San Juan 6:52-64

⁵²Katmizna Judío awa ɨninturuzne Jesúspa tɨnta kwinta kiat kit usparuzpain kaizara: —An ampune ¿Mizama paiña ña kwinshina, au kuwiznapa?

⁵³Jesúsne kaiznara: —Watcha kaiznamtus. Na u akwa irɨkane, ap aimpi puznazi. Nawa chiyuras ampura saptukine, une watcha uzamanazi.

⁵⁴Nawa saptumikane pailta payukima uznazi, na us akwa irɨt akwa, ap aimpi us akwa puztɨt akwa. Nane minpa payura ussa kuhsninnash.

⁵⁵Ap ñane watcha kumirakanain i. Ap aimpikas watcha kwazikanain i.

⁵⁶Na u akwa irɨt akwa, nawa saptumikane nakasa wanmaktu. Nakas uskasa wanmalnash.

⁵⁷Ap Taittane, nawa ɨnintamikane, uztu. Nakas us akwa uztus. Sunkanain nawa sapturuzne na akwa uzanazi.

⁵⁸Nane chiyuras amtumikawa paramtus. Nane pankanain namtɨt ish. U ñancha kwal sun kumirakana kuarachi. Sun maná pan kuarakas, kwiztane iara. An chiyuras amtumikasha sapturuzne pailta payukima uzanazi.

⁵⁹Jesúsne Capernaum pɨpulura Judío kamtam yalkin sun kamtanara.

⁶⁰Sun kamtam mɨarawane, akwan Jesústa kanpamtuzne ka kaizara: —An kamtam pit kwisha sam i sapna. ¿Mɨnma sun pit mɨshinai?

⁶¹Jesúsne paiña kanpamtuz kain kaizamtu aizpa piankam kit mɨmanara: —¿Ap kamtam mɨasachimakkiwas? ¿Nawa chɨhkashimtumakkiwas?

⁶²Nane chiyuras ampune an ñamin ap uzmukin uztau. U mamasa nawa chiyura numtu izarane, ¿Chima minñamtuas?

⁶³Diospa Izpulmin awaruza uzninnamtu. Awain sun kisachi. Ap pit uruza kaiznamtu: “Diospa Izpulne awaruza uzninnashina.”

⁶⁴Mama mɨnpazha ukis nawa nɨjkulamtuchi. An ñamin Jesúsne nɨjkultuchiruzakas ussa chɨhkamtumikashakas piankam