SAN JUAN 7:20-34

²⁰Xlacán chuná̱ kalhti̱ko̱lh: —Akskahuiní̱ kalhi̱ya. ¿Tí̱ chú̱ puhuaniyá̱n namakni̱yá̱n?

²¹Jesús chuná̱ huaniko̱lh: —Maktum quilhtamacú̱ acxni̱ pacs jaxcán, quit ctláhualh aktum luhua tla̱n tatlahu, na̱ pacs lhpipak li̱lacahuani̱tántit, chu̱ hasta chunacú̱ tili̱aklhu̱hua̱tnampá̱tit.

²²Huixín huá̱ circuncidar li̱tlahuako̱yá̱tit lactzu̱ milakkahuasancán sa̱mpi̱ chuná̱ tica̱li̱ma̱paksí̱n Moisés (ma̱squi chá̱ luhua xli̱ca̱na̱ pi̱ ni̱ hua̱ Moisés ma̱quilhtzuqui̱ni̱tanchá̱ yuma̱ hua̱ntu̱ li̱ca̱cni̱naniyá̱tit Dios, hua̱mpi̱ huá̱ xamaka̱n mintla̱tcan Abraham), hua̱mpi̱ huixín fuerza̱ ma̱chuqui̱naná̱tit actzu̱ xtiyatli̱hua̱ lactzu̱ milakkahuasancán acxni̱ a̱cu lacachinko̱y ma̱squi acxni̱ lakcha̱ni̱t sábado acxni̱ li̱huancán pala tí̱ nascuja.

²³Pus lapi̱ huixín caj xpa̱lacata ni̱ lacatza̱laputuná̱tit xli̱ma̱paksí̱n Moisés, pus circuncidar tlahuako̱yá̱tit lactzu̱ lakkahuasán ma̱squi sábado acxni̱ ni̱tí̱ scuja, ¿tú̱huan chi̱nchu̱ luhua quili̱si̱tzi̱niyá̱tit acxni̱ pi̱ cma̱pácsalh cha̱tum ta̱tatlá̱ acxni̱ yama̱ quilhtamacú̱ li̱huancán pala tí̱ nascuja?

²⁴Ni̱ luhua caj aklakuá̱ caquimputza̱nanítit hua̱ntu̱ ctlahuay. Acxni̱ pala naquimputza̱naniputuná̱tit hua̱ntu̱ ctlahuani̱t, hua̱mpi̱ hua̱ntu̱ luhua aksti̱tum catlahuátit.

²⁵Cha̱nchu̱ makapitzí̱n hua̱nti̱ xuilako̱chá̱ c-Jerusalén acxni̱ kaxmatko̱lh yuma̱ tachihuí̱n, chuná̱ tzúculh kalhasquini̱nanko̱y: —¿Tú̱ hua̱ yumá̱ ti̱ putzama̱ca̱ laqui̱mpi̱ namakni̱cán?

²⁶Pus caucxílhtit la̱ntla̱ siyuj akchihui̱nama̱, na̱ ni̱tí̱ pala tí̱ xaklhu̱huá̱tnalh. Ma̱x luhua akata̱ksko̱ni̱t quinapuxcuncán pi̱ yuma̱ chixcú̱ hua̱ Cristo ti̱ naquinca̱lakma̱xtuyá̱n.

²⁷Hua̱mpi̱ quin catzi̱ya̱hu ní̱ xlá̱ mini̱tanchá, chu̱ na̱ catzi̱ya̱huá̱ anta̱ni̱ lacachini̱t. Pus ni̱ chuná̱ catiqui̱táxtulh acxni̱ Cristo namín ca̱tuxá̱huat, sa̱mpi̱ ni̱tí̱ caticátzi̱lh ní̱ luhua xlá̱ naminachá.

²⁸Cha̱nchu̱ Jesús, maktum la̱ntla̱ xma̱siyuma̱ c-templo, palha̱ tzúculh chihui̱nán, chuná̱ xquilhuama̱: —Huixín huaná̱tit pi̱ quilakapasá̱tit quit, na̱ mat catzi̱yá̱tit anta̱ni̱ xalá̱ quit, hua̱mpi̱ huí̱ kampa̱tum hua̱ntu̱ ni̱ catzi̱yá̱tit: quit ni̱ caj quiacstu quimpa̱lacata̱ ma̱squi cmini̱t, sa̱mpi̱ huí̱ cha̱tum hua̱nti̱ quimacamini̱t, chu̱ huá̱ xlá̱ luhua tali̱pa̱hu xtachihuí̱n, hua̱mpi̱ huixín ni̱ lakapasá̱tit.

²⁹Quit xlá̱ clakapasa, sa̱mpi̱ antá̱ c-xpa̱xtú̱n cminchá, chu̱ xa̱huachí̱ xlá̱ quimacamini̱t.

³⁰Pus hua chí̱ xli̱puhuaniko̱y nachipako̱y, hua̱mpi̱ ti̱ ni̱ xatí̱ máca̱lh xmacán, sa̱mpi̱ ni̱ naj chuná̱ xlakchá̱n quilhtamacú̱ la̱ntla̱ xlá̱ namakni̱cán.

³¹Hua̱mpi̱ yuma̱ li̱lhu̱hua̱ ti̱ xkaxmatnima̱kó̱ xtachihui̱n, na̱ lhu̱hua̱ hua̱nti̱ tica̱najlaniko̱lh, cha̱nchu̱ chuná̱ xuanko̱y: —Chi̱nchu̱ acxni̱ namín Cristo quima̱akapu̱taxti̱nacán, ¿pi̱ tlak xali̱huaca̱ lactlanca li̱ca̱cni tatlahu natlahuay ni̱ xahua̱ tu̱ tlahuay yuma̱ chixcú?

³²Yama̱ chixcuhuí̱n hua̱nti̱ xuaniko̱cán fariseos, chu̱ xanapuxcun xpa̱lijnican judíos, xlacán tzucuko̱lh kaxmatko̱y la̱ntla̱ xli̱chihui̱nanko̱y tachixcuhuí̱tat hua̱ntu̱ xlá̱ xtlahuay Jesús, huata xlacán maca̱nko̱lh makapitzi̱n policías c-tlanca templo laqui̱mpi̱ tachí̱n nale̱nko̱y Jesús.

³³Xlacán anko̱lh hua̱mpi̱ Jesús chuná̱ huaniko̱lh: —Nia̱lh luhua maka̱s quilhtamacú̱ cca̱ta̱lamá̱n quit, sa̱mpi̱ nactaspitpalay c-xpa̱xtu̱n hua̱nti̱ quimacamini̱t.

³⁴Yama̱ quilhtamacú̱ huixín naquimputzayá̱tit, hua̱mpi̱ nia̱lh caquintitá̱kstit, sa̱mpi̱ huixín ni̱ lay catipítit anta̱ni̱ quit nactahuilaya̱chá.