SAN JUAN 7:5-22

⁵Ngubʉ bi xih yʉ́n 'yohʉ nguetho him mi ɛ̨c'yɛi ʉ.

⁶Nu a ra Jesús bi 'yɛ̨mp'ʉ bʉya: ―Hinga na søn ra ora bi ts'ängä ga mbagä bʉ, pɛ nu'ahʉ hønt'a go 'bɛ'a má ora da zä gui mbähä bʉ.

⁷Nu'ʉ 'bʉcua ja ra ximhäi hin di ʉc'ahʉ nguetho 'da i gu guí øthʉ ʉ, pɛ go di ʉgä ʉ nguetho dím mangä gue hingui ho øt'ʉ.

⁸Ní mbäsɛhʉ 'bʉ guín ndehʉ, nugä hin ga mba ya nguetho hinga na søn ra ora ga mba bʉ, bi 'yɛ̨na.

⁹Nu'bʉ mí gua'a bi man bʉya bim 'bʉt pʉ mi'da yʉ pa bʉ ra xɛqui Galilea.

¹⁰Nu'bʉ mí mba bʉ Jerusalén ʉ yʉ́n 'yohʉ, m'bɛjua bi mba bʉ ra Jesús. Mbɛ bin 'yąntho nguetho bi nde him 'bexque da hnu.

¹¹Nɛ nu ma ngʉrpihe dyʉ judíohe i 'bʉpʉ, bi hyon'a ra Jesús bʉ ja ram pɛti. Nɛ bin 'yɛ̨m zɛhɛ ʉ: ―Hapʉ i 'bʉi 'bʉ, bin 'yɛ̨mp'ʉ.

¹²Nɛ xʉn ngu yʉ ją'i bin yąnjo'dre nangue'a ra Jesús, nu'ʉ 'da im ma ngue xʉn ho a, nɛ nu'ʉ 'da i ɛ̨na: “Häte a.”

¹³Pɛ xinga n'da bin yą ts'ɛdi nangue'a ra Jesús nguetho i su ma ngʉrpihe 'bʉpʉ.

¹⁴Nu'bʉ mí tho'i ts'ʉ yʉ pa, ya bi zo i nde yʉm pɛti i t'ørpʉ, ja bi mba bʉ ja ra dąniją ra Jesús bʉya nɛ bin xänbate bʉ.

¹⁵Nɛ nu ma ngʉrpihe bʉ ja ra niją bi hyonya thoho nɛ bi 'yɛ̨n'ʉ: ―Hague nja i sä da ma xʉn ho rám hman Oją na ran 'yohʉ, nɛ him bi zʉ'a man xädihʉ, bin 'yɛ̨m zɛhɛ ʉ.

¹⁶Bi dą a ra Jesús: ―Nu'a man xädigä him mam hmansɛgä a pɛgue rám hman a to bá pɛngä.

¹⁷Nu'bʉ 'bʉ a n'da gue nde da 'yøt' rá pähä Oją, da bą 'bʉ rán xädi Oją, o gue da bą 'bʉ mam hmansɛgä.

¹⁸Nu'bʉ 'bʉ a n'da im ma 'bɛ'a mbɛ̨nsɛ, i honi da hnumansusɛ. Pɛ nu'bʉ 'bʉ a n'da i honi da t'ɛ̨spa rá hmu, im ma majuąni a nɛ hingui häte a.

¹⁹Nɛ xø bi 'yɛ̨na: ―Bi 'dajʉ yʉn t'ɛ̨di ra Moisés, pɛ xínga n'da ahʉ guí øthʉ nguetho bi ma njon din hote, nɛ guín nde gui hyojʉ, bi 'yɛ̨n'a ra Jesús.

²⁰Nɛ bi dą'ʉ yʉ ją'i thoho: ―Masque bi bɛ̨n'na ra zįthu a gám ma, njo'o to in nde da hyo i, bi 'yɛ̨n'ʉ.

²¹Nu ra Jesús bi dąt'ʉ: ―Nugä dá øt'a n'da ra 'bɛfi 'bʉ ra pa ran ts'äya, nɛ gätho ahʉ gá hyonya thohohʉ.

²²Pɛ nɛ'ahʉ, nu'bʉ din tįn i yoho yʉn t'ɛ̨di bi man ra Moisés, nu'a n'da bi ma gue gui hyɛcpahʉ yʉ́ ją'i yʉ 'uɛre, nɛ nu man'da bʉya ra pa ran ts'äya, guí huanhdʉ nda'a guí øthʉ, gue guí hɛcpahʉ yʉ́ ją'i yʉ 'uɛre. Nguetho hin guín nde gui fɛstahʉ a rán t'ɛ̨di ra Moisés. Nɛ hinga hønt'a ra Moisés bi ma da thɛcpa yʉ́ ją'i yʉ 'uɛre, pɛ nɛ'ʉ mam bombøtahʉ bi ma. Nɛ ngutho dá øt' 'bʉ má hoc'a n'da ra hyɛ̨nni 'bʉ ra pa ran ts'äya. Hanja gní sʉjʉ nɛ gue'a n'youi bʉ rán t'ɛ̨di ra Moisés dá øt'ä.