SAN JUAN 6:57-70

⁵⁷Hua̱ Quintla̱t hua̱nti̱ quimacamini̱t, ni̱ kalhi̱ni̱t xquilhtzúcut, ankalhí̱n ucxla̱ta xastacná láma, chu̱ xastacná lámaj nahuán, chu̱ yama̱ xaxli̱ca̱na̱ latáma̱t hua̱ntu̱ kalhi̱y, na̱ huá̱ quima̱xqui̱ni̱t laqui̱mpi̱ quit na̱ ankalhí̱n cli̱lámaj nahuán, pus na̱ chuná̱ chú̱ hua̱nti̱ naquili̱hua̱yán, chu̱ naquili̱kalhkasa̱ c-xli̱stacna, quit nacma̱xqui̱y yama̱ xaxli̱ca̱na̱ latáma̱t tu̱ quit ckalhi̱y.

⁵⁸Huá̱ luhua cca̱huaniputuná̱n pi̱ quit yama̱ xaxli̱ca̱na̱ caxtala̱nchu̱ hua̱ntu̱ ta̱ctani̱tanchi̱ c-akapú̱n. Yuma̱ lihua̱t ni̱ huá̱ xta̱chuná̱ la̱ntla̱ yama̱ maná hua̱ntu̱ tihuako̱lh xalakmaka̱n minatla̱tnacán c-desierto, sa̱mpi̱ xlacán ma̱squi cha̱li̱ cha̱lí̱ xuati̱lhako̱y fuerza̱ ko̱lunko̱lh ni̱ko̱lh, hua̱mpi̱ hua̱nti̱ nali̱kalhkasa̱ yuma̱ caxtala̱nchu̱ hua̱ntu̱ quintiyatli̱hua, xli̱pa̱án nalatama̱y.

⁵⁹Jesús chuná̱ li̱xakatli̱ko̱lh yuma̱ tachihuí̱n acxni̱ xli̱lhu̱huacán judíos xtanu̱ma̱kó̱ c-aktum xpu̱kalhtahuakacán c-xaca̱chiqui̱n Capernaum.

⁶⁰Acxni̱ kaxmatko̱lh hua̱ntu̱ huaniko̱ca̱, lhu̱hua̱ xlacán hua̱nti̱ csta̱laniputunko̱y Jesús chuná̱ huanko̱lh: —Yumá̱ hua̱ntu̱ xlá̱ quilhuama̱, luhua xli̱ca̱na̱ luhua tuhua̱ ma̱tla̱ni̱cán, ¿tí̱ chá̱ luhua tla̱n natlahuaniy, chu̱ tí̱ chá̱ luhua nakaxmatniy xtachihuí̱n?

⁶¹Hua̱mpi̱ Jesús xcatzi̱y pi̱ xlacán xli̱aklhuhua̱tnama̱kó̱ yama̱ chixcuhuí̱n hua̱ntu̱ xlá̱ xuaniko̱ni̱t, pus chuná̱ kalhasquinko̱lh: —Lapi̱ yumá̱ hua̱ntu̱ cca̱huanín ni̱ luhua li̱ca̱najlaputu mimpa̱lacatacán

⁶²pus ¿lá̱ntla̱ chú̱ luhua xqui̱táxtulh pala xquiucxílhtit quit Xatalacsacni Chixcú̱ ctaspitma̱pi̱ cahuá̱ c-akapú̱n anta̱ni̱ pu̱lh xacuilachá?

⁶³Chuná̱ qui̱taxtuy sa̱mpi̱ xma̱n hua̱ cspiritu Dios tla̱n naca̱ma̱xqui̱yá̱n yuma̱ xli̱pa̱án latáma̱t tu̱ cli̱chihui̱nama̱. La̱ntla̱ xli̱pacs mili̱skalalacán tu̱ caj xla̱ chixcuhuí̱n kalhi̱yá̱tit ni̱ lay ca̱makta̱yayá̱n naakata̱ksá̱tit xli̱pacs tu̱ quit cca̱huanini̱tán sa̱mpi̱ pacs huá̱ xtalacapa̱stacni cspiritu Dios, chu̱ xma̱n huá̱ xlá̱ naca̱ma̱xqui̱yá̱n yama̱ xasa̱sti milatama̱tcán, chu̱ mintalacapa̱stacnicán tu̱ nali̱akata̱ksá̱tit.

⁶⁴Huachá̱ xpa̱lacata ma̱squi catu̱cahuá̱ xacca̱huanín xpa̱lacata yumá̱, ccatzi̱y pi̱ huijcu nahuán makapitzi̱n huixín ti̱ nalakmakaná̱tit, chu̱ ni̱ catica̱najlaputúntit. Huá̱ chuná̱ Jesús li̱huaniko̱lh sa̱mpi̱ xlá̱ xcatzi̱y tuncán hua̱nti̱ ni̱ xca̱najlaniy, chu̱ na̱ chuná̱ xcatzi̱y hua̱nti̱ a̱li̱sta̱lh nali̱akskahuinán, chu̱ namacama̱sta̱y.

⁶⁵A̱li̱sta̱lh chuná̱ huá̱: —Pus huachá̱ xpa̱lacata quit cca̱li̱huanini̱tán pi̱ ni̱ pala cha̱tum tla̱n naquili̱pa̱huamputunko̱y lapi̱ ni̱ hua̱ Quintla̱t pu̱lh nama̱puhua̱ni̱y.

⁶⁶Hasta acxnitiyá̱ yama̱ quilhtamacú̱ lhu̱hua̱ hua̱nti̱ csta̱lanima̱kó̱ Jesús, titalakaspitta̱yako̱lh, chu̱ nia̱lh acxtum xta̱latla̱huanko̱y.

⁶⁷Huá̱ xpa̱lacata, Jesús na̱má̱ kalhasquinko̱lh yama̱ kalhacu̱tuy xli̱ma̱kalhtahuáka̱t hua̱nti̱ xa̱liankalhí̱n xta̱lapu̱lako̱y: —¿Chá̱ huixín? ¿Pi̱ na̱ quiakxtakmakamputuná̱tit?

⁶⁸Hua̱mpi̱ huata Simón Pedro chuná̱ kálhti̱lh: —Quimpu̱chinacán, ¿xatí̱ chú̱ a̱tanu̱ luhua nactilakana̱hu? Sa̱mpi̱ xma̱n hua̱ mintachihuí̱n ma̱lacnu̱y yama̱ xaxli̱ca̱na̱ latáma̱t hua̱ntu̱ ankalhí̱n nakalhi̱ya̱hu c-xpa̱xtu̱n Dios.

⁶⁹Quin aya cca̱ca̱najlanini̱tán sa̱mpi̱ ccatzi̱ya̱hu pi̱ huix Xatalacsacni xCam Dios hua̱nti̱ naquinca̱lakma̱xtuya.

⁷⁰Jesús chuná̱ kalhti̱ko̱lh: —Huixín catzi̱yá̱tit pi̱ ma̱n quit cca̱lacsacni̱tán laqui̱mpi̱ ankalhí̱n naquinta̱latapu̱li̱yá̱tit, hua̱mpi̱ ma̱squi chuná, c-milaksti̱pa̱ncán huí̱ cha̱tum hua̱nti̱ makatlajani̱t xtalacapa̱stacni̱ akskahuiní.