SAN JUAN 7:24-50

²⁴Jantu kꞌamukꞌanitꞌik laqtaqal matichun lapanaki vamun por yu laqtsꞌinatꞌik. Incha kꞌamukꞌanitꞌik laqtaqal kaval yu laqsaval.

²⁵Lati lapanakni yu ixtavilanal Jerusalén taꞌaqtayl talalhisakmiy, va tanaul: —¿Jantu kaval yu aniy lapanaki yu tatꞌajun lakxkaunan para katamaqnil?

²⁶Chavay mas tꞌajun chivin la ixlakaꞌukxpukꞌan ni lapanakni, yu lhachimoꞌonun jantu tuꞌuchun tajuniy. ¿Ex vachu talhakapuꞌan ni yucha va Cristo yu Dios lakꞌulata?

²⁷Ni kijnan ox kꞌatsayau taꞌan laqsaval minchal ni yucha. Pero yu Cristo tejkan kaminaꞌ jantu matichun kamispayaꞌ toꞌoxtaycha kaminanta, ex ka jantu yucha.

²⁸Tejkan qasmaklhi ni Jesús tacha ixtatꞌajun juninin, ex aqtayl jalaqxaqalay pꞌaysni ancha ixpulakna laka ay lakatajtan, va jalakjunil: —Uxiknan ox kilamispayau, ox kꞌatsꞌayatꞌik toꞌoxtaycha kminchal. Pero jantu kilaqꞌaman kakmil. Va kimPay kimalaqachal. Yucha najun yu laqsaval pero yu uxiknan jantu mispꞌayatꞌik.

²⁹Ni kitꞌin ox kmispay. Kmintachal kun yucha, va yucha yu kimalaqachal kakmil aniy.

³⁰Ex astan lati ixtalaqxaqamaputun pero jantu matichun kachꞌapal. Jantukaꞌ ixlakachin julchan yu Dios laksaklhi para katalhimaqchapul.

³¹Qaynlhuu lapanakni talhakapuꞌal. Vachuꞌ ixtanajun: —¿Tas kunacha tejkan kaminaꞌ ni Cristo? ¿Kamakayaꞌ ni yucha apalay lajꞌay axtoqnu xajantu yu aniy lapanaki?

³²Ni fariseos takꞌatsal ni lapanakni va chuncha ixtalhilakchiviniy ni Jesús. Chuncha ni yuꞌuncha ali yu xaꞌukxtinin kuras talhijunil yu xapolicias ni ay lakatajtan para kataꞌal laqxaqamanan.

³³Ex ni Jesús naul: —Kitꞌin jantucha paqlhuu kaktaulaꞌ kun uxiknan. Niman kaklaqꞌanchoqoyaꞌ yu kimalaqachal.

³⁴Astan uxiknan kilalakxkauyau pero jantu lay kilatemayau. Jantu lay kapꞌinapitik taꞌan kitꞌin kaktaulanta.

³⁵Chuncha ni israelitas aqtayl talalhisakmiy, va tanaul: —¿Tas ancha kaꞌanacha ni yucha ni jantu lay katemayau? ¿Kalaqꞌanaꞌ taꞌan tavilanal yu jantu israelitas kataval y kalakmalaniyaꞌ?

³⁶Kintajunan “Kilalakxkauyau pero jantu kilatemayau.” Vachu najun “Jantu lay kapꞌinapitik taꞌan kitꞌin kaktaulanta.” ¿Tis va suncha naunputun?

³⁷Tejkan va paqtauncha para kalal ni kꞌatan, tayal ni Jesús, va pꞌays chivinil, va naul: —Incha matichun oqputun xkan, kilaqmilcha ni kitꞌin ex kaꞌoqlhicha.

³⁸Yu kilhakapuꞌan yucha kunaꞌ tacha najun la ixchivinti Dios: “La xalhanuti kaxajtachal xkan yu xtaꞌa jatsukunti.”

³⁹Tejkan chuncha naul ni Jesús va ixlhichiviniy ni Espíritu Santo yu katalaqaꞌiyaꞌ ni lapanakni yu katalhakapuꞌanaꞌ ni yucha. Pero ni Jesucristo jantukaꞌ ay ixmakakan xlhiyucha ni Espíritu Santo jantukaꞌ ixmin.

⁴⁰Ixꞌalin lati lapanakni tejkan chuncha taqasmaklhi, va ixtajuniy: —Laqsaval, yucha va yu xalaqputeꞌeniꞌ ixchivinti Dios.

⁴¹Y yu alati ixtajuniy: —Yucha ni Cristo yu lakꞌulata Dios. Pero lati ixtanajun: —Jantu yuꞌ kaval ni Cristo. Ni Cristo jantu kamintachal Galilea.

⁴²La ixchivinti Dios najun ni Cristo yu kaminaꞌ va ixpapanti David kunaꞌ. Najun kaminaꞌ tsukunuꞌ laka putaulan Belén taꞌan la ixputaulan ixjunita ni David yu maqancha ixlhachimoꞌonun.

⁴³Chuncha ni lapanakni tatapulvaqlhi va por Jesús.

⁴⁴Lati ixtalhiꞌuxaꞌan laka pachꞌin pero jantu matichun kachꞌapal.

⁴⁵Ex yu xapolicias laka ay lakatajtan taminchoqolcha taꞌan ixtayanal ni fariseos ali ni xaꞌukxtinin kuras. Va talhisakmil: —¿Valiꞌiycha jantu kꞌalhitꞌantꞌik?

⁴⁶Chuncha ni policias taqaltayanal, va tanaul: —Jantu aqtaun matichun lapanaki chiviniy tacha yu aniy lapanaki.

⁴⁷Ex ni fariseos tanaul: —¿Ex yu uxiknankꞌan vachucha tamakanutan ni yucha?

⁴⁸Jantu matichun jalhachimoꞌonuꞌ lhakapuꞌan. Vachuꞌ ni kijnan yu fariseos kuntau jantu klhakapuꞌanau.

⁴⁹Vamun talhakapuꞌan ni valiꞌiy lapanakni yu jantu tamispay ixlhachimoꞌon ni Moisés. Yuꞌuncha kalakmukꞌanikanaꞌ maqanlqajnati.

⁵⁰Ex ni Nicodemo yu aqtauncha laqkilal ni Jesús lakaputsꞌisni va jalakjunil: