SAN JUAN 7:3-24

³ꞌBa ꞌbatsaꞌen ꞌbi kitsu ntsꞌe Jesús: —Bi tu ngaꞌe beni. Tusa tꞌin ña tijña nangi Judea, tuxi skueni xutari mé= xi teñeꞌen.

⁴Ngu tsa jngu xuta mejénre xiaxkun bi ꞌbejñaꞌmo mé= xi tsaꞌen. Kui kjuañu tsa ñeꞌen kjuakun, tusa takutsejen_ri yojori xuta ngasunꞌndebi

⁵—kitsu ntsꞌe, ngatꞌa ni ntsꞌejín kuakjainre ngatꞌare kui.

⁶ꞌBa Jesús kitsure: —Kje faꞌejín chubana̱. Tunga ngatꞌanu jun, tume chubañu ma ñoꞌon mé= xi mejénnú.

⁷Bi ma mastikenu xuta ngasunꞌndebi jun, tunga inyamastike=na̱ an ngatꞌa texinyataꞌenña̱ nga chꞌo tjin mé= xi inyatsaꞌen.

⁸Tangiun jun sꞌiu. Tunga an bi kjuia̱, ngatꞌa kje faꞌejín chubana̱

⁹—kitsu Jesús ꞌba tsekꞌejña nangi Galilea.

¹⁰Tunga kionga je kiji ntsꞌe Jesús, ꞌbatsaꞌen kui kiji sꞌiu ngayeje. Tunga bi kiji tsejen, tu kiji ꞌmo.

¹¹ꞌBa xuta judío tsangisjai Jesús ngajin sꞌiu, ꞌba kitsu: —¿Ñá=ñu tijña xutabiu nde?

¹²ꞌBa ngatsiꞌi xutankjiun inyafo nijmi ngatꞌare Jesús. Tjin yakꞌa xi tsu: “Kui jngu= xuta xi nda xuta.” ꞌBa tjin yakꞌa xi kitsu: “Junjun. Kui jngu= xuta xi ꞌbonachare xuta.”

¹³Tunga xutankjiun bi kuán kinchja tsejen ngatꞌare Jesús, ngatꞌa tsankjunke xuta judío.

¹⁴Kionga je masen tjen sꞌiu, Jesús jaꞌasꞌen ña ma ndetsinre ningu ꞌba yakuya.

¹⁵ꞌBa xuta judío tu ꞌba= kuánre ꞌba kitsure xinkjin: —¿Jótsaꞌen manire xujun xutabi, nga bi kiskutꞌaya?

¹⁶ꞌBa Jesús kitsure: —En xi tebakuyaa̱ bi tsaꞌan. Tseꞌe xi kitsikasenna̱.

¹⁷Tsa tjin xi mejénre saꞌen jotsaꞌen mejénre xi kitsikasenna̱, kui= xi skue ñá ndibani en xi tebakuyaa̱, tsa tseꞌe Naꞌenchana asa tu kuenda tsaꞌan tenchjaa̱.

¹⁸Jngu xuta xi tu kuenda tseꞌe nchja, kui= xi mejénre nga xiakun. Tunga xi mejénre nga xiakun xi kitsikasen, kui= xi nchjakixi ꞌba tumé ma chaninejere.

¹⁹’¿A bi Moisés xi kitsjanu kjuatexumo? Tunga nijngujín jun tenikꞌetjusun kjuatexumo. ¿Ánñu mejénninu sikꞌennuu̱? —kitsu Jesús.

²⁰ꞌBa xutankjiun kitsingojore: —¡Ngu isennixtjin xi bi nda tijñajinri! ¿ꞌYá= xi mejénre sikꞌenri?

²¹ꞌBa Jesús kitsure: —Jngu kjuakun xi kitsaꞌaa̱n, ꞌba ngatꞌare kui tu ꞌba= kuán tsiꞌinu.

²²Moisés yakuyanu nga sikꞌetjusun mé= xi circuncisión ꞌmi (ninga tsa bi fa Moisés xi ꞌetutsꞌinre kibiu, tusa nchja chinganu xi ꞌejñatutsꞌinnu kibiu.) ꞌBa nikꞌetjusun kibiu ninga tsa nixtjin nga nikjaꞌaya.

²³ꞌBa ꞌba niko kiꞌndi xiꞌinnu ninga tsa nixtjin nga nikjaꞌaya, tuxi bi kuiyuneñu kjuatexumare Moisés. Nda tjin tsuꞌba. Tunga tsa ꞌba ñoꞌon, ¿ánñu temastichaninuu̱ nga nixtjin nga nikjaꞌaya kitsindakjia̱n ngayéje yojore jngu xuta?

²⁴Bi ñoꞌon kjua tu ngatꞌare jotsaꞌen matsejen mé= xi tsaꞌen xuta. Tusa ko kjuakixi tiꞌon kjua.