San Juan 6:8-25

⁸Chiy ax gunii stuby xpɨnny ni lá Andrés bets Simóny Bed:

⁹—A tuby bniniin ni caa gaay guechtily cun tiop beld zuguaa ruré. ¿Per xílesa sacquɨy par lo zienguilliú bniety?

¹⁰Chiyru gunii Jesús: —Gulgaats iratedeb cuedeb. Ne cun nuu guillaa ruy ax gurideb. Laadeb nádeb zecti gaay mily bniety nguiu.

¹¹Chiyru cuáa Jesús de guechtilqui. Chiy chi gulull bdeedny gracy Dios ax bdeedny de guechtilqui de xpɨnny par gudiizdebni lo irate de bniety ni zub ruy. Ziytiziac baanny cun de beld. Bdeedny zectisy ni bcaazdeb.

¹²Chi bial iratedeb, Jesús raipny de xpɨnny: —Gultop irate de ldáy ni biian te par quɨt xi chia perdidti.

¹³Laadeb ax btopdebni ne bchadeb tsɨbtiop dxumy de guechtily ldáy ni biian xte gaay guechtilqui.

¹⁴Chi guná de bniety milagrɨroo ni baany Jesús ax guniideb: —Didxldíquɨy laaniy nány profet ni canuun gueed lo guɨchliu.

¹⁵Per cun Jesús gucbeegacny dec rcaazdeb chanédeb laany a la juers par gúndebny rey, ax niy zégacny nez láani danyqui par suguaany laaizny.

¹⁶Chi biiu guxin, de xpɨny Jesús biatdeb ruu nisqui,

¹⁷biiudeb láani tuby barcu ax guzulo cadeeddeb lo nisqui par idzɨndeb Capernaum. Abialotec bcay, ne Jesús zeczi gady yaicquitiny.

¹⁸Chiy guzulo bdiia tuby biroo parzi quesentiand guzulo rzees nisqui.

¹⁹Chi guc zecti gaay o xoop kilómetro ni zédeb, gunádeb caza Jesús lo nisqui zebinuuny barcu xtendeb ax bdxibdeb.

²⁰Per laany raipny laadeb: —¡Nareniy, quɨt rdxibtɨ!

²¹Chiyru rcaazdeb níiuny láani barcuqui, per hóracqui bdzɨndeb rut zédeb.

²²Chi bragueel stuby dxi, de bniety ni biian dets nisqui nándeb dec tubyzi barcu zuguaa ruy ne gucbeedeb dec láanqui zé de xpɨny Jesús, per quɨt néti laany.

²³Horqui ax tuby tiop barcu ni zá guɨdx Tiberias bdzɨndengui gax nez rut bquiindeb guechtily chi gulull bdeed Jesús gracy Dios.

²⁴Parzi chi guná de bnietqui dec quɨt zuguaati Jesús ruy niclɨza de xpɨnny, ax biiudeb láani barcudequi par güedeb Capernaum rut güetíilydeb laany.

²⁵Chi bdzɨndeb Capernaum, deni bdxialdeb Jesús ax gunabdiidxdeb laany: —Maistrɨ, ¿gúc bdzɨnbiu ruc?