San Juan 6:51-68

⁵¹Nédaꞌczaꞌ nacaꞌ yöt xtil naꞌ nabánigac bunách, bötj bruj yehuaꞌ yubá, atiꞌ chquiꞌ nútiꞌtëz bönniꞌ gahuëꞌ yöt xtil naꞌ, gbánteczëꞌ bönniꞌ naꞌ. Yöt xtil naꞌ runödzjaꞌ nedaꞌ nac xpëlaꞌa, le runödzjaꞌ quië gataꞌ yöl‑laꞌ naꞌbán quegac bunách yödzlyú.

⁵²Niꞌr gulachixi lzaꞌquëꞌ bönniꞌ judío uná bëꞌ, taꞌnë́ꞌ: ―¿Naruꞌ huactsa bönniꞌ ni gunnëꞌ queëruꞌ xpëlëꞌë gáguruꞌ lei?

⁵³Qui lë ni naꞌ Jesús rëꞌ lequëꞌ: ―Le nactë rëpaꞌ lbiꞌiliꞌ: Chquiꞌ cu gáguliꞌ xpëlaꞌa nedaꞌ, Bönniꞌ Nuhuöaquëꞌ Gdu Bunách, len chquiꞌ cu guiꞌjliꞌ xchönaꞌ, cutu caꞌ zoalen lbiꞌiliꞌ yöl‑laꞌ naꞌbán.

⁵⁴Nútiꞌtëz nu gagu xpëlaꞌa len guiꞌj xchönaꞌ, dë qui yöl‑laꞌ naꞌbán gdu, atiꞌ nedaꞌ uspanaꞌ nu naꞌ dza udx.

⁵⁵Cni gac, le nac xpëlaꞌa laꞌ huagu gdu, atiꞌ xchönaꞌ nac tu le nac gdu quië nu guiꞌj lei.

⁵⁶Nútiꞌtëz bönniꞌ gahuëꞌ xpëlaꞌa len guiꞌjëꞌ xchönaꞌ, sóalenteczëꞌ nedaꞌ bönniꞌ naꞌ, atiꞌ nedaꞌ sóalenteczaꞌ lëꞌ.

⁵⁷Ca naꞌ zoëꞌ nabanëꞌ Dios Xuz nasölëꞌë nedaꞌ, atiꞌ nedaꞌ nabánidaꞌ Lëꞌ, lëzcaꞌ cni gbáninëꞌ nedaꞌ nútiꞌtëz bönniꞌ gahuëꞌ nedaꞌ.

⁵⁸Lë ni yöt xtil bötj bruj yehuaꞌ yubá, len cutu nac ca yöt xtil naꞌ nazíꞌ lei maná, lë naꞌ glahuëꞌ xuz xtauꞌliꞌ, len catiꞌ bzaꞌa dza quequëꞌ, glatiëꞌ. Nútiꞌtëz bönniꞌ gahuëꞌ yöt xtil ni gbánteczëꞌ.

⁵⁹Yuguꞌ didzaꞌ ni bëꞌë Jesús ga nac tu lu yuꞌu ga tuꞌdubëꞌ tuꞌsëdëꞌ queëꞌ Dios bönniꞌ judío, atiꞌ guc lë ni tsal niꞌ rusëdnëꞌ bunách Capernaum.

⁶⁰Catiꞌ gulayönnëꞌ didzaꞌ ni, gulanë́ꞌ qui zian bönniꞌ usë́d queëꞌ Jesús, taꞌnë́ꞌ: ―Banigtë didzaꞌ ni. ¿Nuzxa caz gac siꞌ lu nëꞌi lei?

⁶¹Ráquibeꞌinëꞌ Jesús taꞌnë́ꞌ qui xtidzëꞌë bönniꞌ usë́d queëꞌ, atiꞌ gnabnëꞌ lequëꞌ, rnëꞌ: ―¿Naruꞌ run lbiꞌiliꞌ ziꞌ didzaꞌ ni?

⁶²¿Nacxcz gac chquiꞌ hualéꞌiliꞌ nedaꞌ, Bönniꞌ Nuhuöaquëꞌ Gdu Bunách, huëpaꞌ huöjaꞌ ga niꞌ zoaꞌ ziꞌal?

⁶³Le nac queëꞌ Dios Böꞌ Laꞌy nac le runn queëliꞌ yöl‑laꞌ naꞌbán. Le nac bëlaꞌz cutu caꞌ nu uzíꞌ xbey. Yuguꞌ didzaꞌ naꞌ bë́ꞌlenaꞌ lbiꞌiliꞌ nacgac queëꞌ Dios Böꞌ Laꞌy len tunn quegac bunách yöl‑laꞌ naꞌbán.

⁶⁴Naꞌa, laꞌliꞌ cutu réjlëꞌliꞌ. Gnëꞌ cni Jesús le nözcznëꞌ dza niꞌtë nup naꞌ cutaꞌyejlëꞌ, lencaꞌ nu naꞌ udö́d Lëꞌ lu naꞌquëꞌ bönniꞌ ludöddëꞌ Lëꞌ.

⁶⁵Qui lë ni naꞌ gnëꞌ: ―Qui lë ni naꞌ chgudxczaꞌ lbiꞌiliꞌ: “Cutu sáquiꞌnëꞌ tëꞌë nedaꞌ nitúëꞌ bönniꞌ chquiꞌ cutu guꞌë lëꞌ latj Dios Xuz.”

⁶⁶Dza naꞌ glac chop ládxiꞌquëꞌ zian bönniꞌ usë́d queëꞌ len cutur guladálenëꞌ Lëꞌ.

⁶⁷Niꞌr Jesús gnabnëꞌ idxínnutëꞌ bönniꞌ usë́d queëꞌ naꞌ, rëꞌ lequëꞌ: ―¿Naruꞌ ubígaꞌtsaliꞌ caꞌ lbiꞌiliꞌ?

⁶⁸Bubiꞌë didzaꞌ Pedro, rëꞌ Lëꞌ: ―Xan, ¿nuzxa qui tseajtuꞌ? Liꞌ napuꞌ didzaꞌ tunn queëtuꞌ yöl‑laꞌ naꞌbán gdu.