San Juan 7:16-30

¹⁶Jesúsne sɨnkanara: —Ap kamtamne apchi. Nawa ɨnintamikane na kamtamtu aizpa nawa chɨhkara.

¹⁷Dios pashimtu aizpa kitmikane ap kamtampa piankamnazi. Dios nawa kamtamtu akwa, une Diospa piankamanazi. Na mintu aizpa kamtamtuchi.

¹⁸Usminpain paramtumikane sunkana kimtu, awa ussa wari paraanapa. Kal kimtumikane paiña kal kitpa, awa ussa ɨninmumikasha wari kizanapa. Sun ampune watcha i. Mizurainkas pɨrail kaiztuchi.

¹⁹Moisésne uruza ɨninnara, paiña ɨnintu aizpa kianapa. Une us kaiznara aizpa kiamtuchi. ¿Chitma une nawa piantashimuspas?

²⁰Awane sɨnkaara: —Salizne nua pizta. ¿Mɨnma nua piantashimtui?

²¹Jesúsne sɨnkanat kit kaiznara: —Na maza iztasparɨt kal kwaizkultu payura kit akwa, une sunpa iztaspaarɨt.

²²Sunkana Moisésne uruza ampu pashpawa aya tɨtnapa, circuncisión kitpa, ɨninnara. (Moisés sun ɨninnarachikas, u kwalne an ñamin sun kinanapa ɨninnara.) Katmizna une kwaizkulmu payurakas ampu pashpawa aya tɨttamtu. Ankas kal i.

²³Une ampu pashpawa aya tɨttamtu, Moisés kaizta aizpa kianapa. Une kwaizkulmu payura sun kiamtu. Na maza ampura kwaizkulmu payura kakulnintune, une ¿chitma nakasa aliz kulamtu?

²⁴U awa kiamtu aizpa izamtuasmin, usparuza “kwail kiarɨt” kizman. U awa kiamtu aizpa izakane, une uspawa watcha kainarawa.

²⁵Suasne mɨnpazha Jerusalén pɨpulura uztuzne usparuzpain mɨmamɨzta: —¿Awane an ampura piantana sayamtuki?

²⁶Mane usne wan iztakin paranamtu. Mɨnminkas chinkas kizamtuchi. ¿Judío ɨnintuzne an ampu Dios nɨrɨtmika i nɨjkulamtuki?

²⁷Aune an ampu mɨntas amtu pianmakpas. Dios narɨtmika akane, mɨnminkas mɨntas amtu piankamasachi.

²⁸Dios katsa yalta kamtanamtuasmin, Jesúsne sun mɨt kit tɨnta kaiznara: —Une nawa piankamamtu. Une na mɨntas amti pian. Apminpain at chi ish. Usne, watchamika i, nawa ɨninta. Une ussa pianchi.

²⁹Nain ussa pianish, us nawa ɨninta akwa. Mane tas arau.

³⁰Suasne awa ussa piz kit sɨpshiarakas, mɨnminkas ussa pizarachi. Mama ussa piztu payu taiztachi.