San Juan 7:28-51

²⁸Jesús otlamachtijtoka itech Weyi Tiopa, iwa ijkuak okikak tlan okijtoayah, okijto chikawak: —¡Nomejwah nonkijtoah nonnechixmatih iwa nonkimatih de kan niwalewatok! Pero amo oniwala san por Ne oniknek, yej onechaltítlanki Akin nomejwah amo nonkixmatih. Ye yekmilajka.

²⁹Ne nikixmati porke inawak oniwala, iwa Ye onechaltítlanki.

³⁰Ijkuakó n tlayakankeh judíojteh okinekiah kikitskiskeh n Jesús. Pero amaka omixewi okikitski, porke ayamó oajsia iora para kikitskiskeh.

³¹Pero miakeh okineltokakeh, iwa okijtoayah: —Ijkuak wits n Cristo, ¿kox kinchiwas okachi wejweyi milagros ke nin tlakatl?

³²N fariseos okikakeh tlan okijtoayah n tlakah de Jesús, yika omotlatlalwijkeh iwa n tiopixkeh non tlayakantokeh, iwa okintitlankeh non otlamokuitlawiayah kan Weyi Tiopa makikitskitih n Jesús.

³³Ijkuakó Jesús okijto: —Ne niyetos nomowah sa kanaj kech tonati, tlamis oksepa nimokopas inawak Akin onechaltítlanki.

³⁴Nomejwah nonnechtemoskeh, pero amo nonnechajsiskeh, porke mach nonweletiskeh nonyaskeh kan Ne nias.

³⁵Ijkuakó n tlayakankeh judíojteh omotlajtlaniayah: —¿Kan ik yas nin tlakatl, kan amo weletis tikajsiskeh? ¿Chamo kinmachtitih n israelitas non xitintokeh itech tlali de Grecia, noso innewiah n tlakah de Grecia kinmachtiti?

³⁶¿Tlan kijtosneki: “Nonnechtemoskeh pero mach nonnechajsiskeh, porke amo weletis nonyaskeh kan Ne nio”?

³⁷Itech iksemi tonati, de non weyi ilwitl, Jesús omóketski iwa ika chikawak tlájtoli okijto: —Tla aka amiki, mawiki nonawak iwa maatli.

³⁸Kemi kijtoa itlajkuilol Dios, akin nechneltokas, itech iyolo mextos atl non kitemaka yolílistli.

³⁹Jesús otlajtojtoka de n Espíritu non kiseliskiah akimeh kineltokaskiah. Pero n Espíritu ayamó owaltemoaya porke Jesús ayamó okiseliaya weyílistli.

⁴⁰Ijkuakó sikimeh ijkuak okinkakeh ninteh tlájtolteh, okijtojkeh: —De milajka, nin tlakatl Ye n profeta.

⁴¹Iwa oksikimeh okijtoayah: —Ye ni n Cristo. Pero oksikimeh okijtoayah: —¿De Galilea weletis wits n Cristo?

⁴²Itlajkuilol Dios kijtoa Cristo walewatos de n Rey David, de Belén kan ochantitoka n David.

⁴³Ijkó, n tlakah omoxexelojkeh porke sikimeh amo okineltokayah n Jesús.

⁴⁴Sikimeh okinekiah kikitskiskeh, pero amaka omixewi okikitski.

⁴⁵N tlamokuitlawijkeh de n Weyi Tiopa, oyajkeh innawak n fariseos iwa innawak tiopixkeh non tlayakantokeh, iwa ninteh okintlajtlanijkeh: —¿Tleka amo ononkualikakeh?

⁴⁶N tlamokuitlawijkeh otlanankilijkeh: —¡Nion se tlakatl ayik ijkó tlajtoa kemi nin tlakatl!

⁴⁷Ijkuakó n fariseos okinmilijkeh: —¿Noiwa nomejwah ononkimokawilijkeh manomechkajkayawa?

⁴⁸¿Kox aka totlanawati noso aka fariseo okineltokak non tlakatl?

⁴⁹Akimeh kineltokah non tlakatl, amo kixmati itlanawatil Moisés, yika Dios kintlaijyowíltis.

⁵⁰Nicodemo tewa iwan fariseos, akin se yúali okitato n Jesús, okinmili:

⁵¹—Totlanawatilis amo techkawilia matiktlajtlakoltikah se tlakatl, tla amo achto tikkakih tlan ika kiteiliah.