SAN JUAN 7:37-49

³⁷Xa wa tyii ti taꞌa, tsan ykwiꞌ taꞌa, ti nduun Jesús niꞌ lyaa tnun bra kanꞌ. Kwen ykwiꞌ yu loꞌo nten nu ndiꞌin nde kwa: ―Bra nu kityi tiꞌ wan tyiꞌa, kan wan seꞌen ndiꞌiǐn chaꞌ taǎn tyiꞌa koꞌo wan ―ndukwin yu―.

³⁸Nchga nten nu ndiꞌin chaꞌ ꞌin loꞌoǔn, ka ꞌin neꞌ kanꞌ sa ñaꞌan lka si ndukwa tyiꞌa niꞌ kasiya ꞌin neꞌ. Tlyu ꞌa chaꞌ suꞌwe ka niꞌ kasiya ꞌin neꞌ kanꞌ, chaꞌ ka kuꞌni suꞌwe neꞌ kanꞌ loꞌo taꞌa nten neꞌ bra kanꞌ ―ndukwin Jesús ꞌin neꞌ―. Lo kityi ꞌin Ndiose nchkwiꞌ chaꞌ ngwañaꞌan ka ꞌin neꞌ.

³⁹Ngwañaꞌan ykwiꞌ Jesús loꞌo neꞌ kwa, chaꞌ wa ta ti Ndiose Tyiꞌi Ni chaꞌ kanun niꞌ kasiya ꞌin nchga nten nu xñi chaꞌ ꞌin Ni. Ja ya ta Ndiose Tyiꞌi Ni kan lo chalyuu, chunꞌ ja ya tyaa Jesús seꞌen ndiꞌin Ndiose nu lka Sti yu.

⁴⁰Kanꞌ ndiya nten kichen nu wa ynan chaꞌ kanꞌ, nu ykwiꞌ chaꞌ ꞌin Jesús: ―Chañi chaꞌ yu kwa lka yu kula nu ndiꞌin chaꞌ kan ti sꞌni, nu chkwiꞌ chaꞌ ꞌin Krixtu loꞌoan ―ndukwin neꞌ.

⁴¹Loꞌo xka ta nten ykwiꞌ xka chaꞌ ꞌin yu: ―Yu kwa lka nten nu tnun nchka nu msuꞌwa Ndiose chaꞌ kulaa ꞌñaan, ti kwiꞌ Krixtu lka yu ―ndukwin neꞌ. Loꞌo mxkwen xka ta nten kichen ꞌin taꞌa neꞌ bra kanꞌ: ―¡Siꞌi neꞌ Galilea ka nten tnun nchka kanꞌ!

⁴²Lo kityi kula kanꞌ nchkwiꞌ chaꞌ ska nten taꞌa ayman David ka nten tnun kanꞌ; kichen Belén kala yu kanꞌ, chaꞌ taꞌa kichen tyi ayman David lka yu kanꞌ.

⁴³Ja ngwa suꞌwa chaꞌ ꞌin neꞌ loꞌo taꞌa neꞌ chaꞌ ꞌin Jesús.

⁴⁴Loꞌo ja tukwin msñi ꞌin yu, ni siya ndiꞌin nten nu ngwa ꞌa tiꞌ xñi ꞌin yu, chaꞌ tsaa loꞌo neꞌ ꞌin yu niꞌ ñaꞌan chkwan.

⁴⁵Xiyaꞌ ndyaa xta nu ngiꞌni kwan niꞌ lyaa kanꞌ seꞌen ndiꞌin sti joꞌo nu lka ndloo, seꞌen ndiꞌin neꞌ fariseo. Mnichaꞌ neꞌ ꞌin xta bra kanꞌ: ―¿Ni chaꞌ lka ja loꞌo yu kanꞌ mdiyan loꞌo wan seꞌen ndiꞌin ba a?

⁴⁶Mxkwen xta kanꞌ ꞌin neꞌ bra kanꞌ: ―¡Ja ya kunan ba nchkwiꞌ ska nten sa ñaꞌan nu nchkwiꞌ yu kwa!

⁴⁷Lye ꞌa ykwiꞌ neꞌ fariseo loꞌo xta bra kanꞌ: ―¿Ta loꞌo wan mñi lyoꞌo yu kwa ꞌwan sikwa a? ―ndukwin neꞌ―.

⁴⁸Ja siyaꞌ ndiꞌin nten nu lka ndloo ꞌñaan nu msñi chaꞌ ꞌin yu kanꞌ. Loꞌo neꞌ fariseo taꞌa ba, ti kwiꞌ ti ja ndyaa ñaꞌan tiꞌ ba chaꞌ nu nchkwiꞌ yu ―ndukwin neꞌ―.

⁴⁹Neꞌ kichen re, ja la suꞌwe neꞌ; xkwiꞌ chaꞌ xaꞌan ndaꞌan chaꞌ tiye neꞌ, chunꞌ ja nnan ꞌa neꞌ chaꞌ nu ykwiꞌ ayman Moisés loꞌoan.