San Juan 6:60-71

⁶⁰Chi gulox bacaagdiajg reeman ni balüü Jesús laa reeman, zien ree bén zinal laaman rëb: ―Nawëëg daꞌt na̱j yayigniaꞌ ree ni naman. ¿Chu zajc guidxgaꞌ laaman?

⁶¹Chi gogbee Jesús ni canee reeman, gunabdiidxaman loj reeman, rëbaman: ―¿Rüjnnaa ni rnin lëjt ya?

⁶²¿Xhieza güündi bal guguiaadi Bén guxhaal Dios yayëꞌpaman lod guzuman gocli?

⁶³Tijbzi por xSprijt Dios rajp bejn guialnaban tiblayaa, bejn ad zileꞌt güün laazaman xhienin. Abiꞌ naj por xSprijt Dios zëëd ree diidx ni gunen lojdi, por ree diidx guin rajp bejn guialnaban.

⁶⁴Per lëjt yuꞌdi ad waliladxt. Rëb Jesús zian guial ragbeechaawaman diizd yaloj chu ree ad rliladxt laaman chu tëë yayü laaman.

⁶⁵Rëb tëëman loj reeman: ―Zeel ma rnin lojdi guial achut zileꞌ guiꞌt lon bal id zëëdaman por da Dadan Dios.

⁶⁶Diizd nadxel, zien ree bén zinal Jesús guroꞌnladx laaman, abiꞌ ad guzanëtri reeman laaman.

⁶⁷Dxel rëb Jesús loj guidxiptioꞌp ree xbejnman: ―¿Në lëjt rën yaguiaj ya?

⁶⁸Per badxiꞌ Simón Bëd laan, rëbaman: ―Dad, ¿chu loj yoꞌn? Awa xtiidxil zidnë guialnaban tiblayaa con Dios.

⁶⁹Dunujn ma baliduladx rayagbee tëën guial lüj na̱j Cristo, Xiꞌn Dios naban.

⁷⁰Dxel rëb Jesús loj reeman: ―¿Nid naj gule guidxiptioꞌpidi ya? Abiꞌ yan tijb gajqui lëjt na̱j ziꞌc xindxab.

⁷¹Rëb Jesús zian por Judas Iscariote, xiꞌn Simón, din Judas guin na̱j bén bayü laaman, majsi tijb gajc xbejnman najman.