San Juan 6:5-18

⁵Akkwan awa ussa kanpararuza iznarawane, Jesúsne Felipera kaiz kit mɨmara: —¿Mɨntama kumira paina ɨanapai, wan awa kuanapa?

⁶Usne kaizta, sun Felipe chi kizkwarakas mɨna. Jesúsmin us kishimtu aizpa wat pian.

⁷Suasne Capernaum pɨpulura ɨamtuasmin, Felipene ussa sɨnkara: —Mɨnpazha paas cien payu kal kitne, kumira paisachi, wanta pitchin nailnana.

⁸Andrésne sua tuazi. Uskasa mamaz kammumika azi. Usne Simón Pedrowa aimpihsh. Suasne usne kaizta:

⁹—Akkine maza ampu pashpa panai. Usne cinco chara pippa pankas paas pishkaru iltakas mɨji. Sun nailtane, wan awa kuasachi.

¹⁰Suasne Jesúsne ussa kaizta: —Wan awaruza uztain kiznari. Suain akkwan pɨt sau pura. Cinco mil ampuruzpain sua uzara. Ashamparuzkas pashparuzkas uspakasa uzara.

¹¹Suasne Jesúsne pan sap kit Diosta aishtaish kizta. Sun kiztawane, kammuruza kwinnara. Paiña kammuruzne wan uztuza nailnara. Kawarain pishkarukas nailnara, kwashimtu aizpa kuanapa.

¹²Wan tukkarakane, Jesúsne paiña kammuruza kaiznara: —Chiwazha pitti pak tizka chaktain, chinkas kamanpa.

¹³Cinco chara pippa sarɨt pantas tizat akwa, uspane pitti pitti sakkat kit doce tɨmta winñara.

¹⁴Suasne Jesús iztasparɨt kal kirɨt aizpa izarawane, awane kaizara: —Watcha. Usne Dios pit kainammmika i. Diosne ussa kin nam kit au sukin ɨninta.

¹⁵Suasne Jesúsne awa minñamtu aizpa nɨjkulta. Uspane ussa paiña mikwa namninashimtu. Usne mamasa kwash ɨzara usparuztas paimpa ɨrɨt, mazain tuan.

¹⁶Amta parɨka, Jesúspa kammuruzne aiz pira kihshat kit

¹⁷maza kanuara waat kit aiz pi kwakkamɨzta, Capernaum pɨpulura piannana. Tɨlkwil parɨt me. Jesúsne mama uspa tukin kailtachi.

¹⁸Suasne tɨnta inkwa pamɨzta. Aiz pikas tɨnta kialmɨzta.