San Juan 7:36-49

³⁶¿Bizra zéaje̱ da nigá guzre̱' dxi'u: Wexílajle neda', na' quebe xezrélele neda' lawe' da quebe gaca sa'le naga sua' neda'?

³⁷Zra bze̱be chee̱ laní na' naca na zra blaudxa. Lu zra na' guzé̱ Jesús, na' gunné̱' zizraj: ―Che nu benne' dxebílene̱', dxal-la' xide̱' naga zua' neda', na' xí'aje̱'.

³⁸Naca na ca naxúaj na lu xiche chee̱ Dios, dxenné̱': “Benne' dxéajle̱'e̱ chia', lu lázrdawe̱' galaj xe̱gu nisa da gunna na xel-la' nabán.”

³⁹Da nigá gunná Jesús ca naca chee̱ Be' Lá'azxa, Bénnea' xelezí' benne' ca' xeléajle̱'e̱ chee̱ Jesús, lawe' da quebe ne la' Be' Lá'azxa lawe' da quebe ne xegá'ana szren Jesús naga zua Xre̱'.

⁴⁰Bal-la bénneache, gate belenne̱' da nigá, gulenné̱': ―Da li benne' nigá naque̱' Bénnea' guchalaje̱' waláz chee̱ Dios, Bénnea' dxal-la' xide̱'.

⁴¹Xebal-le̱' gulenné̱': ―Benne' nigá naque̱' Cristo, Benne' guche̱be lazre' Dios sel-le̱'. Xebal-le̱' gulenné̱': ―¿Waca Cristo benne' Galilea?

⁴²Lu da naxúaj na lu xiche chee̱ Dios dxenná na gaca Cristo zri'ine zre sua David, ne gaque̱' benne' xe̱zre Belén, xe̱zre na' naga gulaj David.

⁴³Ca'an guca, gulaca benne' ca' chupa la'a ne̱ chee̱ Jesús.

⁴⁴Bal-le̱' gulaca lazre̱' xele̱l-le̱' Jesús, na' quebe nu bexazre gune̱' na.

⁴⁵Xra'aga we̱n zrin ca' chee̱ xudau' belexezrine̱' naga zaj zra' fariseo ca', ne benne' xíchaje̱ ca' chee̱ bxruze ca', na' benne' caní buluche̱be̱' xra'aga we̱n zrin ca': ―¿Bizr chee̱ na' quebe guche̱le bénnea'?

⁴⁶Belexeche̱be xra'aga we̱n zrin ca': ―Quebe ne guchalaj nu bénneache ca dxuchalaj benne' nigá.

⁴⁷Nadxa fariseo ca' gulé̱'e̱ xra'aga we̱n zrin ca': ―¿Cá'anqueze le'e be̱le lataj guzí xe̱'e̱ le'e?

⁴⁸Quebe nu ne chéajle̱ chee̱ bénnea', benne' xíchaje̱ caní, ne cá'anqueze benne' fariseo ca'.

⁴⁹Benne' ca' dxeléajle̱'e̱ chee̱ bénnea' quebe zaj núnbe'e̱ da nadxixruj bea na, ne zaj nabía xi'e̱.