San Juan 7:30-42

³⁰Yuꞌ mbecy ngulagy dey ñgya nu dey mi pres, tees ni tub la dey wanshet yaay mi gun nigul shuub tiem nu ni gyicy nu dey mi.

³¹Tees zigy mbecy bicy cup dey consuel lom. Orzeꞌ na dey: ―Ornu cyid Mesías, ¿walab gaal gyicy zir mi nusuriidz, gazeꞌ gal nu ricy yu ii? ―na dey.

³²Na ornu güeñ de mbecy fariseo de riidz nu bee de mbecy dze ga nu nac Jesuuz, de yu zeꞌ gal nu de yu zub lo ni de uz bzuu nez dey la be de yu nu rña nañ yuꞌ ni Ñgyoozh nu cha nu dey mi pres.

³³Orzeꞌ nam rab mi dey: ―Gabee chesa du̱ de ru se la be dzi. Orzeꞌ gru̱u̱ lat der nu gya̱ lo biñ nu bzuu nez ya̱ nu yapa̱.

³⁴De ru yub der ya̱, tees wayada̱ꞌ ni der, gun wac cha der lugaar zeꞌ nu ya̱ gya̱.

³⁵Na de yu zub lo ni de mbecy Israeel brugyiꞌ ro dey riidz nu losaꞌy. Orzeꞌ na dey: ―¿Zeꞌ ca cha gaꞌ yu ii nu wayadaꞌy ni den? ¿Walab gaal chay lat de mbecy Israeel nu rcyiiñ reñaꞌ nasyoong nu cha lyuuy ni de mbecy nu walab mbecy Israeel?

³⁶¿Lac yaruu de riidz nu rniiy: “Yub der ya̱, tees wayada̱ ni der, gun wac cha der lugaar zeꞌ nu ya̱ gya̱”, nay? ―na dey.

³⁷Laab ndeꞌ la dzi nu bded ni saꞌ zeꞌ; ndeꞌ dzi nu ricy zir ñi presis. Orzeꞌ dzi zeꞌ wes su Jesuuz. Orzeꞌ ye la mniim: ―Benu ca na der rbigy ru nis nañ lardoor, orzeꞌ da der lo̱. Ya̱ grica̱ nis goꞌ der.

³⁸Ndeꞌ gal nu rniiñ lat de riidz ni Ñgyoozh. Rniiñ nu de yu nu gyicy cup consuel lo̱, grib nis nu cuic gyel mbañ nañ lardoo dey, rniiñ ―nam.

³⁹Na nis nu bzat Jesuuz zeꞌ, ndeꞌ Espiriit Yon ni Ñgyoozh, biñ nu cuic Ñgyoozh ni de yu nu gyicy cup consuel lom, gun tiem zeꞌ Ñgyoozh nigul cuic mi Espiriit Yon nim ni mbecy, gun Jesuuz nigul cush cyam nu gyam lo gyel lily nim.

⁴⁰Na lat zeꞌ yuꞌ la be mbecy. Ornu güeñ dey de riidz zeꞌ, orzeꞌ na dey: ―Segur la yu ii nac yu yu nu mnii por cuen ni Ñgyoozh, yu nu ca lo cuen nu cyid ―na dey.

⁴¹Zeꞌ yuꞌ gaꞌ dey nay: ―Laab mi ii nac mi Mesías, biñ nu ca lo cuen nu co mbañ de ub na ―na dey. Tees yuꞌ gaꞌ dey nay: ―Walab, gun Mesías walab Galilea ca lo cuen nu gruum ―na dey―.

⁴²¿A walab nu rniiñ lat de riidz ni Ñgyoozh nu Mesías gruum lat de nez rey Dabi, nunu gal mi Beleeng, laab lugaar zeꞌ nu gul rey Dabi? ―na dey.