelka'.

¹⁴Na' ba zej shoṉ tap lla chak lṉina' ka bllin Jesúza' gana' zoa yoodo'na' na' wzoloe' chli' chsedile' beṉ'.

¹⁵Na' chibani beṉ' Israelka', na' che' ljwelle': ―¿Nakra chak chli' chsedi beeni beṉ', len aga bi nsede'?

¹⁶Na' che' Jesúza' ḻegake': ―Diika' chli' chsedid' aga nakan dii chyiljlall'z', san beena' bseḻ' nad', ḻen' bli' bsedile' nad' diiki.

¹⁷Nottez beṉ' cheenile' gone' ka cheeni Chioza', wakbe'ile' shi daa chli' chsedid' nakan c̱he Chios wa shi nakan dii chyiljlall'z'.

¹⁸Beena' tobia'loze' cho'e xtillee, balaaṉ c̱he kwinzen' chyilje', san beena' chyilje' sho' beena' bseḻ' ḻe' balaaṉ, ḻen' cho'e dill' ḻi, na' aga bi dill' wxiye' cho'e.

¹⁹’Dii Moiséza' beṉe' le' ley c̱he Chioza', na' ni tole bi chonle ka nllian bia' gonle. ¿Bic̱he cheenzile witle nad'?

²⁰Na'ch beṉ'ka' lle' na' che'gake'ne': ―Dii x̱iwaan yoo no' ka'. ¿Noran cheeni wit li'?

²¹Na' che' Jesúza' ḻegake': ―Tochga yeḻ' waka' ba ble'ile ben' llana' chombaaṉcho na' yog'le chibanile.

²²Dii ḻi dii Moiséza' bene' byen yog'tele nakle beṉ' byo chiyaḻ' sho'le seṉ daa le circuncisión, ḻa'kzi aga ḻen' wzololene'n, san dii x̱ozxto'leka'ten. Daan chgoole bi' byodo'ka' seṉna' ḻa'kzi nakan lla chombaaṉcho.

²³Na' shi choe'le latj sho' bi' byodo'ka' seṉ daa le circuncisión lo llana' chombaaṉcho kwenc̱he gak ka na leya' daa bzej dii Moiséza', ¿bic̱he chllaazle nad' daa biyon' to beṉ' llana' chombaaṉcho?

²⁴Bi wc̱hogḻizle c̱he beṉ' shi bi chle'ile chone', san cheenin iṉezile nakyeṉ'an nakan kwenc̱he we'le dill' kon ka nakan.

²⁵Na'ch baḻ beṉ' Jerusalénka' nagake': ―¿Aaga beenin cheengakile' witgake', lla?

²⁶Ḻi wwia ka cho'e dill' ladj lkwe' beṉ', na' ni to kono bi che'. ¿Anti ba chajḻe'lzə beṉ' wṉabia'ka' nan dii ḻi beeni nake' Crístona', beena' wseḻ' Chioza' iṉabi'e, lla?

²⁷Cho' ṉezicho ga beṉ' beeni. San kat' yid beena' nak Crístona', ni to kono iṉezi galə za' beena'.

²⁸Jesúza' chli' chsedile' beṉ'ka' yoodo'na', na' ka benile' daa wna beṉ'ka' c̱he', na' wṉie' zillj chi'e: ―Chakzile nombia'le nad' na' ṉezile ga beṉ' nad'. Aga zaa tolazz', san zoa beena' bseḻ' nad', beena' chon kon ka chc̱hebe' gone'. Na' le' bi nombia'lene',

²⁹san nad' nombi'ane', ḻa' gana' zoen' wzaa, na' ḻen' bseḻee nad'.

³⁰Na'ch baḻe' goklall'gake' gox̱'gake'ne', per ni toe' bi bex̱' ḻe', ḻa' biṉ' illin lla illin gor gak c̱he' daa llia bia'.

³¹Na' beṉ' zan wyajḻe'gake' c̱he', na' wnagake': ―Kat' yid beena' nak Crístona', beena' wseḻ' Chioza' iṉabi'e, ¿awli'techle' yeḻ' wak aga ka daa chli' beeni, lla?

³²Na' fariseoka' bengakile' dillaa daa choe' beṉ'ka' c̱he Jesúza'. Na' ḻegake' len bx̱ozka' chṉabia' bseḻ'gake' beṉ'ka' chap yoodo'na' kwenc̱he lljex̱'gake' Jesúza'.

³³Na' Jesúza' golle': ―Aga sshach soalen' le', na'ch yiyaa gana' zoa beena' bseḻ' nad'.

³⁴Na' yiyiljle nad' per aga willelile nad' daa bi gak yidle gana' lljazoa'.

³⁵Na'ch beṉ' Israelka' che' ljwellgake': ―¿Garan yiyaj beeni na' bich yillelichone', lla? ¿Anti gana' lle' beṉ' wlall c̱hechoka', beṉ'ka' lle' lall beṉ' zit'kan' shaje' kwenc̱he lljasedile' beṉ' griegoka', lla?

³⁶¿Beran zejin daa ne': “Yiyiljle nad', per aga willelile nad' daa bi gak yidle gana' lljazoa'”?

³⁷Na' llana' zeelo gok lṉina', llana' nak lla choo lla xen, wzolla' Jesúza' na' wṉie' zillj, chi'e: ―Shi nole chbiḻi, ḻi da yeejle nisa' daa goṉ' le'.

³⁸Na' gak kon ka na Cho'a Xtill' Chioza' gana' nan beena' gonḻilallee nad', gak ḻoo yic̱hjlall'do'ena' ka ga chaltit nis yaa nis ban.

³⁹Na' daa wna Jesúza' ka', zejin soa Espíritu c̱he Chioza' ḻoo yic̱hjlall'do' beena' gonḻilall' ḻe'. Ḻa' ka gora' biṉ' yidsoa Espírituna' ḻoo yic̱hjlall'do' beṉ' daa biṉ' sho' Jesúza' balaaṉna' daa llia bia' sho'e kat' yiyepe' gana' zoa Chioza'.

⁴⁰Na' baḻ beṉ'ka' bengakile' daa wna Jesúza' na' wnagake': ―Dii ḻi beeni nake' beena' llia bia' yid kwenc̱he c̱hix̱ji'e daa che' Chioza'ne'.

⁴¹Na' zi baḻe' che'gake': ―Beenikzan' Crístona', beena' chbezcho wseḻ' Chioza' iṉabi'e. Na' zi baḻe' che'gake': ―¿Achakile ladj beṉ' Galileaka' ichej beena' wseḻ' Chioza' iṉabi'e?

⁴²Cho'a xtill' Chioza' nan lo dia c̱he dii Davina' galj beena' nak Crístona', na' gake' beṉ' yell Belén ka dii Davina'.

⁴³Ka' gok, gokgake' c̱hop shoṉ kwenlə ni c̱he Jesúza'.

⁴⁴Baḻe' goklall'gake' gox̱'gake'ne', per ni toe' bi biyaxji.