San Juan 7:17-47

¹⁷Sa xi ngu xuta meje sahmi me sacuatjin xi meje rë me xi catsingatju ná ne, ngajan sacú cumachaya rë me tsëhë cjua xi vicuyá, ¿há xi tsëhë Nina ne? o ¿há xi nduva tsëhë cjuatacun naha suva?

¹⁸Xuta xi chja me cjua xi nduva tsëhë cjuatacun rë suvá me ne, meje sahmi jyë sahmi hnga suvá me yojo rë me. Peru xuta xi meje sahmi jyë sahmi hnga me me xi catsingatju rë me ne, me vëhë ne, quixi me cojo cjua rë me hacuaha tsajin cjuatsehen cahntsua xahasen rë me.

¹⁹’Moisés ne, casua nuju me ley rë Nina, peru hisca ngu ngayun nihñuchuun sacuatjin chja ley vëhë. ¡Tsëhë vëhë rë xi meje nicuhun ná! ―‍Cuatjin cachja Jesús.

²⁰Ngajan xi xutacjín jan ne, cuitjin cafayangui me: ―‍¿Yo xitsehen xi cachja cojo nuju? ta nguehe ne, tsajin yo xi meje tsiquehen nuju. ―‍Cuatjin cafayangui xutacjín jan.

²¹Hane xi cafayangui Jesús ne, cuitjin cachja me: ―‍Ngayujun ni ngayun ne, quijircun nuju ngatsë rë ngu xcusun xi casahme nixtin xi chjahájenda rë.

²²Peru suvá Moisés hacuaha cavejña me xcusun xi xtí chuxin rë quihndi xihin. (Xi cjuaquixi ne, hacuiin Moisés ta xutachanga nuju xi cavejña me xcusun vëhë.) Hane vëhë xi ngayun ne, vichun chuxin rë quihndi xihin handasa nixtin xi chjahájenda rë.

²³Sa xi vichun chuxin rë quihndi xihin nixtin xi chjahájenda rë cojo sa xi nihñuchuhun sacuatjin cjua xi chja ley rë Moisés ne, ¿mé má cuatjin ma cjan nuju cojo ná xi casahme xi camandaja camahani ngu xuta nixtin xi chjahájenda rë ni?

²⁴Ha quihndë hacuiin tujyë nichuvun ná ta nichuvun ná cojo ngu cjuatacun xi cjuaquixi. ―‍Cuatjin cachja Jesús.

²⁵Ngajan xi ngujo xuta nandya Jerusalén ne, cuitjin cachja me ngajñi rë me: ―‍¿Hacuiin me vihi xi vinchise rë xi cueya ni?

²⁶Peru chutsujun ta cuajyihi me secun me tichja tichja me cojo xuta, hane ndastu ngu cjua chja xutaxa rë cojo rë me. ¡Hyaan sa xi vëëndaja xutaxa rë xi me vihi xi catsingatju jain Nina me!

²⁷Me vihi ne, ha hyan jani canduva me, peru hya xi cuinduva me xi Nina tsingatju rë ne, tsajin yo vëë jani cuetju me cuinduva me. ―‍Cuatjin cachja xuta xi cuacun jan.

²⁸Ngajan xi Jesús ne, xi quijinduju sa cavicuya me xuta ngajan yungun xi matitjun ne, jercu hñu cachja me cuitjin: ―‍¿Há quixi xi hyun ná hacuaha hyun jani canduva? Peru ngahan ne, hacuiin cjuatacun naha suva xi canduva. Me xi catsingatju ná ne, hatuxa quixi me cojo cjua rë me, peru ngayun ne, hyúun me.

²⁹Ngahan ne, hvë me ta, tsëhë xi hiscan tacun me ne, ngajan canduvá. Hacuaha me vëhë catsingatju ná me. ―‍Cuatjin cachja Jesús.

³⁰Tsëhë xi cuatjin cachja Jesús cjua vëhë ne, vëhë xi meje cjuaha xuta xi cuacun jan me. Peru tsajin yo xi cavetahatsja rë me ta, tsëhë xi cjëë cuetjucaa nixtin xi cuatjin cuma.

³¹Hane jemu cjín xuta ngajñi rë xutacjín jan ne, camangu cacun me cojo Jesús. Cuitjin cachja me: ―‍Hya xi cuinduva me xi Nina tsingatju rë ne, ¿há hitsë sa cjín cjuarcun sahmi me xi cuma rë cjuarcun xi casahmi me vihi? ―‍Cuatjin cachja xuta xi cuacun jan.

