San Juan 6:49-70

⁴⁹De gyitoo bel ni de ru bdow dey gyishtily nu la maná nu briic Ñgyoozh lat nu gusa dey de lugaar ub zi, tees gut dey.

⁵⁰Tees gyishtily nu ya̱ rzata̱ lo der, ndeꞌ gyishtily nu bruu gyibaa. Mbecy nu gow gyishtily zeꞌ wat yu.

⁵¹Ya̱ naca̱ gyishtily nu cuic gyel mbañ: gyishtily nu bruu gyibaa. De yu nu gow gyishtily zeꞌ, cui mbañ yu tub la, nunu gyishtily nu ya̱ grica̱ ni dey, ndeꞌ laab cuerp ne̱. Rica̱ ñii, gun orzeꞌ de mbecy gyishlombecy gad nu cui mbañ dey ―nam.

⁵²Orzeꞌ la be de mbecy Israeel brugyiꞌ nu ro zi dey riidz nu losaꞌy. Orzeꞌ na dey: ―¿Lac mod gyicyaꞌ yu ii par nu cuic yu cuerp niy dow den? ―na dey.

⁵³Orzeꞌ na Jesuuz rab mi dey: ―Ya̱ rishli rne̱e̱ lo der benu wow der cuerp ne̱ ya̱, biñ nu byac mbecy, nunu benu woꞌ der reña̱, orzeꞌ wad nu cui mbañ der.

⁵⁴Cyu ziꞌl mbecy nu gow cuerp ne̱ nunu goꞌy reña̱, yu zeꞌ bi guud nu cui mbañ yu tub la, nunu gyicya̱ nu gyabañ yu ornu laab ndeꞌ la nu shuub dzi nu ded ni gyishlombecy.

⁵⁵Gun cuerp ne̱, ndeꞌ tub comid nu rishli gaal. Zeꞌ reña̱, ndeꞌ tub nis nu rishli gaal nu goꞌ dey.

⁵⁶Gun de yu nu gow cuerp ne̱ nunu goꞌy reña̱, de yu zeꞌ cyiiñ du̱ yu, nunu de yu zeꞌ cyiiñ nuy ya̱.

⁵⁷Ñgyoozh uza̱, biñ nu bzuu nez ya̱, mbañ mi, nunu ya̱ mbaña̱ par nu nac mi zeꞌ. Ndeꞌ nu niꞌ ziꞌl mod de yu nu gow cuerp ne̱, cui mbañ yu nu nac ya̱.

⁵⁸Gyishtily nu ya̱ rzata̱ lo der, ndeꞌ gyishtily nu bruu gal gyibaa. Gyishtily nu rne̱e̱ ii, nii wasaap ñi gyishtily nu la maná nu bdow de gyitoo bel ni den. Mas bdow dey de gyishtily zeꞌ, tees gut dey. Zeꞌ de yu nu gow gyishtily nu ya̱ rne̱e̱, de yu zeꞌ cui mbañ dey tub la ―nam.

⁵⁹De nii coz nu blyuu Jesuuz ni de mbecy nu byatublaazh nañ yuꞌ nu rsyaꞌ de mbecy Israeel riidz ni Ñgyoozh Capernaum.

⁶⁰Na zigy de yu nu rsyaꞌ lom, ornu güeñ dey de ndeꞌ, orzeꞌ na dey rab yu losaꞌy: ―De riidz nu mniim ii, dzi ga biigy. ¿Cyu gagye nu gyeñ de nu nde? ―na dey.

⁶¹Na ornu gud lagy Jesuuz nañ lardoom nu rnii deet dey nu nac ndeꞌ, orzeꞌ nam rab mi dey: ―¿A nu nac de riidz nu mne̱e̱ ii, ndeꞌ nu wangyuꞌ lagy der?

⁶²¿Zeꞌ la gyicyaꞌ der benu gzac ru nu ya̱, biñ nu byac mbecy, nu chupa̱ gyibaa, zeꞌ nu pcyiiña̱ nu loga?

⁶³Espiriit Yon ni Ñgyoozh, mi zeꞌ gyicy mi nu cui mbañ de mbecy gun de mbecy gyishlombecy se la la cyiiñ dey par nu gyicy dey nu cui mbañ yu. Tees de riidz nu mne̱e̱ lo der ii, nii coz nu bruu lo Espiriit Yon ni Ñgyoozh. Nunu mi zeꞌ gyicy mi nu cui mbañ dey.

⁶⁴Tees gabee yuꞌ la be mbecy lat der nu wagyicy cup consuel lo̱ ―nam. Gun Jesuuz nil bi gud lagy mi nese anzir nu cuim dey nu ca na de yu nu wayicy cup consuel lom, nunu bi gud lagyaꞌm ca na yu nu guꞌm yaa mbecy rzi lagy.

⁶⁵Orzeꞌ na gaꞌm: ―Ndeꞌ nu ya̱ bi mne̱e̱ lo der nu ni tub la mbecy wac gyechaꞌ dey lo̱, benu walab Ñgyoozh niim nañ lardoo dey.

⁶⁶Par nu nac de riidz zeꞌ, zigy de yu nu rsyaꞌ lom bya ich yu nunu wanchesa nu gaꞌ dey mi.

⁶⁷Orzeꞌ na Jesuuz rab mi de trocyup yu nu rsyaꞌ lom: ―Zeꞌ de ru, ¿a niꞌ rlagy der ruu chur lo̱? ―nam.

⁶⁸Orzeꞌ na Simo̱o̱ Bed: ―Shuaan de̱, ¿zeꞌ cyu lo cha̱ de̱ beni? De riidz nu ru rniir, ndeꞌ riidz nu gyicy ñi nu cui mbañ de̱ tub la.

⁶⁹Nunu de̱ ya̱ bi ricy cup de̱ consuel lor, nunu bi rad lagy de̱ nu ru nac ru biñ yon nu bruu lo Ñgyoozh ―na Bed.

⁷⁰Orzeꞌ na gaꞌ Jesuuz rab mi dey: ―¿A walab nu pcui̱ de trocyup de ru? Zeꞌ lo trocyup der, tub yu nac yu tub mbecy ni nuras ―nam.