San Juan 7:33-43

³³Yalni Comam hacaꞌ tiꞌ: —Hanicꞌxan̈echꞌan tiempohal ayinicꞌojan texol, cat xin inpaxtojan iscꞌatan̈ Comam chejn̈eintijan.

³⁴Hex tiꞌ chexoc saywal win̈an, yaj matxa chinilchahan heyu, yuto mach chu heyapni bay chinapnituꞌan, ẍi Comam tet ebnaj.

³⁵Yichico ebnaj yahawil con̈ob Israel tuꞌ iskꞌamben tet hunun hacaꞌ tiꞌ: —¿Baytaxca tuꞌ chito naj tiꞌ, yuxin chal naj tato matxa chiilcha naj ju? Ay ebnaj jet con̈ob pujanto xol ebnaj griego, ¿ham tuꞌ chito naj cuywal xol ebnaj, cat yoc naj iscuyno ebnaj griego tuꞌ yalni?

³⁶¿Tzet caw chalilo huneꞌ chal naj tiꞌ: “Chinhesayaꞌan, yaj matxa chinilchahojan heyu, yuxinto mach chiyu heyapni bay chinapnituꞌan?” ẍi naj, ẍi ebnaj yin̈ Comam.

³⁷Haꞌ islahobal tzꞌayic kꞌin̈ tuꞌ, haꞌ caw ay yelapno ye yul sat anma Israel. Yin̈ huneꞌ tzꞌayic tuꞌ xin, ah lin̈no Comam Jesús, yalni Comam yin̈ caw ip hacaꞌ tiꞌ: —Maquex chitaj hetiꞌ titan̈we incꞌatan̈an, cat heyucꞌni huneꞌ ha haꞌ chiwakꞌan.

³⁸Hacaꞌ yalni yul Yum Comam Dios bay chala: “Haꞌ mac chianayto yul yanma win̈an, hacaꞌ chiyu ispitzcꞌa isnukꞌ ha haꞌ chiel yojomal, hac tuꞌ chiyu ispitzcꞌa isnukꞌ haꞌ yet kꞌinale yul yanma,” ẍiayoj, ẍi Comam tet ebnaj.

³⁹Yal Comam Jesús huneꞌ tiꞌ yin̈ Comam Espíritu Santo chischah macta chianayto yul yanma yin̈ Comam. Yet huneꞌ tiempohal tuꞌ xin, maẍto chiayilo Comam Espíritu Santo isyayil maẍto chiilaxto Comam yul satcan̈.

⁴⁰Yet yaben anma cutxanico tuꞌ yin̈ tzet yal Comam Jesús, ay anma halni hacaꞌ tiꞌ: —Yin̈ caw yeli, haꞌ naj tiꞌ ischejab Comam Dios halbilcanoj ta chuli, ẍi.

⁴¹Aypaxo mac halni hacaꞌ tiꞌ: —Haꞌ ton naj tiꞌ Cristo, echmabil yul ju, ẍi. Aypaxo huneꞌxa majan anma halni: —Naj Cristo tuꞌ, ¿tom Galilea chitit naj heyalni?

⁴²Chal yul Yum Comam Dios tato haꞌ bey yul con̈ob Belén, yul iscon̈ob naj rey David chipitzcꞌa naj Cristo tuꞌ, yuto yuninal yuninal naj rey David ye naj, ẍi hunmajanxa anma.

⁴³Hac tuꞌ yu ispohnito isba anma yu Comam.