³²Hane ngujo cha fariseo ne, cahndë cha xi visiajmihma xutacjín jan ngajñi rë me cojo xicjin me cjua vëhë. Ngajan xi yëjë ni nahmi xi matitjun cojo cha fariseo jan ne, catsingatju me mayu cojo nisë rë cha xi chjahá rë Jesús.

³³Hane Jesús ne, cuitjin cachja me: ―‍Ngujo nixtin sa xi cuitejña cojo nuju, sehe cúya cjuë́ nga hiscan tacun me xi catsingatju ná.

³⁴Ngayun ne, cuinchunsun ná, peru sacuiin nuju ngahan ta, tsëhë xi hiscan xi cuitejña ne, cumaji cuangun. ―‍Cuatjin cachja Jesús.

³⁵Ngajan xi xutaxa rë jan ne, cavinenguise xicjin me cuitjin: ―‍¿Jani cjue cha xi cuijyihi vi xi sacuiin naja cha? ¿Há cjue cha ngu nangui cjin, cjue tjengui cha xuta naja xi cavitsojo ngajñi rë xutaxín hane ngajan cuicuya cha xutaxín jan ni?

³⁶¿Mé vijne cjua xi chja cha xi cuinchaseen cha ne, sacuiin naja cha, tsëhë xi hiscan cuejña cha ne, cumaji cuanguen? ―‍Cuatjin cavinenguise xicjin xutaxa rë jan.

³⁷Quihndë ne, nixtin xi cajnetaha suhi jan ne, vëhë nixtin jyë tsëhë suhi jan. Hane casecun Jesús cachjahñu me cojo xuta cuitjin: ―‍Sa xi tjin yo xi xinda rë ne, catinduva tjengui ná catihi.

³⁸Xuta xi mangucacun me cojo ná ne, cuatju me sacuatjin chja xujun rë Nina xi chja cuitjin: “Cuetju tsëhë xahasen rë me sacuaha nandá xi ña vangatë xi sua rë me cjuahñu xatsë.” ―‍Cuatjin cachjahñu Jesús.

³⁹Xi cuatjin cachja Jesús ne, cachja me tsëhë Hasen rë Nina xi sehe sacú rë xuta xi mangucacun me cojo Jesús. Cuatjin cachja Jesús ta, tsëhë xi Nina ne, cjëë sua me Hasen rë me, tsëhë xi Jesús ne, cjëë cuma jyë cuma hnga me cojo Hasen rë me.

⁴⁰Hane xi cahndë xutacjín jan cjua vëhë ne, ngujo me ne, cuitjin cachja me: ―‍Me vëhë ne, cjuaquixi xi me vëhë profeta xi jemu nechanyan rë. ―‍Cuatjin cachja ngujo me.

⁴¹Hane ngujo nga me ne, cuitjin cachja me: ―‍Me vëhë xi Tsingatju Nina. ―‍Cuatjin cachja me. Peru ngujo nga me ne, cachja me cuitjin: ―‍¡Peru Me xi Tsingatju Nina ne, hacuiin ngajñi rë xuta Galilea cuetjujñi me!

⁴²¡Ha hyan xi xujun rë Nina ne, chja ta Me xi Tsingatju Nina ne, cuinduva me tsëhë tjë rë xutachanga naja David, ngajan Belén hiscan nangui rë David! ―‍Cuatjin cachja me xi cuacun jan.

⁴³Cuatjin camá xi ngatsë rë Jesús ne, hacuiin ngu ni cjuatacun catsingataha cacun xutacjín jan.

⁴⁴Vëhë xi ngujo xuta jan ne, meje cjuaha me Jesús cjuecojo me ndavaya. Peru tsajin yo xi cavetahatsja rë me.

⁴⁵Hya xi camá ne, mayu cojo nisë rë cha ne, cavuya quiji nga cha xcun nahmi xi matitjun cojo xcun cha fariseo xi cuacun jan, hane xutaxa rë xi cuacun jan ne, cuitjin cachja me cojo mayu jan: ―‍¿Mé má canduvuun cojo cha? ―‍Cuatjin cachja me.

⁴⁶Ngajan xi cha mayu cojo nisë rë cha jan ne, cuitjin cafayangui cha: ―‍¡Cjëë camahani cuinuhyin xi chja ngu xuta sacuatjin chja me vëhë! ―‍Cuatjin cafayangui cha.

⁴⁷Hane cha fariseo jan ne, cuitjin cachja cha cojo cha xi cuacun jan: ―‍¡Tu ma rë sa xi cojo ngayun camandacha ngayun!