SAN JUAN 6:49-70

⁴⁹Nindogoelitoa ra ẍanc̈hjen joine na maná ngagaha jna, pero masqui joine na mé, jehe na ndavenhe na;

⁵⁰pero janha nichja de ixin tti niottja que joixin de ngajni que are ná chojni jine niottja jihi, chojni mé senha almé.

⁵¹Janha mismo jehe tti niottja que danjo vida que joixin de ngajni. Tti chojni que jine nio, chojni mé rrochonda iná vida naroaxin que ẍonhi tiempo tsjexin. Tti niottja que janha sanjo, mé rroc̈ho cuerpona. Janha sanjo cuerpona para que cainxin chojni ngoixin mundo rrochonda na iná vida naroaxin que ẍonhi tiempo tsjexin.

⁵²Cottimeja chojni judío coexinhi vitticaoenha chó na co vinttendac̈ho na: ―¿Queẍén nchao chojni jihi rrochjá na cuerpoe sontte na?

⁵³Jesús ndac̈ho ngain na: ―Janha rrindattjo ra ndoa que si jaha ra sintteha ra cuerpona janha, tti Xí que joixin de ngajni, co siha ra jnina, jaha ra rrochondaha ra iná vida naroaxin que ẍonhi tiempo tsjexin.

⁵⁴Tti chojni que sine cuerpona co sihi jnina, chojni mé chonda iná vida naroaxin que ẍonhi tiempo tsjexin, co janha sinttaxechon chojni mé ngain tti nchanho are ndatsjexin mundo.

⁵⁵Cuerpona, mé tti ndoa comida; co jnina, mé tti ndoa jinda que dihi na.

⁵⁶Tti chojni que jine cuerpona co dihi jnina, chojni mé jí nganji na co janha rrihi ngain jehe.

⁵⁷Ndodana que rroanha na chonda Ndo vida, co janha rrichon de ixin jehe Ndo, mexinxin tti chojni que sine na janha sechon de ixin janha.

⁵⁸Janha nichja de ixin tti niottja que joixin de ngajni. Co niottja jihi jeha inchin tti maná que joine nindogoelitoa ra ẍanc̈hjen, que masqui joine na mé, jehe na vintteguenhe na, ixin tti chojni que sine tti niottja que janha ndac̈hjan, chojni mé rrochonda iná vida naroaxin que ẍonhi tiempo tsjexin.

⁵⁹Jesús joinchecoenhe na cain cosa jihi ngain servicio ngain ninhgo ngain rajna Capernaum.

⁶⁰Are coinhi na cain tti ndac̈ho Jesús jihi, tsje chojni que varroé Jesús ndac̈ho na: ―Tti ndac̈ho xí jihi atto tangui para que rrondac̈ho na ján; ¿quensen nchao sinchehe caso tti ndac̈ho xí jihi?

⁶¹Cottimeja Jesús conohe tti tendac̈ho chojni mé, co jehe joanchiangui ngain na co ndac̈ho: ―¿Afeo tonoha ra de ixin tti janha rrindac̈hjan?

⁶²¿Quehe rroẍaxaon jaha ra si rroguicon ni ra janha, tti Xí que joixin de ngajni, sarrocajín tti joarihi are saho?

⁶³Espíritu Santo, mé tti danjo iná vida naroaxin que ẍonhi tiempo tsjexin; cuerpoe ni c̈hoha danjo vida mé. Co cain palabra que janha ndattjo ra, mé de ixin Espíritu co danjo iná vida naroaxin que ẍonhi tiempo tsjexin.

⁶⁴Pero ẍa te canxion jaha ra que ẍa ditticaonha ra. Jamé ndac̈ho Jesús ixin are nacoexinxon ẍé jehe ovenohe quecá chojni que vaguitticaonha, co quensen tsjago ttinó sehe jehe para rrotse niningaconhe.

⁶⁵Co Jesús ndac̈ho: ―Mexinxin janha ndattjo ra que ẍonhi chojni nchao tsí nganji na si Ndodana tsiaoha.

⁶⁶Desde are maho, tsje chojni que varroé Jesús ndacointtohe na jehe, co ivagacaoha na.

⁶⁷Cottimeja Jesús joanchianguihi tti tteyó chojni que vacao co ndac̈ho: ―¿Acai jaha ra rinao ra satsji ra?

⁶⁸Pero Simón Pedro ndac̈ho: ―Soixin, ¿quensen ngain nchao satsji na? Palabrá soixin palabra que danjo iná vida naroaxin que ẍonhi tiempo tsjexin.

⁶⁹Janha na ovitticanho na, co nona na que soixin tti Cristo tti Dios rroanha co tti Xenhe Dios que jichon.

⁷⁰Jesús ndac̈ho: ―Janha coinchiá tti tteyó jaha ra. Co ixinha jamé, ná de jaha ra ná chojní inchínji.