SAN JUAN 7:14-32

¹⁴Te ta ngǔhuⁿ dava vico, te cuánguɨhu Jèsús veñúhu càhnu sá ǐo cùnuu, te ní ngüíta‑gá dácuàha‑gá ñáyiu.

¹⁵Te ñáyiu isràél ní cuñúhu vìhí‑yu sá ǐo váha càháⁿ‑gá, te ní xítnàhá‑yu: —¿Ná cuèndá ío váha ñùhu‑tu dɨ́quɨ́ těe‑a tnúhu cáháⁿ‑dé te ñá túú ní dàcuaha‑dé‑i? —càchí‑yu xǐtnàhá‑yu.

¹⁶Te ní xáhaⁿ Jèsús: —Ñá dɨ́ú cuèndá méè‑í cúú‑xí sǎ dánèhé ñáhà‑í xii‑ndo, chi cuèndá Dútú Ndiǒxí Yaá ní tendaha ñàha xii‑í véxi‑í cúú‑xí.

¹⁷Te núu ìó dava‑ndo nɨ̀ yuhu nɨ iní‑ndó cuìní‑ndó càda‑ndo nacuáa cuìní Yǎ Ndiǒxí cunduu, te cutnùní ndáá iní‑ndó sǎ tnǔhu dàcuaha ñaha‑í xii‑ndo cùu‑xi cuendá méé Dǔtú Ndiǒxí, te ñá dɨ́ú cuèndá méè‑í cúú‑xí.

¹⁸Te tée cuìní sá cádá càhnu ñaha ñáyiu xii‑dé, tée‑áⁿ càháⁿ‑dé nàcuáa véxi iní méé‑dě. Dico yúhú cuìní‑í sá cádá càhnú‑yu Dútú Ndiǒxí Yaá ní tendaha ñàha xii‑í véxi‑í ñuyíú‑a, te càháⁿ ndáá‑í te ñá túú dàcuandehnde‑í.

¹⁹’Te ndíi Moìsés ní taxi ndíi tnúhu sá sánú ìchi ñaha xii‑ndo nacuáa cundecu‑ndo, te ni dùcaⁿ ñá túú sàndáá iní‑ndó nàcuáa càháⁿ tnúhu‑áⁿ. ¿Te ná cuèndá cuìní‑ndó càhni ñaha‑ndo xii‑í? —càchí‑gá xáhaⁿ‑gǎ xií‑yu.

²⁰Te ní xáhǎⁿ‑yu xii‑gá: —Yucu ñǎvǎha dàcoto ñaha xii‑ó, chi vá yǒo ɨɨⁿ cuìní cahni ñaha xìi‑n —cachí‑yu xǎhǎⁿ‑yu xii‑gá.

²¹Te ní xáhaⁿ Jèsús xií‑yu: —Sá nǐ quide‑í ɨɨⁿ sá vǎ yǒo tnàhí ndàcu cada nduu cuu‑xi nduu ndetatú‑ó, xíǎⁿ ío ní cuñúhu ñaha‑ndo xìi‑í.

²²Te ndíi Moìsés ní cachí ndíi sá cuǎha‑yu sèñá ñɨɨ cue landú tée, dico ñá dɨ́ú mèe ndíi ni càhu iní ndíi chi ducaⁿ tnàhí ní xóo cada cue ñaní tnáhá‑ó dàvá‑áⁿ, núu xíǎⁿ nchòhó sǎha‑ndo sèñá ñɨɨ landú tée cuěi cùu‑xi nduu ndetatú‑ó.

²³Te ducaⁿ quìde‑ndo cuendá sá ñà túú nǎ cumání‑ndó nǔú tnǔhu sá sánú ìchi ñaha xii‑ndo ní dándǒo ndíi Moìsés. ¿Te ná cuèndá cúděéⁿ‑ndó nǔù‑í sá nǐ quide tátna‑í tée cùhú nduu ndètatú‑ó‑í?

²⁴Te váha váha cada cuèndá‑ndó, te vá cuèndá‑ni cáháⁿ‑ndó sǎ yǔhú ndècuéchi‑í chi ñá túú xìní‑ndó —càchí‑gá xáhaⁿ‑gǎ xií‑yu.

²⁵Te dava ñáyiu ñuú Jerusàlén ní ngüíta‑yu xǐtnàhá‑yu: —¿Náa ñá dɨ́ú těe‑áⁿ nándùcu‑güedé cahni‑güedé?,

²⁶núu nái‑dé nútnɨ̌ɨ núú chítú nǔú tàcá‑ǎⁿ càháⁿ‑dé, te vá yǒo cùyɨɨ cúñaha xìi‑dé ɨɨⁿ tnúhu. Cudana te cue tée cùchiuⁿ sandáá iní‑güedé sá dɨ́ú‑dě cúú‑dě Crìstú Yaá ní tendaha Yǎ Ndiǒxí véxi ñuyíú‑a.

²⁷Dico nchoo xìní‑ó ndèé ichi véxi tée‑ǎⁿ, dico Crìstú ná quìxi‑gá chi vá yǒo ɨɨⁿ quiní ndèé ichi quixi Yaá‑áⁿ —càchí‑yu xǐtnàhá‑yu.

²⁸Te yɨ̀hɨ Jesús xɨtɨ́ veñúhu càhnu sá ǐo cùnuu danehe‑gá ñáyiu, te ní tecú dóho‑gá tnúhu càháⁿ‑yu. Te níhi ní cáháⁿ‑gá, te xáhaⁿ‑gǎ xií‑yu: —¡Ná quiní‑tu nchòhó ndèé ichi véxi yúhú! Yúhú véxi‑í dico ñá dɨ́ú sǎ cúú ìní méè‑í, chi Yá Ndiǒxí Yaá quídé nchàa‑ndɨ túhú sá vǎha ní tendaha ñàha‑gá xii‑í véxi‑í, te nchòhó ñá túú xìní‑ndó‑gǎ.

²⁹Te yúhú xìní‑í‑gá chi núú ndécú‑gǎ ní quee‑í véxi‑í, te dɨu mee‑gǎ ní tendaha ñàha‑gá véxi‑í —càchí‑gá xáhaⁿ‑gǎ xií‑yu.

³⁰Te sá dúcáⁿ nǐ cáháⁿ‑gá, núu cuìní‑güedé tnɨɨ ñaha‑güedě xii‑gá quɨ́hɨ́ⁿ‑gá vecaá ní cùu, dico vá yǒo ɨɨⁿ ni cùyɨɨ tnɨɨ ñaha xii‑gá chi vátá sàá‑gá òré tnɨɨ ñaha‑güedě.

³¹Dico vàí‑yu ní sándáá iní ñáhǎ‑yu xii‑gá, te ní xítnàhá‑yu: —¿Nágá cúú sǎ cádá Crìstú ná quìxi‑gá‑i?, te tée‑a ío cuéhé nǔú sǎ tá quìde‑dé véxi. Váa dɨu tée‑a cùu‑dé Crìstú Yaá ní tendaha Yá Ndiǒxí véxi ñuyíú‑a —càchí‑yu xǐtnàhá‑yu.

³²Te ní níhí cue tée cùu fariséú tnúhu nàcuáa càháⁿ ñáyiu cuèndá Jèsús, núu ní ndatnúhu‑güedé ndɨhɨ cue dútú cúnùu, te ní techìuⁿ‑güedé cue tée quìde cuendá veñúhu cuáháⁿ‑güedé cuátnɨɨ ñaha‑güedě xii‑gá ní cùu.