San Juan 6:57-71

⁵⁷Che Ru, che mbousar, vɨreco tecovesa. Ichui che aicove; ẽgüe ehi aveira che husar che sui yuvɨrecovera.

⁵⁸Añehe pan ɨva sui ogüeyɨ vahe rese. Co pan ndahei maná pe ramoi eta yuvɨrohu vahe nungar. Esepia, yande ramoi opaño ité omano yuvɨreco. Acoi ohu vahe rumo co che rete, oicovera apɨrẽhɨ vaherã ité —ehi ava eta upe.

⁵⁹Jesús oporombohe co mbahe rese judío ñemonuhasave tecua Capernaum ve.

⁶⁰Osenduse co yembohesa, setá Jesús rupi oguata vahe aipo ehi oyeupe yuvɨreco: —Aipo semimombehu yavai eté seroya ãgua; ¿ava vo vɨroya tẽira viña? —ehi yuvɨreco.

⁶¹Jesús rumo oicua voi eté iñehe-ñehe tẽise co mbahe rese yuvɨreco, evocoiyase oporandu: —¿Pemboasɨño tie che ñehe?

⁶²¿Mara peyera pĩha che repiase peye che, Ava Rɨquehɨr, ayeupise che reco agüerve vicho viña?

⁶³Espíritu ité niha omondo tecovesa; yande retecuer rumo ẽgüe ehi tẽi vahe. Co amombehu vahe pẽu ahe espíritu iyavei tecovesa.

⁶⁴Oime vɨte rumo amove pe pãhuve ndache reroyai vahe —ehi ava rehɨi upe. Esepia, Jesús oicua ité yɨpɨsuive uma ndovɨroyai chira, oicua avei uma ava omondora yamotarẽhɨmbar upe

⁶⁵aipo ehi: —Sese niha acoi aipo ahe pẽu: “Ndipoi chietera que ava ou vaherã cheu che Ru nomonguerẽhɨise imbou” ahe —ehi.

⁶⁶Ichuive tuprɨ Jesús rupi oguata vahe setá oseya yuvɨreco; ndoguata iri eté yuvɨreco supi.

⁶⁷Evocoiyase oporandu doce tuprɨ vahe güemimbohe upe: —¿Pe avei vo che reyapa pota peye? —ehi.

⁶⁸Simón Pedro rumo omboyevɨ chupe: —Che Yar, ¿ava upe vo oroso irira? Nde güeraño ité niha erereco ñehesa tecovesa apɨrẽhɨ vahe.

⁶⁹Ore nde reroyasar ité oroico iyavei oroicua nde ndaseco marai vahe, Tũpa supi eté vahe remimbou ereico —ehi Pedro chupe.

⁷⁰—Che niha opoporavo doce peico vahe, ñepei rumo pe pãhu pendar caruguar ité —ehi Simón upe.

⁷¹Jesús oñehe Simón Iscariote rahɨr, Judas, rese. Yepe doce semimbohe pãhu pendar viña, ahe rumo omondora ava yamotarẽhɨmbar upe.