SAN JUAN 6:6-21

⁶Jlyo tiꞌ Jesús sa ñaꞌan kuꞌni yu, loꞌo ngwa tiꞌ yu ñaꞌan yu sa ñaꞌan kuꞌni Lpe kanꞌ.

⁷Mxkwen Lpe ꞌin yu bra kanꞌ: ―Ja tyoꞌo skwa tukwa siyentu tñi plata chaꞌ xiꞌian nan ku nchga nten re, ni siya chinꞌ ti kaja ku skaa neꞌ ―ndukwin.

⁸Loꞌo nduun ska yu nu ngiꞌni xaꞌan chaꞌ ꞌin Jesús, nu naan Ndre, taꞌa ngula Tyu Simón lka yu. Ykwiꞌ Ndre loꞌo Jesús bra kanꞌ:

⁹―Ndiya ska nu kiꞌyu lyuꞌ ti re ―ndukwin Ndre―, loꞌo chinꞌ kiꞌyu jaxlya tejeꞌ ꞌin yu, loꞌo tukwa kula xuwe ti ꞌin yu. Ja tyoꞌo skwa chaꞌ kanꞌ, chaꞌ ku nten kaꞌan re ―ndukwin Ndre ꞌin Jesús.

¹⁰―Chkwiꞌ wan loꞌo nten kaꞌan kwa chaꞌ tyukwa neꞌ chinꞌ lo yuu kwa ―ndukwin Jesús bra kanꞌ. Xiin ꞌa yuu seꞌen suꞌwe kanꞌ loꞌo kaꞌan ꞌa kii xuwe ndiꞌin la kanꞌ. Kiꞌyu mi xkwiꞌ nu kiꞌyu ti mdiꞌin tsan kanꞌ, nu mdukwa lo kii.

¹¹Kanꞌ msñi Jesús jaxlya kanꞌ, ndya yu xuꞌwe ꞌin Ndiose chaꞌ nda Ni nan ku neꞌ kanꞌ. Kwiꞌ mdyisnan msuꞌwe Jesús jaxlya kanꞌ, mda yu ꞌin neꞌ nu ngiꞌni xaꞌan chaꞌ ꞌin yu, loꞌo neꞌ kanꞌ lka nu ngutsaa jaxlya ꞌin nten kaꞌan kanꞌ seꞌen ndukwa neꞌ. Loꞌo kunaꞌ kula kanꞌ mda Jesús ku neꞌ. Suꞌwe yku neꞌ sa ñaꞌan nu ngulaꞌ tiꞌ neꞌ nchga neꞌ.

¹²Xa wa mdyii yku neꞌ, ykwiꞌ Jesús loꞌo neꞌ nu ngiꞌni xaꞌan chaꞌ ꞌin yu xiyaꞌ bra kanꞌ: ―Xoꞌ kii wan nchga yuꞌwe nu nganun seꞌen yku neꞌ kwa, chaꞌ ja kanaꞌ ran ―ndukwin yu.

¹³Ngwañaꞌan yꞌni neꞌ bra kanꞌ, loꞌo nganun tii tyukwa xkuwi msaꞌan nu yuꞌwi jaxlya yuꞌwe kanꞌ, yuꞌwe nu nganun seꞌen yku neꞌ.

¹⁴Wa naꞌan neꞌ chaꞌ tnun nu tka yꞌni Jesús, kanꞌ chaꞌ ykwiꞌ neꞌ loꞌo taꞌa ndiꞌin neꞌ: ―Chañi chaꞌ yu kwa lka yu kula nu ndiꞌin chaꞌ chkwiꞌ chaꞌ ꞌin Ndiose loꞌoan, nu wa kan ti lo chalyuu re.

¹⁵Bra ti mgii tiꞌ Jesús chaꞌ nchka ꞌa tiꞌ neꞌ xñi neꞌ ꞌin yu, chaꞌ tsaa loꞌo neꞌ ꞌin yu chaꞌ ka yu ree nu ka ndloo la ꞌin neꞌ. Kanꞌ chaꞌ mdoꞌo tsuꞌ Jesús ndyaa mnan ti siꞌ kiꞌya, ndyaa yu ska ti yu.

¹⁶Wa ndyaa kwichaa bra kanꞌ, loꞌo neꞌ nu ngiꞌni xaꞌan chaꞌ ꞌin yu, mdiyan neꞌ tuꞌwa tiyuꞌ xiyaꞌ.

¹⁷Yten neꞌ niꞌ yka naꞌan chaꞌ tyoꞌo neꞌ tsaa neꞌ la xka laꞌa tsuꞌ tiyuꞌ xiyaꞌ, chaꞌ tyaan neꞌ kichen Capernaum, ngwa tiꞌ neꞌ. Ngwiꞌya tla bra kanꞌ, loꞌo ja ya kan Jesús seꞌen ndiꞌin neꞌ lo tyiꞌa.

¹⁸Lye ꞌa nskwa kwiꞌin lo tyiꞌa tiyuꞌ kanꞌ, ngatsa ꞌa tyiꞌa, yuꞌwi ꞌa kulooꞌ.

¹⁹Wa ndyaa yka naꞌan ꞌin neꞌ nu ngiꞌni xaꞌan chaꞌ ꞌin yu ta kiꞌyu o ta skwa kilómetro biyaꞌ tijyuꞌ lo tyiꞌa, loꞌo naꞌan neꞌ chaꞌ ndijyan Jesús seꞌen ndiꞌin neꞌ bra kanꞌ; ndaꞌan yu ndijyan yu lo tyiꞌa. Ytsen ꞌa neꞌ xa nu naꞌan neꞌ ꞌin yu.

²⁰Kanꞌ chaꞌ bra ti ykwiꞌ Jesús loꞌo neꞌ: ―¡Ja kutsen wan, naꞌ lkaǎn re! ―ndukwin yu.

²¹Suꞌwe ꞌa ngwa tiye neꞌ xa wa yten Jesús niꞌ yka naꞌan ꞌin neꞌ. Kwiꞌ ndla ti ngala yka naꞌan xka laꞌa tsuꞌ tiyuꞌ bra kanꞌ.