San Juan 7:24-48

²⁴U awa kiamtu aizpa izamtuasmin, usparuza “kwail kiarɨt” kizman. U awa kiamtu aizpa izakane, une uspawa watcha kainarawa.

²⁵Suasne mɨnpazha Jerusalén pɨpulura uztuzne usparuzpain mɨmamɨzta: —¿Awane an ampura piantana sayamtuki?

²⁶Mane usne wan iztakin paranamtu. Mɨnminkas chinkas kizamtuchi. ¿Judío ɨnintuzne an ampu Dios nɨrɨtmika i nɨjkulamtuki?

²⁷Aune an ampu mɨntas amtu pianmakpas. Dios narɨtmika akane, mɨnminkas mɨntas amtu piankamasachi.

²⁸Dios katsa yalta kamtanamtuasmin, Jesúsne sun mɨt kit tɨnta kaiznara: —Une nawa piankamamtu. Une na mɨntas amti pian. Apminpain at chi ish. Usne, watchamika i, nawa ɨninta. Une ussa pianchi.

²⁹Nain ussa pianish, us nawa ɨninta akwa. Mane tas arau.

³⁰Suasne awa ussa piz kit sɨpshiarakas, mɨnminkas ussa pizarachi. Mama ussa piztu payu taiztachi.

³¹Akkwan awane us nɨrɨtmika i nɨjkulara. Mamaztuzne kaizara: “Dios nɨrɨtmika akane, usne, an ampukana, anza iztasparɨt kal kimanazi.”

³²Fariseo awa Jesúspa kaizamtu aizpa mɨarawane, uspakas pariya ɨnintuzkas Dios katsa yalkis policíaruza ɨninnara, Jesústa piz kit mɨl kit kajchira sɨpnapa.

³³Suasne Jesúsne kaiznara: —Nane ukasa akwan payu chin tunash. Suasne nawa ɨnintamikawarain kailtɨnash.

³⁴U nawa sayamtukas, une nawa wanmalamanazi. Mɨnminkas na ɨmtura ɨasachi.

³⁵Suasne Judío awane usparuzpain ka mɨmamɨzta: —¿Anne mɨnpa ɨrɨnsa? Usne au iztakis ɨsachi. ¿Usne Griego suwara Judío awaruza kamtana ɨrɨnsa? ¿Diosta pianchiruza kamtana ɨrɨnsa?

³⁶Us kaiztu aizpa piankamsachimakpas. Sunkana kaizta: “Nawa saiyanazi. Nawain wanmalamanazi. Une na ɨmtura ɨasachi.”

³⁷Minpa pishta payune anza katsa i. Sun payura Jesúsne kuhs kit tɨnta kaiznara: —Mɨnpazha kwazi kiltane, nawa anka. Nawa nɨjkultumikane nawa atpa, kwanpa, uznapa.

³⁸Jesúsne sunpa kaiz kit kwaziwa kwinta kira, awa kwazi kiltu akwa. Awane kwazi kwanpa pashiamtu, au sukin uzna. Jesúsne ankas Dios pitpa kaiztu: Nawa nɨjkultumikane kwazi kumtu mikakana i. Usne uznazi.

³⁹Sun kizkane, Jesúsne paiña Sɨnam Izpulpa kwinta kira. Paiña Sɨnam Izpulne Jesústa nɨjkultuza sapnashinat kit uzninnanazi. Jesús mama irɨttas kuhstachi akwa, Diosne paiña Sɨnam Izpulta mama ɨnintachi, Jesústa an watsal namnapa.

⁴⁰Jesús kaizta aizpa mɨarawane, mɨnpazha awaruzpain kaizara: —An Dios kainammmikane i.

⁴¹Mamaztuzne kaizara: —Anne Dios narɨtmika i. Mamaztuzne mamaz tuntu kizara: —Cristone Galilea suras amanazi.

⁴²Dios pɨnkɨhta ka parɨt: “Cristone Davidpa ɨninmikawa kwaltas puznazi. Usne Belén pɨpulukin kawinazi.”

⁴³Awane Jesús akwa paimpa ɨara.

⁴⁴Mazakanane ussa pizshiara, kajchira sɨpna. Mɨnminkas ussa pizarachi.

⁴⁵Dios katsa yalkis policíane ɨninturuz purakin kaiyara. Pariyaruza ɨnintuzkas Fariseo policíaruzkas mɨmanara: —¿Chikishma Jesústa karaamanash?

⁴⁶Policíane sɨnkanara: —Mɨnminkas an ampukana paratchi.

⁴⁷Suasne Fariseo awane mɨmanara: —¿Jesúsne uruza kain kinamtukish?

⁴⁸Au Judío awaruza ɨninturuzne us Dios narɨtmika i nɨjkularachi. Fariseo awaruzkas us Dios narɨtmika i nɨjkularachi.