San Juan 7:4-23

⁴Gun ni tub la mbecy wayicy yu coz ngach benu rlagy yu nu nap cuꞌ lo mbecy yu. Como bi ricy ru de coz ily, orzeꞌ rlagy ñi nu lyuur de coz nu ricy ru lo dela mbecy ni gyishlombecy ―na dey.

⁵Gun gashtal de bicy mi wangyicy cup dey consuel lom.

⁶Orzeꞌ na Jesuuz rab mi dey: ―Gaal zi nigul shuub tiem ne̱ nu chu̱ꞌ Jerusaleeng. Zeꞌ par de ru la ziꞌl tiem ndeꞌ coz nu nap.

⁷De mbecy ni gyishlombecy wac gazi lagy dey lo de ru, tees lo ya̱ rzi lagy dey, gun naal la ricya̱ nu rabee nu de coz nu ricy dey, ndeꞌ coz a̱ꞌ nap.

⁸De ru yaa der saꞌ, gun ya̱ waya̱ na, gun gaal zi nigul shuub tiem ne̱ nu gya̱ ―nam.

⁹Ornu blazh mniim de riidz zeꞌ, orzeꞌ byeeñ gam Galilea.

¹⁰Na despuees ornu bi gush nez de bicy mi nu ya dey saꞌ zeꞌ, orzeꞌ gush nezaꞌ ub mi yam. Nomaas walab nu suelt la yam, sinu yam tub mod nu dze ga.

¹¹Na de mbecy zub lo ni de mbecy Israeel byub dey mi lat saꞌ. Orzeꞌ na dey rab yu losaꞌy: ―¿Ca rded yu zeꞌ na? ―na dey.

¹²Na lat de mbecy zigy brugyiꞌ ro dey riidz dze ga nu rzat dey mi. Yuꞌ dey nay: “Yu zeꞌ nac yu tub mbecy nap.” Tees yuꞌ gaꞌ dey rniiy: “Yu zeꞌ walab mbecy nap nac yu, sinu ricy yu nu radza mbecy”, na dey.

¹³Nunu ni tub la mbecy wansat dey mi ye ga la nu nac nu rdzib dey lo de yu zub lo ni de mbecy Israeel.

¹⁴Na ornu bi guzeel saꞌ, orzeꞌ guꞌ Jesuuz loliꞌ ni yuꞌ nu driib zily de mbecy Israeel Ñgyoozh. Orzeꞌ brugyiꞌ rlyuum ni dey.

¹⁵Orzeꞌ tonaꞌ la za nu ic de yu zub lo ni de mbecy Israeel: ―¿Lac bicy yu ii nu gud lagy yu ni de coz nu rniiy, gun wanchay scuel? ―na dey.

¹⁶Orzeꞌ na Jesuuz rab mi dey: ―Riidz nu rlyu̱u̱, ndeꞌ walab riidz nu bruu nañ shcab ni uba̱, sinu ndeꞌ riidz nu bruu lo Ñgyoozh, biñ nu bzuu nez ya̱.

¹⁷Cyu ziꞌl mbecy benu shet ic yu nu gyicy yu coz nu rlagy Ñgyoozh, orzeꞌ gad lagy yu benu riidz nu rlyu̱u̱, ndeꞌ bruuñ lo Ñgyoozh, o nu rlyu̱u̱ riidz nu rlagy ub ziꞌl la̱.

¹⁸Gun benu mbecy nu rnii nu shcab ni ub ziꞌl, yu zeꞌ ni rniiy gun rlagy yu nu gyabic mbecy gyel mbecy niy. Zeꞌ yu nu ryub gyel mbecy par yu nu bzuu nez yu, yu zeꞌ coz nu rniiy, ndeꞌ coz nu rishli, nunu sac la gyel rguu nañ lardooy.

¹⁹’¿A walab nu rishli nu Moisees bzeeñ yu leey yaa der? Tees ni tub la der wagyicy yac der niñ. Orzeꞌ ¿zeꞌ lagu ryub der mod nu cut ru ya̱? ―nam.

²⁰Orzeꞌ na la be de mbecy zigy zeꞌ rab yum: ―¡Ru bicy ni nuras ru! ¿Zeꞌ cyu nu rlagy cut ru zeꞌ beni? ―na dey.

²¹Orzeꞌ na gaꞌ Jesuuz rab mi dey: ―Dela de ru za nu ic der nu nac tub zi coz nu bicya̱ sab, dzi nu rzu lagy mbecy Israeel.

²²Tees Moisees pcaay der nu caar beey sircunsision cuerp ni de yu nguzh ni der. Mas sab, dzi nu rzu lagy mbecy Israeel, rcaa der beey ni sircunsision cuerp ni yu nguzh ni der, como ndeꞌ coz nu pcaa Moisees der nu gyicy ru. Tees ndeꞌ walab coz nu bzuub Moisees gyiꞌñ, sinu ndeꞌ coz nu nil ricy de gyitoo bel ni den.

²³Benu de ru rcaar beey sircunsision cuerp ni yu nguzh ni der mas sab, dzi nu rzu lagy mbecy, par nu cueꞌ chuꞌ falt ni der nu leey ni sircunsision nu bzeeñ Moisees, orzeꞌ ¿lagu rzi lagy der lo̱ gyiꞌ nu bicy yaca̱ dutuub la cuerp ni tub mbecy rat, sab, dzi nu rzu lagy mbecy Israeel?